Jaallaboota 14 - KITAABA WAAQA

¹ Guyya toko Samsonini Timna d'aqe, achiti intala Filisti toko arge.

² Jennaani inni gale, waan abbaafi haad'a ufiitini jed'e, Intala Filisti toko gara Timna suniti arge, kaa, na kad'ad'a.

³ Ammo abbaafi haati isaa waan jetteeni, Isi gurba, atini maani hekatefi, dubra nyaapa ta Filisti, worra aada inqamne, d'araataafi? Atini intala miilo teti gosa teenna tana ch'ufa keesa ind'abde? Ammo Samsonini waan abbaani jed'e, Anini isuma ch'alla fed'a, kai na barbaadi.

⁴ Abbaafi haati isaa aka heregi isaa kunini AABBO Waaqa iraa bahe diqole imbeekhani; wonti akanatiifi AABBO Waaqi kara worra Filistitini had'u barbaaduu jira. Gaafasi worri Filisti worra Israeli mohata.

⁵ Jennaani Samsonini abbaafi haad'a isaa woliini Timna d'aqani. Ato worri oobru zabibu keesa yau, inni kuble nyeench'a ta d'anga d'ooftu d'agaye.

⁶ Jennaani hojuma suni irreeni AABBO Waaqa Samsoni jabeesite, inni harka ufiitini nyeench'a qabe, aka kaarata ree gargari Tarsaase. Ammo inni waan tolche suni Abbaafi haad'aleti inhimne.

⁷ Jennaani inni deeme intalaani haasae maache.

⁸ Eegi bulti diqo Samsonini intala fuud'aa deebie, Ato deemu, kara iraa gore, nyeench'a ijeese kaani laalu d'aqe, tuuta kinnisatifi damma goblola kaani keesati arge guddo mame.

⁹ Kinnisa bafate, kara gula nyaachaa deeme, abbaafi haad'aleeni gahe, worrileeni nyaate; ammo Samsonini aka kinnisa kana goblola nyeench'a keesaa bafate worrati inhimne.

¹⁰ Abbaani isaa mana worra intalafa d'aqe, achiti Samsonini jila fuud'a ta aada kaima worra lafa suniti tolche.

¹¹ Worri Filisti isa arge jennaani nama kaima sodoma, ka isa woliini tau, ergani.

¹² Samsonini waan jed'eeni, Hiimpo toko isani hiimpifad'a, yo isani hiimpo tana torbaani jila kana keesati nati himtani; anini woya boofta sodoma, ammalle woya jila sodoma isanii ch'ufa toko toko keenna.

¹³ Ammo yo himu dad'abdani, isaniti woya boofta sodomatifi woya jila sodoma naa keenna worri waan jed'eeni, Hiimpo tante hiimpifad'i, ind'ageenna.

¹⁴ Hiimpifate waan inni jed'e, Ka wonyaatu keesa wonti nyaatani baate; jaba keesa wonti miooftuni baate. Guyya sadi hiimpo suni himu, dad'abani.

¹⁵ Guyya afreeso waan niiti isaatini jed'ani, D'iirsa kanke sobi, aka inni hiimpo suni nuti himu, yoyu akasi tolchu baate, sifi mana abbeetile woliini gumna. Ada, isani nu sobdani nu saamu feetani?

¹⁶ Jennaani niitiini isaa d'at'e iti boote waan jetteeni, Atini na injaalatu, na jibbita! Atini gosa tiyya iti hiimpifate, nati himu didde. Jennaani inni waan jed'eeni, Abbaafi haad'a tiyyaleti inhimne, maanifi siti hima?

¹⁷ Bulti torbaani jila suni ch'ufa iti boote jennaani guyya torbeeso waan hiimpo suni, waan isiini isa gargalchitefi iti hime. Duuba isiini kaate worra gosa isii ka Filistiti himte.

¹⁸ Duuba guyya torbeeso ato Samsonini mana bulti olinseeni worri dira suni waan jed'eeni, Maanti kinnisa ira miyaa? Maanti nyeench'a ira jabaata? Samsonini waan jed'eeni, Ato isani saa kiyyaani lafa qotu baatani hiimpo tiyya inhimattani.

¹⁹ Yoosu irreeni AABBO Waaqa isaa jabeesite, inni kae Ashkeloni d'aqe, nama sodoma gate, woya iraa yaase, woya suni worra hiimpo himate kaani kenne. Eegi suni inni dallansuuni kae worra abba ufiti gale,

²⁰ niiti isaale nama isa gula fuud'a d'aqe kennani.