Huji Ergattu 26 - KITAABA WAAQA

¹ Agripani waan Pauloni jed'e, Atini ufii dubbad'u. Pauloni harka dirirfate ufii dubbate waan jed'e:

² Anini ingammada, ee hayyu Agripa waan guyya kana si durati ufii dubbad'uufi; maro waan Yahudiini naani himate ch'ufatiifi. Anini guddo gammada,

³ waan atini aadafi gaafacha Yahudi ch'ufa guddo beetuufi. Tanaafi anini si kad'ad'a, aka atini obsite na ch'aqaftu.

⁴ Aada tiyya, haga kaimooma kiyya, ka qara anini jiddu gosa tiyya keesa Yerusalemu tae, Yahudiini ch'ufti imbeeti.

⁵ Worri haga duriiti na beekha, aka anini aada teenna ta Farisayo guddo jabeese gula deeme yo fed'e dandae ind'ugeesa.

⁶ Anini amma arma eje aka dubbi tiyya qorani maro anini kakhu Waaqi ababoota teennati kakhate abdad'uufi

⁷ kakhu suni gochiti teenna kud'ani lamaanu aka argatani abdatti, ato halkani guyya Waaqa kad'atanu. Maro abdi tanaatiifi, ee hayyicha, Yahudiini na himatte.

⁸ Isii, isani Yahudi, aka Waaqi nama due kaasu maafi ind'ugefanne?

⁹ Anini herega kiyya keesa, aka maqa Yeso Nazareti balleesu guddo wolaaneeni.

¹⁰ Waan kana Yerusalemu keesati tolche. Jabeenna Qaallicha Gudda ira argannaani, worra Waaqaa heddu hid'aansa keesa naqe; hojja duisa iti murani anileeni ee jed'e.

¹¹ Maro heddu mana Waaqa iti kad'atani keesati worra gaargalche, aada worraa worra mormachiise. Anini guddo worrati dalane dira lafa ch'ufa d'aqe, worra gaargalche.

Pauloni waan baafama isaa hima

¹² Tanaafi ato anini tatabe jaarole gugurdo harkati qabad'e Damaski deemu,

¹³ saa jaa ka guyya, ee hayyicha, anini ifsa gubba nati ifsu, ka adu ira ifsu, kara keesati arge, ka naafi jara na woliini yauti ifsu.

¹⁴ Nuuni ch'ufti lafati jinnaani anini qonqo toko ta afaani Ebraniatiini naani dubbatu d'agaye, ta Saulo, Saulo maafa na gaargalchita? Atini ka aka qotiyo ule nama oofu d'iitu, teete, d'ugaa d'iitu ufuma ufi balleesita naani jettu.

¹⁵ Anini waan jed'eeni, Aabbo, atini eennu kana? Aabbooni waan naani jed'e. Anini Yeso kauma atini gaargalchu jirtu.

¹⁶ Ammo kai, olejad'u. Wonti anini siti mullad'eefi aka hojattu naa taate waan atini argite kanaafi ta anini hegeri siti himuni na d'ugeesitu.

¹⁷ Anini harka biyyatiifi harka gosa d'ibi, ta anini ammatana iti si ergu, keesaa si baasa.

¹⁸ Atini ila worraa bante, dukana ira gara ifsa worra deebifta, ammalle jabeenna Sheet'ana iraa Waaqati worra deebifta; aka d'ugefacha worri na d'ugefateeni daba worraa araaramaniifi, gumi Waaqi fohate keesati fulla argatani.

¹⁹ Tanaafi, ee hayyu Agripa, anini daayya gubba suni ch'aqasu indinne.

²⁰ Qara worra Damaski barsiise, ammalle worra Yerusalemu barsiise, duuba eege nama lafa Yudea ch'ufaafi ka gosa d'ibile ch'ufa barsiise aka worri daba lakise Waaqati deebie huji daba iraa deebiti garsiisu.

²¹ Maro waan kanatifi Yahudiini Mana Waaqa keesati na qabde na ijeesu feete.

²² Qarqaarsa Waaqa argannaani anini arra nama diqaafi gudda duraleti d'ugeesu jira, waan raagafi Musani, Intaati jed'ani male, anini waan d'ibi ind'ugeesu:

²³ aka Kristoni gaargale nama qara ka duisa keesaa kau tahe, ifsa biyyaafi nama gosa d'ibileti odeesu.

²⁴ Ato inni dubbatu, Festoni qonqo olfud'ate waan jed'eeni, Paulo, atini ya maraate; waan atini guddo wo baratteefi qalbiini tante ya hamaatte.

²⁵ Ammo Pauloni waan jed'e, Anini imaraanne, ee Festo gudda, ammo anini dubbi d'uga ch'alla dubbachuu jira.

²⁶ Hayyuuni waan kana imbeekha, anini isa durati soda male dubbachu jira. Anini imbeekha, aka wonti kunini tokoleeni isa dura indahanne; waan kana fulla d'ossati intolchine.

²⁷ Hayyu Agripa, atini ya raaga d'ugefatteyu? Anini imbeekha, aka atini d'ugefatte.

²⁸ Agripani waan Pauloni jed'e, Atini dubbi diqo tanaani waan Kristiana na tolchitu seeta?

²⁹ Pauloni waan jed'eeni, Ha dubbi diqo taatu, ha guddo taatu, woni anini Waaqa kad'ad'u, aka si ch'allaaniti, ammo worri na ch'aqasu jiru kunini ch'ufti, aka anini jiru tahu, haada naani hid'ani kana male.

³⁰ Jennaani hayyufi jaallabafi Bernikefi worri isaani woliini jiru ch'ufti olkakae.

³¹ Eegi worri kakae, woliini hasaani waan jed'ani, Namichi kunini waan duisatiifi ka hid'aniifi tokole intolchine.

³² Agripani waan Festoni jed'e, Nama kana sila gadi lakisani, ato inni Kaisari kad'achu d'ibaate.