Isaya 51 - KITAABA WAAQA

¹ AABBO Waaqi waan jed'u, Isani ka baafama barbaada nati d'uftani, na ch'aqasa. D'akha isani keesaa baatanifi boola isani keesaa qotani qaabad'a.

² Ababo keesani Abrahamufi Sara ta isani d'alte qaabad'a. Gaafa anini Abrahamu yaame inni ijoolle inqabu, ammo anini isa eebise, ilmaani kenneefi daraarse.

³ Anini Yerusalemufi nama ona isii suni keesa taule, innaha. Ato lafti isii badde raasa taatele anini oobru tolcha, akuma oobru duri anini Edeniti oobre taani. Gammadafi qilit'ama achiti argani faaru na faarsani galata naa deebisani.

⁴ Gumi tiyya, na d'agaya, waan anini jed'u ch'aqasa. Anini gosa ch'ufa barsiise seeri kiyyaleeni ifsa worraa taha.

⁵ Anini hurrise d'ufe worra baasa, baafami kiyya d'io jira. Amumati harka kiyyaani gosa ch'ufa fida. Lafti fago na eedde irre tiyya abdatti.

⁶ Gubba millad'a, lafale ilaala! Gubbaani aka aara badde, laftileeni aka woya ch'ich'ite, nami isii aka tiite hobaa. Ammo baafami, kiyya haga jiru jireenna taa, d'ugaani tiyya haguma jirtu imbaddu.

⁷ Isani worri d'uga beekhu ka seera kiyyaa qalbi keesaa qabu, na ch'aqasa. Hojja nami arabse isani miid'e insodaatina,

⁸ worri akuma waan raamooni nyaatte bada. Ammo d'ugaani tiyya haga jiru jireenna teete, baafami kiyya haga d'aloota ch'ufa taa.

⁹ AABBO Waaqa, kai, nu qarqaari, harka keetiini nu baasi, akuma atini duri tolchite. Nami goorjama Rahabu jed'ani gargari ch'ire siiniti?

¹⁰ Nami baariini gosse, kara bisaani ke baase, worra atini baasuu jirtu taakisiise siiniti?

¹¹ Nami atini baafte, gammadaani dira Yerusalemuti deebie sirbe qilit'ama. Worri haga jiru gammada, deebie bohe ilaalefatu.

¹² AABBO Waaqi waan jed'u, Nami isani jabeesu anuma isani maanifi nama sodaattani, ka inni buuyo ira ingoomne?

¹³ Isani AABBO Waaqa ka isani uume gubba dirirse, lafale yayabe ya deetani? Isani maanifi hojja ch'ufa dallansu nama isani dabse isani balleesu fed'u sodaatani? Dallansuuni worraa ammatana dandeete woma isani intolchitu.

¹⁴ Nama hid'aansa keesa jiru d'iotu gad'iisani, worri lafa irati lubbu bule sagale quufa.

¹⁵ Anini AABBO Waaqa keesani, ka baariini chochoose, d'awa isii dibbisise. Maqaani kiyya AABBO Waaqa gudda!

¹⁶ Anini gubba dirirse lafale yayabe. Waan anini worra Yerusalemutini jed'u, Isani gumi tiyya! Anini yayu isani barsiise harka kiyyaani isani qorqorad'e.

Muumme gaargala Yerusalemu

¹⁷ Ee Yerusalemu damaqi, kai oli eji! Atini muduunu AABBO Waaqi dallansuuni sii kenne ya d'udde fooqifte, machoofte dadat'eeni.

¹⁸ Nami siini deemu injiru, worra kanke keesa nami harka sii qabu injiru.

¹⁹ Gaargali hamani yayu aka lama siti d'ufe: lafa tante yayu woraani qabate beelti balleesite. Nami sii nahu tokoleeni injiru.

²⁰ Nami kanke kara ch'ufa keesati gagagabe aka hiddi t'ururaani qabani taha. AABBO Waaqi yayu worrati dallane worra balleese.

²¹ Worra Yerusalemu ka gaargali qabate, aka waan farso d'uge dadaaqu,

²² AABBO Waaqi keesani isani kalche waan isaniini jed'u, Anini muduunu dallansuuni isani kenne taani isani iraa fuud'a, isani deebitani daad'i isani macheesite taani ind'uddani.

²³ Anini muduunu suni worra isani dabse kara keesa isani ch'iifsise, aka awaara isani ira ejaanjate kenna.