Isaya 52 - KITAABA WAAQA

¹ Ee Yerusalemu, lafaa kai, garaa jabaad'i! Ee dira qulqullo, woya mid'aadu keeyad'i! Worri Waaqa imbeenne, ka aada inqamne, deebie fullo teetiini oli inseenu.

² Ee Yerusalemu, kai awaara gingilafad'i, barch'uma kanke ka hayyuma ira tai. Ee worra Sioni ka boojiani, sansalata isaniini hid'ani ufiraa fura!

³ AABBO Waaqi waan gumi ufitini jed'u, gaafa tisse isani tolchani, beese male isani fud'atani, akasuma beese male gadi isani d'iisani isani balchoomsani.

⁴ Gaafa isani lafa Misiriti godaantani achi teetani kaani, isani fed'uma teesanini achi d'at'ani; ammo worri Ashuru, beese male, irreeni isani fud'ate.

⁵ Amma tana, AABBO Waaqi waan jed'u, wonti tahe kunini maani? Isani nama boojiani, beese male isani fud'atani. Worri isani mohatu hojja ch'ufa ufi guddise kiyyibe na tufata.

⁶ Takaa tana isani aka anini Waaqa hubattani, ammalle aka anini isaniini dubbad'ele barattani.

⁷ Miili worraa odu dansa nagaya odeesu akami mid'aaga! Inni baafama odeese waan Sionini jed'u, Waaqi kanke hayyu lafa mohatu!

⁸ Worri lafa eegu gammaddani wolti lalaba. Worri iluma ufitini aka AABBO Waaqi Sioniti deebiu arga!

⁹ Lalabi, sirbi, ona Yerusalemu! AABBO Waaqi dira ufi baase gumi ufi jabeesa.

¹⁰ AABBO Waaqi irre ufi qulqullooni gumi ufi baasa, duuba waan suni lafti ch'ufti inargati.

¹¹ Kaa! Kaa! Armaa yaa, isani worri miha Mana Waaqa baatu! Waan qulqullo intahini tokole intuqina; ufi qulqulleesa, kaa, yaa.

¹² Isani hurre yaatani imbaqatanile. AABBO Waaqi keesani isa dura deeme, moga ch'ufa isani qorqorata.

Hojattu gaargalchani

¹³ AABBO Waaqi waan jed'u, Hojatu tiyya hujiini isa ch'ufti ineebifamti isa guddo ulfeesani guddinna iti kennani.

¹⁴ Nami hedduuni isa arge mame afaani qabata. Fuuli isaa aka iraa gore namale infakaatu.

¹⁵ Ammo ammatana gochiti hedduuni waan isa mamte, hayyootileeni waan dubbatu d'abde afaani qabatti. Worri waan takaa imbeekhini arge hubata.