Huji Ergattu 9 - KITAABA WAAQA

¹ Ammo Sauloni ammalle jara Aabbo rifachiise, aka gaargalchu herege. Inni gara Qaallicha Gudda d'aqe,

² tatabe isa iraa fud'ate, ta gara maneeni Waaqa iti kad'atani dira Damaskiti t'aafani, aka yo nama Kara Aabbo gula yau achiti arge, d'iirafi nad'eenile, hid'e Yerusalemu geesu.

³ Ato inni kara deemu, Damaskiti d'iaannaani, ifsaani gubbaa bahe isati ifse.

⁴ Inni lafati jige, qonqo toko d'agaye ta, Saulo, Saulo, atini maafi akana na gaargalchita? jetteeni.

⁵ Inni waan jed'eeni, Aabbo, atini eennu kana? Aabbooni waan jed'eeni, Anini Yeso kauma atini gaargalchitu.

⁶ Ammo kai, dira seeni, waan atini tolchu malte achiti siti himani.

⁷ Jari isa woliini yau akanumati ejaanje ch'allise, qonqo d'agayani male nama ingarre.

⁸ Sauloni lafaa kae, ila banannaani woma argu dad'abe, harka qabaniifi Damaskiini d'ufani.

⁹ Haga guyya sadi lafa ingarre, yokhaani nyaate ind'unne.

¹⁰ Nama Yeso tokoti dira Damaski keesa jira, ka Anania jed'ani. Daayya keesa Aabbooni isaani dubbate, Anania jed'e yaame. Inni waan jed'eeni, Anini kuno, Aabbo.

¹¹ Aabbooni waan isaani jed'e, Kai, gara Kara Qajeela jed'ani d'aqi, mana Yuda keesa, nama toko ka Saulo jed'ani, nama lafa Tarso, barbaadi. Inni Waaqa kad'achu jira.

¹² Ammalle daayya keesa inni la nama Anania jed'ani toko arge, ka harka isa ira kayu, aka inni lafa argu.

¹³ Jennaani Ananiani waan jed'e, Aabbo, anini ya nama heddu ira waan namicha kana d'agaye, aka inni gumi tante qulqullo Yerusalemu jirtu waan hamtu tolche.

¹⁴ Ammalle arma inni maqa qaalole gugurdotiini d'ufe, aka nama maqa kanke yaamatu ch'ufa hid'u.

¹⁵ Ammo Aabbooni waan isaani jed'e, Beeni d'aqi, anini yayu isa fohad'e, aka inni maqa kiyya gosa d'ibiifi hayyootafi ijoolle Israelile durati odeesu.

¹⁶ Anini gaargala gudda, ka inni maro maqa kiyyatiifi argatu, isa agarsiisa.

¹⁷ Ananiani d'aqe mana olseene, harka isa ira kaye waan jed'eeni, Aadda Saulo, Aabbo Yesoni, ka kara keesati siti mullate, ya na erge, aka atini lafa agarte Lubbu Qulqullooni guutamtu.

¹⁸ Maro tokotu wonti aka qola ila isaa iraa jidde, inni yoosu wo arge, kae batiso argate.

¹⁹ Duuba inni sagale nyaate jajabaate. Sauloni haga bulti diqo jara Yeso ka Damaski jiru, woliini tae.

Sauloni Damaski keesati hasaa

²⁰ Hojuma suni inni maneeni Waaqa iti kad'atani seene waan Yeso odeese, Yesoni Ilma Waaqa jed'e.

²¹ Ammo nami isa d'agaye ch'ufti mame waan jed'e, Kunini namicha nama maqa kana yaamatu, Yerusalemu keesati, ijeese kaaniyu? Ammalle wonti inni d'ufeefi, aka nama hid'e gara qaalole gugurdo geesu.

²² Ammo Sauloni haga qara ira jabaate, Yahudi Damaski teetu mamsiise, aka kunini d'uguma Kristo jabeese hime.

²³ Eegi bulti heddu, Yahudiini aka isa ijeeftu wolmariatte.

²⁴ Ammo Sauloni, aka worri isa eegu jiru, quba qaba. Kara dira halkani guyya eegani, aka isa ijeesani.

²⁵ Halkani toko jari isaa isa fuud'e sabaqa ke kaye, yaabdo iraani alati isa baase.

Saulo Yerusalemu keesa

²⁶ Sauloni Yerusalemu geennaani jara Yesoti mataqu fed'e, ammo worri ch'ufumaanu isa sodaate, wonti akanatiifi aka inni nama Yeso ind'ugefanne.

²⁷ Ammo Barnabani isa fuud'e gara jara Yesotiini d'ufe. Aka Sauloni Aabbo kara keesati arge, aka Aabbooni isaani dubbate, ammalle aka inni Damaski keesati soda male maqa Yeso hasae worrati hime.

²⁸ Eegi suni Sauloni Yerusalemu keesa tae worra woliini fulla ch'ufa dedeeme.

²⁹ Sauloni soda male maqa Aabbootiini barsiise, worra Grikile wolmormani, jennaani worri isa ijeesu fed'e.

³⁰ Oboleyaani waan kana d'ageennaani haga lafa Kaisaria isa geesite, gara dira Tarso jed'ani isa ergite.

³¹ Jennaani gumiini Waaqa Yudeafi Galilayafi Samaria keesa nagaya argate eebifamte, Aabbo Waaqa sodaate qarqaarsa Lubbu Qulqullotiini jabaatte heddatte.

Petroni nama fayyisa

³² Ato Petroni fulluma ch'ufa jiddu worra keesa dedeemu, inni fulla gumi qulqullo, ta Lidia teetu, d'ufe.

³³ Achiti inni nama toko ka Ainea jed'ani arge, ka haga ganna saddeeti fayyad'abe kokotae sire ira ch'iise.

³⁴ Petroni waan isaani jed'e, Ainea, Yeso Kristoni si fayyisa, kai sire tante mid'aafad'u. Inni maro tokotu kae.

³⁵ Nami Lidiafi Saroni keesa tau ch'ufti isa arge Aabbooti dedebie.

³⁶ Dira Yafa keesa, niiti d'ugefatte tokoti jira, ta Tabitha jed'ani, yokhaani Dorkasi, akasi jechaani Guguufto jechu. Niitiini tunini waan dansa heddu tolchite hori hiyyeeyi kennite.

³⁷ Bara suni isiini fayya d'abde doote. Eegi reefa isii d'iqani, mana gubba jiru toko keesa kayani.

³⁸ Waan diri Lidiani Yafati d'iaattuufi, jari Yeso aka Petroni achi jiru d'ageennaani, nama lama isati erge waan jed'e, Hurrisi gara keenna kooti.

³⁹ Jennaani Petroni kae worra woliini deeme. D'umnaani mana oli isa geesani. Nad'eeni d'iirsi iraa due isa bira ejaanjatte boote, ubaarafi woya Dorkasini gaafa jirtu hod'ite garsiifte.

⁴⁰ Ammo Petroni worra ch'ufa mana keesaa yaase, jilbifate Waaqa kad'ate, gara reefa ilaale waan jed'e, Tabitha, kai! Isiini ila banatte, Petro arginaani kaate teete.

⁴¹ Inni harka isii qabate olfuud'e, gumi qulqullofi nad'eeni d'iirsi iraa due yaame, isi jirtu worrati kenne.

⁴² Waan kana fulluma ch'ufa Yafa keesa nami ch'ufti d'agaye, nami hedduuni Aabbo Waaqa d'ugefate.

⁴³ Inni haga guyya heddu Yafa keesa tae, Simoni nama toko ka goga machaleesu woliini.