Jaallaboota 13 - KITAABA WAAQA

¹ Worri Israeli ammalle waan hamtu AABBO Waaqa durati tahe duuba inni ganna afurtama worra Filisti worra mohachise.

² Gaafasi nama tokoti jira ka Manoa jed'ani, ka dira Zora, ka gosa Dani. Niitiini isaa maseena, taka ind'alle.

³ Malaikaani AABBO Waaqa isiiti mullatte waan jetteeni, Atini qara maseena, taka ind'alle ammo d'iotu garaachoofte ilma d'alta.

⁴ Ufi eegad'i, daad'ifi farso ind'ugini, yokhaani sagale lagu tokole insooratini,

⁵ eegi gurbaani sii d'alate rifeensa mata isaa inhaadini, wonti akanatiifi isa haguma inni d'alate asi eebisani, aada worra Naziri gula Waaqaa kennani. Nami qara worra Israeli harka Filisti keesaa baasu isuma.

⁶ Jennaani niitiini d'iirsa d'at'e waan jetteeni, Nami Waaqa toko, ka fuuli isaa aka malaika jiru, nati d'ufe na sodaachise. Anini, Eesa baate? Jed'e isa ingaafanne, innileeni maqa isaa nati inhimne.

⁷ Ammo wonti inni nani jed'e, Atini garaachoofte ilma d'alta: tanaafi daad'ifi farso ind'ugini, yokhaani sagale lagu tokole insooratini; wonti akanatiifi gurbaani sunini yo d'alate haga jiru ch'ufa eebisanifi aada Naziri gula Waaqaa kennani.

⁸ Jennaani Manoani AABBO Waaqa kad'ate waan jed'e, Ee, AABBO Waaqa, namichi Waaqa kaani, ka atini nuti ergite, ha gadeebie, waan nu gurba d'alatu suni tolchinu nuti himuti.

⁹ Waaqi kad'a Manoa d'agayeefi, malaika isaa, ato niitiini oobru keesa teetu, iti erge. Hojja suni d'iirsi isii Manoani arti injiru,

¹⁰ jennaani isiini hojuma suni utaalte, d'iirsaani waan jette, kooti namichi kaani ka onana yayu d'ufe, laali.

¹¹ Manoani kae, niiti isaa gula deeme, namichati d'ufe waan jed'eeni, Nami niiti tanaani dubbate si? Inni, Ee, anuma jed'e.

¹² Jennaani Manoani waan jed'eeni, Hojja dubbini tante tunini d'ugoofte gurbaani kunini nama akami tahu male? Yokhaani jireenna akami fidamu male?

¹³ Malaikaani waan jetteeni, Niitiini tante waan anini jed'eeni ch'ufa guutu malte.

¹⁴ Isiini mid'aani zabibutifi daad'ifi farsofi yokhaani sagale lagu tokole soorachu himmalle; waan anini jed'eeni ch'ufa guutu malte.

^15-16 Manoani aka nami sunini malaika AABBO Waaqaa qara imbeenne, tanaafi inni waan jed'eeni, Diqo miila d'aabad'i, ree sii qala. Ammo malaikaani waan jetteeni, Ato miila d'aabad'ele, sagale tante inyaad'u. Ammo yo atini qalu feete gubi, AABBO Waaqa sorio baasi.

¹⁷ Manoani waan jed'eeni, Maqa kanke nuti himi aka yo dubbini tante d'ugoofte, nu maqa kanke ulfeesine guddimnu.

¹⁸ Malaikaani waan jetteeni, Maanifi maqa kiyya beekhu feeta? Maqaani kiyya maqa mamaati.

¹⁹ Jennaani Manoani kaarata laleesatifi mid'aani fuud'e, d'akha irati AABBO Waaqa ka waan mama tolchu, sorio baase.

^20-21 Ato arabi ibida d'akha ira olbahu, Manoafi niitiini isaa malaika AABBO Waaqa ta araba ibida keesa gubbati oldeemtu argani. Jennaani Manoani aka nami suni malaika AABBO Waaqaa hubate, isaafi niitiini isaa lafati gogombifamani; duuba deebiani malaika taani inargine.

²² Manoani waan niiti isatini jed'e, Nu arra ira inhamnu, eegi Waaqa argine!

²³ Ammo niitiini isaa waan jetteeni, Ato AABBO Waaqi sila nu ijeesu fed'e, inni sorio teenna tana infud'atu yokhaani waan akana kana ch'ufa nu garsiise yokhaani nuti inhimu.

²⁴ Niitiini ilma deete, maqa isaa Samsoni baafte. Inni olgudate, AABBO Waaqi isa eebise,

²⁵ lubbuuni AABBO Waaqa irre isaa kennite, gaafa inni jiddu Sorafi Estaoli olla Dani jiru.