Isaya 36 - KITAABA WAAQA

¹ Ganna kud'ani afreeso ka Hezekiani lafa Yuda mohate, Senakeribuni, hayyuuni Ashuru dira Yuda ka jabeesani jaarani ch'ufa had'e dabsate.

² Jennaani inni namicha gudda askarti isaatini waan jed'e, Lakishi deemi, askarti heddu fud'ad'i, Yerusalemu d'aqi, hayyu Hezekiani booju kad'ad'i jed'i. Namichi kaani kara worri woya mid'aasu keesa tau, ka d'aatu fulla bisaani haro keesaa diratini yaani ejate.

³ Jennaani nami sadi ka gosa Yuda iti ga d'ufe: Eliakimuni ilma Hilkia, ka gudda mana hayyu; Shebna ka tatabe hayyu t'aafufi Yoa, ilma Asafu, ka waan t'aafani olikaayani ch'ufa harkaa qabu.

⁴ Namichi Ashuru guddaani kaani waan jed'eeni, waan isani Hezekiani jettani, Hayyuuni Ashuru waan jed'u, maanti akana garaa jabeese ufi si d'ugefachise.

⁵ Atini waan dubbi tanteetiini hoguma woraanaa dabsatu seeta? Amma eenuti si qarqaara, male keeti, ka atini hayyu Ashuru didde?

⁶ Atini, mala keeti, waan worri Misiri si qarqaaru seeta? Ammo mali sunini nama ilaadu ule sehe yo inni lafati d'aabu ch'abt'e harka woraantu fakaata. Aki hayyuuni Misiri nama isa abdatu tolchu akasi.

⁷ Ammo yo atini, AABBO Waaqa keenna abdanna nani jette; nami fulla Waaqa iti kad'atani sorio irati baasani balleese Hezekianiti? ka ammalle garagale worra Yerusalemutifi ka Yudatini, fulla sorio irati baasani ta Yerusalemu ch'allati Waaqa kad'ad'a jed'e.

⁸ Amma kooti, hayyu keenna ka Ashurutini waan taka woliini taha: Anini fardoole kuma lama sii kenna, yo atini dandeete nama hagasi ka Yubatu naa kennite.

⁹ Atini akami dandeete hojatu abba kiyya didiqo woma keesa injirale d'owarta, ka ufiftu waan worri Misiri gaarifi askarti farda sii kennu seetu?

¹⁰ Atini waan anini qarqaarsa AABBO Waaqa male lafa teesani had'e balleese seeta? AABBO Waaqati, Beeni, lafa suni had'i balleesi naani jed'e.

¹¹ Jennaani Eliakimufi Shebnafi Yoani waan namicha gudda kaaniini jed'ani, AABBO afaani Aramutini nuti dubbad'i, ind'ageenna, afaani Ebrania nuti indubbatini, nami d'aatu teenna ch'iisu kunini ch'ufti nu d'agaya.

¹² Inni waan jed'eeni, isani waan hayyichi Ashuru isanifi hayyu keesani ch'alla qonqo tana iti erge seetani? Hiyo akasiniti, anini gumi arma teteetu tana, ta eegi tana finch'aanifi udaani ufi akuma keesani sooratuti dubbachuu jira.

¹³ Jennaani namichi guddaani sunini afaani Ebraniatini lalabe waan jed'e, Dubbi hayyuuni Ashuru isaniini jed'u ch'aqasa!

¹⁴ Inni waan jed'u, Hezekiani isani insobini inni dandae harka kiyya keesaa isani imbaasu.

¹⁵ Inni, AABBO Waaqa abdad'a jed'e isani insobini. Waan AABBO Waaqi isani baase askarti Ashuru dira keesani iraa deebisu insehina.

¹⁶ Dubbi Hezekia inch'aqasina! Hayyuuni Ashuru waan isaniini jed'u, Nati koota, booju kad'ad'a. Duuba yo booju kad'attani, isaniini ch'ufti daad'i zabibu teesani d'uddani, mid'aani keesani ka oda nyaatani, madda teesani keesaa bisaani d'uddani,

¹⁷ haga anini lafa lafa teesani fakaatu, ta mid'aanifi daad'i qabdu ta qit'afi zabibu qabdu, keesati isani qufsisuuti.

¹⁸ Dubbi Hezekia ta inni, Waaqati nu baasa jed'e isani sobe suni ind'ugeefatina. Gochiti d'ibiini ta, waaqa kennati harka hayyu Ashuru jalaa nu baase jette injirti?

¹⁹ Waaqi Hamathitifi ka Arpadi me? Waaqi Sefarvaimu me? Waaqi suni tokoleeni ya Samaria harka kiyya jalaa baase?

²⁰ Waaqi lafa suni tokoleeni yoomi lafa ufi harka kiyya keesaa baase? Isani akami, ka waan suni ch'ufa quba qabdani, Waaqi Yerusalemu imbaasa jettani re?

²¹ Ammo biyyiti, akuma hayyuuni Hezekiani worraani jed'e ch'ach'alifte akanumati teteete.

²² Jennaani Eliakimufi Shebnafi Yoani laalefatani, woya ufi tatarsaasani, deemani waan namichi Ashuru kaani jed'e hayyu Hezekiati himani.