Isaya 41 - KITAABA WAAQA

¹ Waaqi waan jed'u, Isani worri lafa fago, ch'allisa, na ch'aqasa! Waan dubbachuu feetani kurfefad'a; koota, dubbad'a. Koota, wolwoldeenne, nama d'uga qabu ilaala.

² Eenuti nama wo had'u ilaboruuti ga kaase fulla inni bahe ch'ufa dabsacha keennafi? Eenuti hayyootafi gosale ch'ufa isa dabsachiisa? Inni goraade ufitini worra d'ae bulleese, t'iya isaatini aka bua buuyo qilleensati firfirsa.

³ Inni hordofe reebe, ka miili isaa aka waan barisu jiru nagayaani worra d'aqaba!

⁴ Eenuti waan kana tolchisise d'aloota qara dabre ch'ufa ga yaama? Anini, AABBO Waaqi, gaafa uumama injira, ammalle gaafa muummele inuma jira.

⁵ Worri lafa fagoleeni waan anini tolche arginaani mudame holate, wolti bahe ga d'ufe.

⁶ Hogeeyileeni wolqarqarte garaa woljabeesiti.

⁷ Hogeesi mukha boch'u nama worqi tumu garaa jabeese, namichi burrisaani wo qulqulleesuleeni nama tuubo irati wo tumu garaa jabeese waan jed'uuni, saldaqaani baqu kunini dansa. Duuba inni waan mid'aasani woltid'ise chochou d'owa.

⁸ Ammo isani, worri Israeli hojatu tiyya, gumi anini fohad'e, ta d'aloota Abrahamu ka jaala kiyya.

⁹ Anini muumme lafati isaniini d'ufe moga lafa fagooti isani yaame waan isaniini jed'e, Isani hojatu tiyya. Anini isani indinne, ammo isani fohad'e.

¹⁰ Tanaafi insodaatina, anini isani woliini jira! Anini Waaqa keesani wonti tokoleeni isani imudansisini! Anini isani jabeese isani qarqaare, irre isanii tahe harka kiyyaani isani baasa.

¹¹ Nami dallansu teesani qabu ch'eeraani dua, nami isaniini morku due lafa iraa bada.

¹² Ato nyaapa keesani barbaadanile inagartani; nami isani had'uleeni dandae woma isani intolchu.

¹³ Anini AABBO, Waaqa keesani; harka mirgicha isani qabe, waan isaniini jed'u, Insodaatina, isani qarqaara.

¹⁴ AABBO Waaqi waan jed'u, Israeli isani ato diqo muyole taatanile insodaatina; anini isani qarqaara. Nami isani baasu anuma, Waaqa qulqullo Israeli.

¹⁵ Anini waan woini daakhani, ka ilkaani haareesa aka male qara qaba qabu, isani tolcha. Duuba isani gaarale ch'ach'absitani balleesitani kubile bulla tolchitani.

¹⁶ Duuba isani qilleensati oldarbitani, qilleensi fuud'e, bubbeeni gargari firfirsiti. Duuba isani waan anini Waaqa keesani tahefi gammaddani ana, Waaqa qulqullo Israeli, faarsitani.

¹⁷ Hojja hiyyeesi d'ipu qabu bisaani barbaade d'abu, ka lubbuuni isaa d'eebuuni gogodde, anini, AABBO Waaqi, kad'acha worraa d'agaya; anini Waaqi Israeli deebie worra illakisu.

¹⁸ Anini gaara gubbaani isaa adaala ira galaana yaase, baleele maddisiisa, anini lafa gamooji haro bisaani tolche, lafa goddule madda bisaani tolche.

¹⁹ Anini hind'eesafi d'adachafi qilt'afi ejersa lafa gamoojiti baasa. Adaala lafati anini badda mukeeni dodoti d'ed'eertu gosa sadii qabdu baasa.

²⁰ Nami waan kana arge imbeekha, aka anini AABBO Waaqi akasi tolche. Ammalle aka Waaqi qulqullooni Israeli waan suni tolche inhubatani.

Aka AABBO Waaqi, waaqa d'ara goyeesu:

²¹ AABBO, Waaqi hayyuuni Israeli, waan kana jed'a. Isani waaqoota gosa d'ibi, dubbi qabdani dubbad'a. Waan jechu feetani jed'a!

²² Arma koota, waan takaa tana taha nuti hima, aka duuba yo isiini taate nu beennu, waan duri tahe nu beesisa, waan isiini jettu nuti hima.

²³ Waan takaa tana nuti hima, duuba aka isani waaqoota sunini beenna! Waan dansa tolcha, yokhaani waan hamtuuni gadi koota; nu sodaachisa, nu mudamsiisa!

²⁴ Isanifi wonti isani tolchitanileeni woma keesa injirtani; nami isani kad'atuleeni kara badii keesa jira!

²⁵ Anini namicha ilaboru tau toko fohad'e, lafa mirgaa haasisa. Inni hayyoota aka d'oqe ira ejaanjata, aka nama okote faara mid'aasu ka d'oqe d'id'itu.

²⁶ Isani keesa, eenuti wonti sunini intaati jed'a, aka nu dandeenne inni d'uga dubbate jennu? Nami akasi jed'u injiru, nami tokoleeni ka waan isani jettani d'agaye injiru!

²⁷ Nami qara odu Sioniti odeese ana AABBO Waaqa; anini qonqo Yerusalemuti erge waan jed'e, worri kanke ya gale, kuno gad'ufu jira.

²⁸ Anini waaqoota d'ara suni millad'e. Worra, nama tokole ka wo jed'u, d'abe. Worri nami tokoleeni ka waan anini gaafad'e nati himu injiru.

²⁹ Waaqooti akana kunini ch'ufti woma keesa injirtu; isiini dandeete woma intolchitu — irreefi jabeenna womatu tokole inqabdu.