Isaya 7 - KITAABA WAAQA

¹ Gaafa hayyuuni Ahazini, ilma Yothamu, ka akhaakhu Uzia, lafa Yuda mohate, hayyicha Shamu ka Resini jed'anifi, hayyichi Israelii ka Peka ilma Remalia jed'anileeni, d'ufani dira Yerusalemu had'ani, ammo dabsachu dad'abani.

² Qonqooni hayyu Yudati d'ufte waan jette, Worri Shamu yayu worra Efraimutini wold'aqe. Jennaani isaafi worri isaa ch'ufti aka male nahe, aka bubbeeni mukha chochooftu chochoe.

³ AABBO Waaqi waan Isayaani jed'e, Ilma kanke Shea-Yashubu fuud'i, hayyu Ahazi argu d'aqi. Atini isa fulla nami woya mid'aasu hojatu ta muumme fulla bisaani harotiini yaaniti agarta.

⁴ Duuba waan jettuuni, Eegad'i, irifatiini, yokhaani sodaate imudamiini. Dallansuuni hayyu Resiniitifi worra isaa ka Shamutifi hayyu Pekaleeni, aara mukha lama iraa bahu ira injirtu.

⁵ Worri Shamutifi ka Israelitiifi hayyuuni worraleeni ya woliini malatani.

⁶ Worri lafa Yuda had'e nama mudamsiise, ilma Tabeeli hayyu worraa tolcha.

⁷ Ammo anini, AABBO Waaqi, wonti sunini intaatu jed'a.

⁸ Maafi akasi taati; wonti isiini akasi taatuufi, Shamuuni dira Damaski ira injirtu, diri Damaskileeni hayyu Resini ira injiru. Ganna jaatami shani keesati worra Israeli firfirsani balleesani, harka gosa d'ibi keesati bula.

⁹ Worri Israelii worra Samariaa ira injiru, worri Samariaa hayyu Peka ira injiru. Yo d'ugefachaani tante irre inqamne atini jabeennaani inteetu.

Akheekha Imanueli

¹⁰ Ammalle AABBO Waaqi Ahazini dubbate waan jed'eeni:

¹¹ AABBO Waaqa kanke kad'ad'i, Akheekha naa kenni jed'iini. Akheekhi sunini ha boola ekheraati d'ufuti yokhaani gubba d'ufuti.

¹² Ahazini waan jed'eeni, Anini akheekha naa kenni jed'e AABBO Waaqa inilaalad'u.

¹³ Suni gula Isayaani waan jed'eeni, Amma ch'aqasi, atini ka worra Daudi keesa d'alate. Atini aka obsa nama d'owarte Waaqale obsa d'owu feeta?

¹⁴ Duuba amma AABBUMA Waaqati akheekha sii kenna: intalti dubra garaachoofte, ilma deete, maqa isaa Imanueli baaftiifi.

¹⁵ Gaafa inni guddate, mirgaafi bita gargari hubate, nami gaafasi aanani d'uge damma nyaata.

¹⁶ Ato guyyaani sunini ingeenne, lafti hayyoota lamaani si mudamsiiftu sunini badde ona taati.

¹⁷ AABBO Waaqi siifi worra kanketifi gosa tantele guyya gaargala hama, ka haguma gaafa hayyuma Yudatifi ka Israeli gargari baasani takaa inargini itiini d'ufa, gaargala suni hayyu Ashuruti worratiini d'ufa.

¹⁸ Guyya gaargali sunini d'ufu, AABBO Waaqi worra Misirii fiiquuni gayaame, worri aka tiite muumme galaana Misiriti gabaafate, worri Ashuruleeni aka tuuta kinniisaa d'ufa.

¹⁹ Worri sunini ch'ufti d'ufe, baleefi goda ke qubate, mukha qoraatitiifi lafa horiini keesa oolule ch'ufa guuta.

²⁰ Guyya suni AABBO Waaqa nama mata isani ira haadu Efrati gama suni d'ufani — hayyicha Ashuru! Inni areedafi rifeensa matatiifi ka nafa ch'ufa isani ira haada.

²¹ Gaafasi nami saa tokoofi lalleesa lama qabuleeni

²² aanani quufe ititule d'uga. Nami woraana suni jalaa bahe dammafi ititu sorata.

²³ Gaafasi oobruuni zabibu, ta mukha kuma toko qabdu, ta gatini isiileeni qarsi kuma toko, mukha qoraatitiifi mogore ch'alla taati.

²⁴ Nami t'iyaafi guubeeni oobruu suni keesaa adamo yaa, waan lafti raasa qoraatitiifi ta mogore taateefi.

²⁵ Ammalle gaareeni duri qotani sagale irati oobratani mukha qoraatitiifi mogore baafti nami deebie achi imbahu. Gaareeni sunini oolmuma loonitifi ta ree ch'alla taati.