Huji Ergattu 28 - KITAABA WAAQA

¹ Eegi nu bisaani keesaa nagayaani baane, aka maqaani lafa suni Melita d'ageenne.

² Worri lafa suni guddo nuu qarqaare nu nahe, ibida nuu bobeese, maro d'aamocha bokayatiifi.

³ Pauloni qoraani guure ibidati naqe jennaani bofi toko maro owa ibidatiifi harka Pauloti mamarate.

⁴ Worri sunini bineensa kaani, ka harka isati maratu arginaani waan woliini jed'e, Namichi kunini nama ijeesu ind'abu; yo inni nagayaani bisaani keesaa bahele, d'ugaani aka inni jiraatu imfeetu.

⁵ Pauloni bineensa kaani ibidati fit'ate ammo woma intaane.

⁶ Worri waan harki isaa itae yokhaani inni maro tokotu lafa d'ae duu sehe. Ammo worri guddo eege, aka inni woma intahiini arginaani heregi worraa garagale, Inni Waaqa jed'ani.

⁷ D'awatu suni, oobru nama gudda lafa suniti jira, ka maqaani isaa Publio. Inni nu bulche haga guyya sadi nu keessuma isaa taane.

⁸ Abbaani Publio fayya d'abe qannate d'iiga albahe. Pauloni fulla isaa olseene Waaqa kad'ate, harka isa ira kaye isa fayyise.

⁹ Waan kana tolchinaani nami fayyad'aba qabu, ka lafa suni keesa jiru ch'ufti d'ufe fayye.

¹⁰ Worri guddo wo nuu kenne, guyya nu kaanele worri waan nu feenu ch'ufa nuu kenne.

Imaltu gara lafa Rumi

¹¹ Eegi jia sadii nu hobolo toko ta Iskanderiatini kaane, ta haga bara d'aamocha lafa suni keesa teete; maqaani isii Waaqoota lakolee jed'ani.

¹² Sirakusa d'umnaani guyya sadi achi teenne.

¹³ Achi kaane dira Regio d'umne. Eegi guyya toko qilleensi gama bita d'ae, boriyya Petuoli d'umne.

¹⁴ Oboleyaani achiti argine, aka nu torbaani toko achi teennu nu kad'atte. Achi kaane Rumi d'umne.

¹⁵ Oboleyaani achi waan kana d'ageennaani haga gabaya Apiotifi mana sadi ka keessuma jed'ani yoyo teenna d'ufte. Pauloni oboleyaani arginaani Waaqaa galata deebise garaa jabaate.

Huji Paulo lafa Rumi keesa

¹⁶ Eegi nu Rumi seenne, aka Pauloni mana ufi keesa tau, askarti isa eedu toko woliini, ee jed'ani.

¹⁷ Eegi guyya sadi Pauloni jara gugurda Yahudi wolti yaame. Worri wolwoldeennaani inni waan worraani jed'e, Oboleyaani, ato anini waan biyya yokhaani aada ababoota teenna tokole iyakini, na hid'ani, Yerusalemu na fuud'ani, harka gosa Rumiti na kennani.

¹⁸ Eegi dubbi tiyya qorani, na gadilakisu fed'ani, waan wonti anini duu maleefi tokoleeni injirreefi.

¹⁹ Ammo Yahudiini waan kana didde jennaani ani waan tahu d'abe. Kaisari dura na geesa jed'e. Taatule anini waan gosa tiyya himad'uufi inqabu.

²⁰ Wonti anini isani yaame nu wolhaasomnufi, waan maro anini nama gochiti Israeli ch'ufti abdattu abdad'ud'uufi sibiila kanaani na hid'ani.

²¹ Worri waan Pauloni jed'e, Waan dubbi teeti nu tatabe lafa Yudea keesa inarganne, ammalle oboleyaani ta arma d'ufte waan hamtu sirati garte woma indubbanne.

²² Ammo waan atini hereddu d'agayu imfeena, waan fulla ch'ufati aada atini gula deemtu tana nami ch'ufti hameenna isii dubbattufi.

²³ Guyya tolfatani, nami hedduuni fulla Pauloni tau d'ufe. Inni diirama haga galgala achiti worra barsiise waan finna Waaqaa worraa diige, waan Yeso ka kitaaba Seera Musatiifi ka raagoota keesati t'aafani worra agarsiise.

²⁴ Nami gari waan inni dubbate d'ugefate, ammo ka gari d'ugefachu dide.

²⁵ Ato wolmormanu, kaani yaani, eegi Pauloni dubbi taka tana dubbate: Lubbuuni Qulqullooni afaani raaga Isayatiini ababoota teennaani dubbi d'uga jette!

²⁶ Gara gumi tana d'aqi waan jettuuni, Gurraani d'ageettani, ammo inhubattani; ilaani inuma argitani, ammo imid'aafattani.

²⁷ Garaani gumi tana ya daallae. Gurri worraa ya duude, ilti worraa woma ingartu. Waaqi waan jed'u, Yo sila akasi intahiini, ilti worraa wo agarte, gurri worraa wo d'agaye, qalbiini worraa wo hubate worrileeni nati deebie, anileeni worra fayyisa.

²⁸ Tanaafi isani beekad'a, baafami Waaqa gara gosa d'ibi layu d'ufe, ammalle worri inch'aqasa! [

²⁹ Pauloni waan kana jennaani Yahudiini kaate yaate guddo wolmormite.]

³⁰ Pauloni haga ganna lama mana inni kira iti baase keesa tae, nama gara isaa d'ufe ch'ufa teteesise hasaeeni.

³¹ Inni waan Finna Waaqa iti hasae, waan Aabbo Yeso Kristo soda male nama barsiise, nami tokoleeni isa ind'owarre.