Jaallaboota 16 - KITAABA WAAQA

¹ Guyya toko Samsonini dira Gaza d'aqe, niiti sharmut'a toko iti gore bira bule.

² Worri Gaza aka Samsonini arti d'ufe d'ageennaani mana; suni marsani, halkani suni ch'ufa fullo dira keesati eegaa bulani. Halkani suni ch'ufa ch'allisani heregani waan jed'ani, Bari lafaa eenne isa ijeemna.

³ Ammo Samsonini haga halkani wolqit'aani ch'alla rafe, jennaani kae, d'aqe balbala fullo dira qabe buqise — balbala, mikhikila, danqarro, waan fullo suni haguma getunu ch'ufa gurmu ira keyate gara fiit'e gaara Hebronini iraani mullatuti geese.

Samsonifi Delila

⁴ Eegi suni Samsonini niiti Delila jed'ani toko, ta bale Soreki keesa teetu jaalate barate.

⁵ Hayyooti Filisti shanani gara isi d'at'e waan jetteeni, waan atini taatu, Samsonini sosobi, waan akana isa jabeesefi aka nu isa dandeenne qabne hiine dabsannu gaafad'i, nuti himi. Duuba Nuuni ch'ufti qarsi kuma tokotifi d'ibba toko sii kennina.

⁶ Jennaani Delilani waan Samsonini jette, Aabbo, bad'aaso kiyya, waan akana si jabeesa kana nati himi. Yo nami sila si hid'e si dabsachu fed'e akami tau male?

⁷ Samsonini waan jed'eeni, Yoyu haada ribbu ka guube t'iya, ka ingogogini, torbaani na hid'ani anini irre d'abe akuma biyya d'ibi taha.

⁸ Jennaani hayyooti Filisti taani haada ribbu ka guube t'iya torba ka ingogogini Delilatini d'ufte, isiini Samsonini hiite.

⁹ Yo kana worri Filisti d'iibiini d'iibu mana suni keesati d'okhachu jira. Duuba isiini iyyite waan jette, Samsoni worri Filisti ya d'ufe! Ammo inni haada ribbu kaani akuma liilana gubani ch'ich'ire. Tanaafi worri fulla jabeenni isaa bahufi beekhu dad'abe.

¹⁰ Jennaani Delilani waan Samsonini jette, Isii atini qara na sobde d'uga nati inhimne. Me, bad'aaso kiyya, aka nami dandae si hid'u nati himi.

¹¹ Inni waan jed'eeni, Yoyu haada haareesa ka taka womanu inhid'ini na hid'ani, anini irre d'abe akuma biyya d'ibi taha.

¹² Jennaani Delilani haada haraani isa hite iyyite waan jette, Samsoni! Worri Filisti ya d'ufe! Ammalle worri Filisti d'iibu mana suni keesati d'okhachu jira; ammo inni haada suni akuma liilana ch'ire.

¹³ Delilani waan jetteeni, Isi atini ammalle na sobde d'uga nati inhimne. Abbo d'uga baasi, aka nami si hid'u nati himi. Inni waan jed'eeni, Hojja atini guduru mata kiyya torba wolti d'oofte, d'isati jabeesite hiite, anini irre d'abe akuma biyya d'ibi taha.

¹⁴ Ado inni rafu isiini guduru mata isaa torbaani fuute, wolti d'oofte, d'isati hiite. Iyyite waan jette, Samsoni, worri Filisti yayu d'ufe! Ammo inni guduru isaa d'isa iraa baase.

¹⁵ Duuba isiini waan jetteeni, Atini ka ufira inqamne akami si jaalad'a nani jette? Atini maro sadi na sobde, waan si jabeesani nati himu didde.

¹⁶ Isiini guyya ch'ufa gaafini gaargalchite lakisu didde dad'absiifte, jennaani inni hiifate obsu dad'abani

¹⁷ d'uga iti hime waan jed'e, Rifeensa kiyya taka nami inhaane, Haguma d'alanaani na eebisani aada Naziri gula Waaqaa na kennani. Ammo yo rifeensa kiyya naraa haadani, anini irre d'abe akuma biyya d'ibi taha.

¹⁸ Delilani aka inni d'uga iti hime hubannaani qonqo hayyoota Filisti taaniti ergite waan jette, Tokotu deebia, inni yayu d'uga nati hime. Worri beese fud'ate dachae isiiti gad'ufe.

¹⁹ Delilani miila ufi ira isa rafifte, nama guduru torbaani iraa haadu yaamte. Jennaani isa miite goyeesite waan inni irre d'abeefi.

²⁰ Jennaani isiini iyyite waan jette, Samsoni! Worri Filisti ya d'ufe! Inni kae, herege waan jed'e, Anini akuma qara kaani baafad'e worra duraa ufi baasa. Inni aka AABBO Waaqi isa lakise imbeenne.

²¹ Worri Filisti isa qabe ila keesaa yaase, Gazati geese, sansalata sibiila diimatini hid'ani, mana hid'aansa kaani keesati d'akha daakhu guddaani mid'aani daasisani.

²² Ammo rifeensi haadani kaani ammalle bahe.

Duisa Samsoni

²³ Hayyooti Filisti taani wolti baate jila tolfate, sorio waaqa worra ka Dagoni jed'ani qalte, sirbite waan jette, Waaqi keenna yayu nyaapa keenna Samsoni harka keennati kenne.

^24-25 Worri guddo gammade waan jed'e, Samsoni nuu yaama ha nu kofalchisu! Worri Samsoni mana hid'aansa keesaa fuud'e, aka inni nama kofalchisu tolche, jiddu utuba manaa d'aabe. Biyyiti isa arginaani waaqa isaani faarsite waan jette: Waaqi keenna yayu nyaapa keenna Samsoni, ka lafa teenna balleese, nu nama heddu gate, harka keennati kenne.

²⁶ Jennaani Samsonini gurba isaa harka qabe deemuni waan jed'e, me utuba mani kuni ejuuni na qabachisi aka anini iti hirkad'u.

²⁷ Mana suni gumi hedduti ta d'iirafi nad'eeni guute. Hayyoota worra Filisti shananu taaleeni achuma jirti, ammalle mana suni gubbaa nama kuma sadi gahu, ka d'iirafi nad'eeniti, ka Samsoni daawate isati tabatu, jira.

²⁸ Jennaani Samsonini AABBO Waaqa kad'ate waan jed'e, AABBO gudda si kad'ad'a na qaabad'u, Ee, Waaqa irre tiyya maro toko ch'alla naa deebisi, aka anini worra Filisti haalo ila tiyya lamaani baafad'u.

²⁹ Jennaani Samsonini utuba lamaani jiddu mana jiru harka harkaani qabate, gargari d'iibe.

³⁰ Iyye waan jed'e, Aninileeni ha worra Filisti woliini duuti! Humna isa ch'ufaani d'iibe, mani suni hayyoota taani shananifi nama achi jiru ch'ufa irati jige. Akanaani Samsonini guyya due suni haga gaafa jiru iraa nama muumme inqamne ijeese.

³¹ Oboleyaani isaatifi worri isaa ch'ufti reefa isaa fuud'u d'ufe. Duuba reefa isaa suni fuud'ani, jiddu Zoratifi ta Eshtaoli awaala abba isaa Manoa keesati awaalani. Inni ganna diddama jaallaba Israeliti tahe.