Isaya 58 - KITAABA WAAQA

¹ AABBO Waaqi waan jed'u, Lalabi, aka magalata iyyii! Worra kiyya ka Yakobo, wollaalafi ch'ubbu worri tolche iti himi!

² Worri guyya ch'ufa na kad'ate waan jed'u, Nu kara kanke barbaanne, seera kanke guutu feena; nu seera d'uga siraa feena, ammalle sileeti d'iaachu feena.

³ Biyyiti waan jettu, Nu maafi ufi agabsina, ka AABBO Waaqi waan suni nuu ingarre? Nu maafi sagale nyaachu dinna, ka inni nu iyyaalle? AABBO Waaqi waan worraani jed'u, Wonti anini akasi tahefi, waan isani guyya ufi agabsitani suni, fed'i teesani gula yaatani nama isanii hojatu dabsitanifi.

⁴ Hojja isani ufi agabsitani suni, isani wolti kaatani harkaani woli geetani lafaa woli balleesitani. Isani waan, yo isani kara kanaani ufi agabsitani, anini kad'acha teesani d'agayu seetani?

⁵ Isani hojja ufi agabsitani, ufumaa mata keesani aka ilaadu dadabsitani ch'arqifi daara keesa ch'iiftani ufi gaargalchitani. Agabuuni d'ugaa ta isani baantani suni? Isani waan anini waan suni jaalad'u seetani?

⁶ Ufi agabsitini d'ugaa ta anini jaalad'u tana: sansalata isani namaani dabsitanifi qaampara isani namaani d'owartani balleesa, nama isani dabsitani gad'iisa.

⁷ Sagale teesani nama beela qabuu kenna, hiyyeesa mana inqamne mana keesani bana. Nama qulla yau woya kenna, fiit'a teesani qarqaaru indidina.

⁸ Duuba yo isani akasi taatani, eebiti tiyya aka adu ganama isanii ifsite mada teesanile yoosu fayyisani. Anini hojja ch'ufa isani woliini tae isani baase gama ch'ufa isani qorqorad'a.

⁹ Hojja isani na kad'attani isani d'agaye, hojja isani na yaamatani isani jalaa owaad'a. Yo isani dabsiti nama dabsitani lakiftani, quba namati qabdanifi tufi nama tufatanifi dubbi hamtu namaani jettani yaalabatani;

¹⁰ ammalle nama beela qabu quubsitani, nama gaargala qabu, gaargala keesaa baaftani, dukanti isani marsitu tunini garagagalte ifsa guyyaa taati.

¹¹ Aninileeni hojja ch'ufa isani dura deeme waan dansa isani quubse isani jajabeese fayya isanii kenna. Isani aka oobru bisaani quufte taatani maddo haguma jirtu ingonne fakaatani.

¹² Worri keesani dira bade ona tahe kaani yayabuma isa ka duri kaani irati jaara: duuba akanaani worra naabo ch'abt'eefi maneeni badde jaare isaniini jed'ani.

Waan nami Sabato, guutu argatu

¹³ AABBO Waaqi waan jed'u, yo isani guyya Sabato aka guyya qulqullo hereddani huji teesani guyya suni tolchu diddani guyya kiyya qulqullo sunini dansa jettani ulfeesitani imaltufi hujifi haasaa woma imbaane guyya suni lakiftani,

¹⁴ gammada nami na hojatu argatu argattani. Lafa ch'ufa keesa ulfinna isanii kenne, isanileeni lafa anini abba keesani Yakobo kenna taani maachitani. Dubbi tana ana AABBO Waaqati jed'e.