Jaallaboota 12 - KITAABA WAAQA

¹ Worri Efraimu lola kurfefate galaana Yordani gama Zafoniti taake waan Yefthani jed'ani, Atini maanifi, ka nu iyyaamini, seera taakite worra Amoni haate? Mana, ato atini keesa jirtu sirati gumna!

² Ammo Yefthani waan jed'eeni, Anaafi gochiti tiyya guddo worra Amonitini wold'amne; anini ya isani yaame ammo isani na qarqaaru diddani.

³ Aka isani na qarqaaru diddani arginaani anini lubbu tiyya jibbaad'e seera taake worra had'e, AABBO Waaqi na dabsachiise. Maanifi amma na had'u d'uftani re?

⁴ Jennaani Yefthani worra Gileadi ch'ufa wolti baase, worra Efraimu had'e dabsate. (Worri Efraimu qara waan jed'e, isani worri Gileadi, ka Efraimufi Manase keesa jirtani daafantani gosa teesani keesaa baqatani!)

⁵ Aka worra Efraimu bahu d'owani, worri Gileadi malka galaana Yordani ch'ufa qabate. Hojja worri Efraimu tokoleeni aka galaana taaku kad'atu, worri Gileadi waan jed'uuni, Atini worra Efraimuti? Yoyu inni hiyo jed'e,

⁶ worri waan jed'uuni, Shibolethi jed'i me, Ammo inni waan jed'u, Sibolethi, waan jecha inqajeelfanefi. Duuba artiti qabani malka keesati ijeesani achiti nama kuma afurtami lama ka Efraimu fit'ani.

⁷ Yefthani worra Israeli ganna jaa jaallaba iti tahe due, donaani duuba dira isaa ka Gileaditi awaalani.

Ibzanifi Elonifi, Abdoni

⁸ Eegi Yefthani due, Ibzanini, ka Bethlehemu bahe, Israeli jaallaba iti tahe.

⁹ Inni ilma d'iira sodomafi dubra sodoma d'ale. Dubra isaa suni nama balbala gosa d'ibiiti gurgure, dubra sodoma d'ibi balbala gosa d'ibi keesa ilmaani isaa ta d'iira fuusise. Inni ganna torba jaallaba Israeli tahe,

¹⁰ eegi suni due Bethlehemuti awaalani.

¹¹ Eegi Ibzanini due, Elonini, ka gosa Zabuloni, Israeli ganna kud'ani jaallaba iti tahe.

¹² Inni due jennaani isaa Ayaloni lafa Zabuloni keesati awaalani.

¹³ Eegi Elonini due, Abdoni, ilmi Hileli, ka lafa Pirathoni Israeli jaallaba iti tahe.

¹⁴ Inni ilmaani d'iira afurtamatiifi akhakhowani d'iira sodoma ta harre torbatama yaabatu qaba. Inni ganna saddeeti jaallaba Israeli tahe.

¹⁵ Jennaani due dira Pirathoni keesati awaalani. Diri suni lafa Efraimu gaareeni Amaleki keesa jira.