Isaya 66 - KITAABA WAAQA

¹ AABBO Waaqi waan jed'u, gubbaani barch'uma kiyya, lafti fulla anini miila d'ad'abad'u. Mani isani naa jaartani me re? Fullaani anini hafuura iti baafad'u eesa taati?

² Nami lafafi gubba uume anumaniti? Nami anini iraa gammadu, nama ufi diqeese ch'ubbu lakise, na sodaate naa saalfatu.

³ Nami woma fed'u taha. Wonti ch'ufti worraa waan tokotu, ato jibicha korma sorio baasani, yokhaani nama sorio baasanile; ato ilmaani hoola qalani, yokhaani sare morma ch'absanile; ato mid'aani Waaqaa baasani, yokhaani d'iiga booyye d'ibaayu baasanile; ato hit'aana aarsani, yokhaani waan harkaani boch'ani kad'atanile. Worri aada hamtu akana, ta waaqaani kad'atani tana, tolfate iraa gammada.

⁴ Tanaafi anini badi worri sodaatu itiini d'ufa wonti akanatiifi hojja anini worra yaamu, nami na jalaa owaatu injiru, hojja anini dubbad'ele nami na ch'aqasu injiru. Worri waan hamtu tahe waan na ingammachiimne gula bahe.

⁵ Isani worri AABBO Waaqa saalfate isa sodaatu, waan inni jed'u ch'aqasa: Waan isani nama kiyya taatanifi, nami keesani ka gari isani jibbe, isani hanqata. Worri isani goyeese waan jed'u, AABBO Waaqi ha guddinna ufi isani agarsiise isani baasu, aka nu akasiini gammada keesani agarru. Ammo worruma akasi jed'u suni ch'eersani!

⁶ Ch'aqasa! Iyyanti dira keesaa d'uftu, yokhaani lalabi Mana Waaqa keesaa d'ufu sunini qonqo nyaapa AABBO Waaqi haalo baafatuti.

⁷ Diri kiyya qulqullooni niiti tassa, ato ilmaani iti ineejatini d'altu fakaata.

⁸ Nami taka waan kana arge d'agaye injira? Gochiti guyya tokooni d'alate injirti? Sionini akuma ilmeeni iti ejateeni yoosu d'alti.

⁹ Waan anini gumi tiyya fulla d'alaatini d'ufe d'alu d'owu seetu? Dubbibbi suni AABBO Waaqati jed'e.

¹⁰ Yerusalemu woliini gammada; isii jed'a, gammada, isani nami isii jaalatu ch'ufti! Ammatana woliini gammada isani worri qara isii bohe ch'ufti! Akuma daimi haad'a ufi hod'e quufu,

¹¹ isanileeni waan isii keesaa baha d'uddani quuftani.

¹² AABBO Waaqi waan jed'u, Anini hormaata haga jiru jireennatini isii d'ufe, hormaati gosa ch'ufaa akuma laga yae inch'inne isaniti yaa. Isani daima haati hoosifate hamparte ufirati sirbisiftu fakaatani.

¹³ Yerusalemu keesa, anini akuma haati ilmaani ufi tabsiifte bohu d'owartu, isani tolcha.

¹⁴ Hojja waan kana ka tahe gartani, gammaddani fayyaafi jabeenna argattani. Duuba aka anini, AABBO Waaqi, nama naa saalfatu qarqaare nyaapa kiyyati dallanu, beetani.

¹⁵ AABBO Waaqi ibidaani d'ufe, gaarini inni yaabatu aka bubbe utaale, inni nama iti dallane gaargalcha.

¹⁶ Inni ibidaafi goraadeeni nama lafa ch'ufa keesa jiru, ka wollaala qabu, gaargalcha — nama heddule infit'ani.

¹⁷ AABBO Waaqi waan jed'u, worra ufi qulqulleese, aada hamtu waaqoota d'ara tolfate, oobru woyyuti wolgula yae, booyyeefi hantutafi sagale t'uri d'ibi nyaate, muummeeni worra ya d'iaate.

¹⁸ Anini heregaafi huji worra imbeekha. Duuba anini d'ufe nama gosa ch'ufa wolti baasa. Worri yo wolti d'ufe, waan irreeni tiyya tolchu dandeetu arge,

¹⁹ aka nami worra gaargalchu anuma beekha. Ammo anini worra nama haga gari lakise, gosafi lafa fago, ta gurra kiyyaafi jabeennaafi guddinna kiyya ind'aagayiniti erga: lafti suni Tarshishi, Libia, Ludi ta nami isii t'iyole ammalle Tubalifi Yavani. Duuba gosa tana keesa worri guddinna kiyya odeesa.

²⁰ Worri nama gosa teesani ch'ufa gosa d'ibi keesaa galche naa kenna. Duuba fardaafi gaangeefi gaalafi gaarini gaara kiyya qulqullo Yerusalemutini d'ufani, akuma worri Israeli mid'aani Waaqaa baasani miha woyyuti naqe mana Waaqatini d'ufu.

²¹ Anini worra suni haga gari qaaloleefi worra Lawi tolcha.

²² Ammalle AABBO Waaqa waan jed'e, Akuma gubba haaraafi lafti hareetini jabeenna kiyyaani teetu, akasuma d'alootafi maqaani keesani taa.

²³ Jila baatitiifi ta Sabato ch'ufa nami gosa ch'ufaa wolti bahe arma Yerusalemu keesati na kad'ata.

²⁴ Worri hojja galu, reefa worra na dide arga. Raamooni worra nyaatu haguma jirtu indootu, ibidi worra gubu haguma jiru ind'aamu. Reefa suni nami ch'ufti ilaani jibba.