Isaya 10 - KITAABA WAAQA

¹ Isani la baddaani, worra waan d'uga intahini seera baase akasiini gumi tiyya dabse!

² Aki isani hiyyeesa d'uga d'owitani dabsitani balleesitani akana. Aki isani hori nad'eeni hiyyeeyitifi ka ilmaani hiyyeeyi saamtani guurattani akasi.

³ Guyya Waaqi gaargala isanitini d'ufu, maal taatani? Hojja inni lafa fagooti badi isanitini d'ufu, maal taatani? Nami isani iti baqatani qarqaarsa ira fed'atani eenu? Hori keesani eesati d'ofattani?

⁴ Wonti isanii hafe, aka isani hobaasani yokhaani boojiani ch'alla. Ato akasile taate dallansuuni AABBO Waaqaa isa ira ingaltu, inni harka ufii d'eerefate ammalle isani d'aanu fed'a.

Aka Waaqi worra Ashuru gaargalche

⁵ AABBO Waaqi waan jed'e, Anini worra Ashuru boku tolfad'e nama anini iti dallaneeni d'aana!

⁶ Anini gosa Waaqa imbeenne ta na dallansiftuti erga, aka worra hatani saamani akuma huura kara keesati ira ejaanjatani.

⁷ Ammo hayyichi Ashuru mala ufii ka woini yakuu qaba, inni aka gosa d'ibi balleesu ya kutate.

⁸ Inni kiyyibe waan jed'u, Jari askarti tiyya gugurdaani ch'ufti hayyu.

⁹ Anini dira Kalnotifi ka Karkemishitifi ka Hamathitifi ka Arpaditifi ka Samariatifi ka Damaskile had'e dabsad'e.

¹⁰ Anini harka kiyya d'eerefad'e, lafa waan harkaani boch'ani kad'atu, ta wonti kad'atani sunini ta Yerusalemutifi ta Samariale ira heddu, gaargalchuu fed'e.

¹¹ Anini Samariafi waan harkaani boch'ani kad'atanile ya balleese, Yerusalemufi waan boch'ani ka achiti kad'atanile akasuma tolcha.

¹² Ammo AABBO Waaqi waan jed'u, gaafa anini huji tiyya gaara Sioni gubbafi Yerusalemu keesale hobaasu, anini hayyu Ashuru ingaargalcha, waan inni akasi kiyyibe ufi olfuud'eefi.

¹³ Hayyichi Ashuru kiyyibe waan jed'u, Anini waan kana ch'ufa irruma tiyyaani tolche; anini jaba ammalle qaroo. Anini seera jiddu lafaa deeme lafa gosa gosa gargari baasu balleese, waan worri olikeyate ch'ufa boojie, aka korma looni nama achi tau ch'ufa ira ejaanjad'e.

¹⁴ Gochiti lafaa mana simpirre fakaati, duuba anini waan worri qabu akuma okhokaani guurani gaargala male guura. Wonti barisa tokoleeni na insodaachimne, yokhaani wonti afaani qaba tokoleeni nati iniyyine!

¹⁵ Ammo AABBO Waaqi waan jed'u, D'agaraani, Anini nama naani hojatu ira jira ufiini injed'a? Wonti woini murani nama woini muru ira jirti? Bokuuni nama oli infuud'u, namati isa olifuud'a male.

¹⁶ AABBO Waaqi guddaani nama nyaachisa nyaatu, d'ukuba iti buuse gaargalcha; nafa worra ibidati keesa bobaa.

¹⁷ Waaqi ifsaani Israeli ibida tahe, Waaqi qulqullooni Israeli bobae, guyya tokooni waan ch'ufa gube balleesa, qoraatifi mogorele.

¹⁸ Badda guddofi oobru dadansale ch'ufa balleesani, akuma d'ukubi hamani nama balleesu.

¹⁹ Mukhi baddaa hobae tatakate, ijoolleleeni dandeete hedi.

Nama diqaati gala

²⁰ Guyyaani ind'ufa, ka worri Israeli ka hafe gosa worra diquma inhobaasini taani deebie inabdanne, ammo AABBO Waaqa Israeli qulqullo abdatu.

²¹ Worri Israeli, nama diqaati, Waaqa guddati deebia.

²² Ato amma tana worri Israeli heddu aka maansa galaanaa taatele, nama diqaati deebia. Baddi worraa malte ya hereganifi.

²³ Lafa ch'ufa keesa AABBO Waaqi guddaani badiini d'ufa, akuma inni duri jed'e kaani.

Aka AABBO Waaqi worra Ashuru gaargalchu

²⁴ AABBO Waaqi guddaani waan nama isaa ka Sioni keesa tauni jed'u, Worra Ashuru insodaatina, ato worri aka worri Misiri duri isani gaargalche isani gaargalchele.

²⁵ Bulti diqooti, dallansuuni anini isaniti dallanu naraa galti, duuba anini worra suniti dallane balleesa.

²⁶ Anini, AABBO Waaqi guddaani, licho tiyyaani worra d'aana, akuma duri worra Midiani d'akha Orebuti d'aane. Anini akuma Misiri gaargalche Ashurule gaargalcha.

²⁷ Hojja guyyaani sunini d'ufu, anini harka worra Ashuru keesaa isani baasa, qaampari worra deebie gurmu teesani ira intau.

Aka nyaapi wo had'u

²⁸ Duuli nyaapa yayu dira Ai dabsate, dira Migroni keesa dabre, miha ufii Mikmashiti olikeyate!

²⁹ Worri yayu kaarra bahe Geba bule! Worri dira Rama ya mudame, worri dira hayyu Saulo, ka Gebia jed'ani keesa jiru ya baqate.

³⁰ Worra Galimu iyya! Worra Laisha, ch'aqasa! Worra Anathothi jalaa qaba!

³¹ Worri Madmenatiifi ka Gebimu baqachu jira.

³² Arra nyaapi ya dira Nobu d'ufe, achiti tae, gaara Sioni ka dira Yerusalemu harka tontomate iti irbu jira.

³³ AABBO Waaqi guddaani irre isaatini, akuma dame mukha ch'irani, worra ch'ire lafa buusa, ka kiyyibe ufi olifuud'u murre gadi buusa.

³⁴ AABBO Waaqi akuma mukeeni garaa badda keesa d'agaraani ch'irani worra ch'ira. Akuma mukeeni Lebanoni dadansaani jiddu, worrileeni jiga.