Jaallaboota 1 - KITAABA WAAQA

Aka gochiti Yudafi Simeoni hayyu Adon-Bezeki qabde

¹ Eegi Yoshuani due worri Israeli waan AABBO Waaqaani jed'e, Gosa teenna keesa gochiti qara ta d'at'e worra Kanaani haatu tami?

² AABBO Waaqi waan jed'eeni, Gochiti Yuda ha qara d'at'uti, anini yayu harka worrati lafa suni kenne.

³ Worri gosa Yuda waan worra gosa Simeonitini jed'e, Lafa nuu kennaniti woliini nu yaasa, nu worra gosa Kanaani wolumaani haana. Duuba eege nu lafa isanii kennani woliini d'anna. Jennaani gochiti Simeonitifi

⁴ ta Yuda duula woliini iti d'aabate. AABBO Waaqi worra gosa Kanaanitiifi ka Perizi harka worrati kenne worri nama kuma kud'ani Bezekiti dabsate.

⁵ Achiti worri hayyicha Adon-Bezeki jed'ani arge had'e.

⁶ Ammo inni baqate jennaani worri isa reebe, qabe quba hagicho ka harkatifi ka miilale ch'ufa iraa ch'ire.

⁷ Adon-Bezekini waan jed'e, Hayyooti torbatama ta quba hagicho ka harkatifi ka miila ira ch'irani d'ieenna hamba mesa kiyya jalaa guurati. Waaqi amma yayu waan anini duri worra tolche na tolche. Yerusalemu isa geesani inni achiti due.

Aka gochiti Yuda Yerusalemufi Hebroni haate dabsate

⁸ Worri Yuda Yerusalemu had'e dabsate, nama isaa fit'e dira ch'ufa gube.

⁹ Eegi suni gabuani worra Kanaani ka lafa gaareeni jirufi ka golba gaara jirufi ka lafa gamooji ta bita jirule had'ani.

¹⁰ Worra Kanaani, ka dira Hebroni, ka duri Kiriath-Arba jed'ani jiruti had'iisa dabrani. Achiti worra balbala Sheshaitifi Ahimanitifi Talmai dabsatani.

Aka Othnielini dira Debiri dabsate

¹¹ Worri Yuda achii kae, dira Debiri ka duri Kiriath-Seferi jed'ani, dabsate.

¹² Namichi Yuda toko ka Kalebu jed'ani waan jed'e, Anini intala tiyya Aksa nama dira Kiriath-Seferi had'e qabe inkennafi, ha fuud'uti.

¹³ Jennaani Othnielini, ilmi Kenazi, ka maand'a Kalebu, dira suni had'e qabe. Duuba Kalebuni intala ufi Aksa kenneefi.

¹⁴ Guyya fuud'a, Othnielini isi sobate abba isi oobru na kad'ad'i jed'eeni, isiini harre ufi iraa buute, jennaani Kalebuni waan isiini feetu gaafate.

¹⁵ Isiini waan jetteeni, Anini madda bisaani fed'a. Lafti atini naa kennite lafa gamooji ta bisaani inqamne. Jennaani Kalebuni madda bisaani ta jalatifi ta gubbale kenneefi.

Aka gochiti Yudatifi ta Benjamini nyaapa dabsate

¹⁶ Worri gosa Keni, ka sodda Musa, Yeriko dira meet'iti worra gosa Yuda woliini yae, lafa aloo ta Aradini bita lafa Yuda keesa d'aqe achi gosa Amaleki keesa qubate.

¹⁷ Worri Yuda worra Simeoni woliini yae, worra gosa Kanaani, ka dira Sefathi keesa tau, dabsate abaare balleese dira suni maqa Horma baaseefi.

^18-19 AABBO Waaqi worra Yuda qarqaare duuba worri lafa gaareeni fud'ate. Ammo worri dira Gazatifi ka Eshkolonitifi ka Ekroni, lafa d'aatu jirtu woliini, infud'anne. Worri kunini, ka d'aatu galaana tau, gaari sibiila qaba, tanaafi worri Yuda dabsachu dad'abe.

²⁰ Akuma Musani jed'e dira Hebroni Kalebuti kennani. Duuba Kalebuni balbala gosa Anaki sadeeni taani dira suni keesaa gusse.

²¹ Ammo worri gosa Benjamini worra gosa Yebusi, ka Yerusalemu keesa jiru, keesaa ingussine. Ammalle worri Yebusi haga arrale worra Benjamini woliini taani.

Aka gochiti Efraimutifi ta Manase dira Betheli dabsate

^22-23 Gochiti Efraimutifi ta Manase kaate dira Betheli, ka duri Luzu jed'ani, had'u d'at'e. AABBO Waaqi worra qarqaare worri dooya erge,

²⁴ dooyaani suni nama dira suni keesaa bahu argite waan jetteeni, Fulla dira Kanaanitini seenani nuti himi, woma si intolchinu.

²⁵ Jennaani inni worra garsiise, duuba worri Efraimutifi ka Manase nama dira suni keesa jiru ch'ufa fit'e, namicha sunifi worra isaa male.

²⁶ Eegi suni inni lafa worra Hiti d'aqe achiti dira jaarate maqa Luzu iti baase, diri suni haga arrale maquma suni qaba.

Worra worri Israeli lafa worra keesaa ingussini

²⁷ Gochiti Manase worra dira Beth-Shani, Taanaki, Dori, Ibleamu, Megidofi dira d'aatu suni jiru ch'ufa keesa tau keesaa ingussine; worri Kanaani achuma taa.

²⁸ Worri Israeli jabaate irre argate jennaani, worra Kanaani irreeni hojachiifate, ammo tatule worra ch'ufa dira suni keesaa ingussine.

²⁹ Gochiti Efraimu worra Kanaani ka dira Gezeri keesa tau keesaa ingussine, duuba worri Kanaani suni achuma worra woliini tae.

³⁰ Gochiti Zabuloni worra dira Kitronifi Nahalali keesa tau keesaa ingussine, duuba worri Kanaani achuma worra woliini tae, worra irreeni hojachiifataani.

³¹ Gochiti Asheri worra dira Aka, Sidoni, Alabu, Akzibu, Helba, Afekafi Rehobu keesa tau keesaa ingussine.

³² Worri Asheri worra Kanaani ka qara achi jiru lafa keesaa ingussine wolumaani taani.

³³ Gochiti Naftali worra dira Beth-Shemeshifi Beth-Nathi keesa tau keesaa ingussine. Worri Naftali worra Kanaani ka qara achi jiru woliini taani ammo irreeni worra hojachiifate.

³⁴ Gochiti Amori gosa Dani lafa gaareeniti irreeni deebifte, diidati gabuu d'owarte.

³⁵ Worri Amori Ayalonifi Shaalbimufi gaara Heresi qubate, tae, ammo gochiti Efraimufi Manase worra mohatte, irreeni hojachiifate.

³⁶ Sela gama mirgaa seeri gosa Edomu kaarra Akrabimu keesa bahe.