Isaya 50 - KITAABA WAAQA

¹ AABBO Waaqi waan jed'u, Isani waan anini gumi tiyya, aka niiti d'iirsi ufi jalaa baasu, ufi jalaa baasu seetani? Yo akasi taate tatabeeni anini ufi jalaa baaseni meeti? Isani waan anini harka nama isani boojieti isani gurgure seetani? Akuma nama ilmaani ufi tisoomaa gurguru. Hiyo akasiniti, maro daba keesanitifi isani boojiani, maro ch'ubbu teesaniifi ufi jalaa isani baasani.

² Gaafa anini gumi tiyya baasu d'ufe, worri maafi na jalaa dide? Anini yaame jennaani worri maafi inowaatini? Anini irre worraani baasu inqabu? Anini dandae jechaani baariini gosse, galaana gamooji tolche, qurt'umini keesati galtuleeni bisaani d'abde hobaati.

³ Anini dandae gubba dukaneese akuma nama nama due bohu tolcha.

Aka hojattuuni AABBO Waaqa isaa saalfatu

⁴ AABBO Waaqi guddaani yayu araba na qajeelche, aka anini nama dad'abi qabu dubbi t'iyaani jabeesu. Diirama ch'ufa inni na kaase, aka anini waan inni na barsiisu fed'u ch'aqasu.

⁵ AABBO Waaqi yayu gurra kiyya bane aninileeni isati garagale isa indinne.

⁶ Anini nama na d'aanu ufiti lakise, nama na arabse, areeda na hirkise hanchufa fuulati na tufe, ufira ind'owine.

⁷ Ammo arabi worraa woma na intolchu, waan AABBO Waaqi guddaani na qarqaarufi. Anini garaa ufi jabeese araba suni ch'ufaa obse. Anini imbeekha, naa inch'eersani,

⁸ wonti akanatiifi Waaqi ka na kalchu d'aatu tiyya jira. Nami dandae gaadisati na geese na himatu eenu? Dubbini teenna ha jaarole dura d'at'u! Inni ha himatuti!

⁹ AABBO Waaqa guddati na qarqaara eenuti dandae wollaala nati mura? Nami na himatu ch'ufti imbada, akuma woya bilaachi nyaate balleesu.

¹⁰ Isani keesaa nami AABBO Waaqa sodaate dubbi hojatu isaa saalfatu, ka ifsa male dukanaani deemu, ka maqa AABBO Waaqa abdate, Waaqa ufi d'aabbatu eenu?

¹¹ Isani ch'ufti ka ibida bobeesitani nama d'ibi balleesu feetani, karuma isani namati malatani suniini isani balleesani, AABBUMA Waaqati waan kana tolcha; isani badi hamtu argattani.