Huji Ergattu 13 - KITAABA WAAQA

¹ Gumi Waaqa ta lafa Antiokia jirtu keesa, raagootafi nama wo barsiisu jira. Worri suni Barnabafi Simoni ka Guraacha jed'aniifi Lukio ka lafa Kirenetiifi Manaeni ka hayyu Herode woliini guddateefi Saulo.

² Ato worri Aabbo hojate ufi agabsu, Lubbuuni Qulqullooni waan worraani jette, Barnabafi Saulo huji anini fohad'eefi iti na qooda jette.

³ Eegi ufi agabsani Waaqa kad'atani, harka worra ira kayani gara d'ibi ergani.

Kipro d'aqani hasaani

⁴ Lubbuuni Qulqullooni worra erginaani Seleukia d'aqani. Eegi suni hobolo seennaani Kipro d'aqani.

⁵ Ato worri fulla Salami jiru dubbi Waaqaa maneeni Waaqa iti kad'atani ta Yahudi keesati odeesani Yohanani ka Mariko jed'anileeni worra woliini jira aka worra qarqaaru.

⁶ Eegi worri lafa suni ch'ufa ke yae haga Pafo taake, falfalticha toko argani, ka Bar-Yeso jed'ani.

⁷ Inni jaala hayyu lafa suni, ka Sergio Paulo jed'ani, nama guddo qalbi qabu. Hayyuuni Barnabafi Saulo yaame, aka dubbi Waaqa d'agayu.

⁸ Ammo falfaltichi kaani ka afaani Grikitiini Eliama jed'ani Barnabafi Saulo dubbachu d'owu fed'e, aka akasiini namichi guddaani kaani suni d'agaye ind'ugefanne.

⁹ Jennaani Sauloni, ka Paulo jed'ani, Lubbu Qulqullooni guutamnaani falfalticha kana sonaani ilaale

¹⁰ waan jed'eeni, Atini ka kiyyibafi ch'ubbuuni guutamte, ilma Sheet'ana, nyaapa d'uga ch'ufaa, karaa Aabbo ka d'uga balleesu illakiftu?

¹¹ Ammatana ilaali, harki Aabbo si gubbaa jira; ila d'abda, haga bulti diqo toko lafa ingartu. Maro tokotu ilti isaa sapupoofte, lafti iti dukanoofte, inni deeme nama ule isaa qabu barbaade.

¹² Hayyuuni kaani waan kana arginaani d'ugefate, waan barsiisa Aabbo guddo mame.

Antiokia d'aqani hasaani

¹³ Paulofi jari isa woliini jiru Pafo hobolooni kaani, Perge ta lafa Pamfilia d'ufani; ammo Yohanani ka Mariko jed'ani worra jala deebie Yerusalemuti gale.

¹⁴ Pergaa yaani dira Antiokia ka lafa Pisidia d'ufani; guyya Sabato mana Waaqa iti kad'atani seenani tataani.

¹⁵ Eegi dubbi Seeratiifi ta raaga soomani, jaaroleeni Mana Waaqaa kaani nama worrati ergite waan jetteeni, Oboleyaani, yo nama gorsu feetani, dubbad'a.

¹⁶ Jennaani Pauloni olkae, harka olfud'ate waan biyyaani jed'e. D'iiro, worra Israelitiifi gosa d'ibile ta Waaqa d'ugefattu, na ch'aqasa!

¹⁷ Waaqi gosa Israeli ababoota teenna fohate gosa jabdu tolche, gaafa worri aka keesuma lafa Misiri keesa tau. Inni harka jabaani lafa suni keesa worra baase,

¹⁸ haga ganna afurtama lafa aloo keesati amala worraa hama obse woliini tae.

¹⁹ Inni gosa torba lafa Kanaani keesaa balleese, gumi ufi abbooti lafaa tolche.

²⁰ Duuba ganna d'ibba afuritifi shantama teennaani, inni jaallaboota worraa kenne, haga bara raaga Samueli.

²¹ Worri hayyu fed'annaani Waaqi Saulo ilma Kishi ka Benjamini worraa kenne; duuba inni haga ganna afurtama worra fide.

²² Eege Waaqi isa lakise Daudi hayyu worraa tolche. Waaqi isa d'ugeese waan jed'e, anini yayu Daudi, ilma Yese argad'e, ka garaani kiyya maache fed'i tiyya ch'ufa guutu.

²³ D'aloota nama kana keesa, Waaqi ya Qarqaarsa Israeli, ka duri kakhate, tolche, ka Yeso jed'ani.

²⁴ Ato inni ind'ufiini, Yohanani worra barsiise waan jed'e, Daba iraa deebia, batifama.

²⁵ Yohanani huji ufi ch'ufa hobaasu geennaani waan jed'e, Isani eennu na seetani? Anini isaaniti, ammo ilaala, nami toko eegi tiyya d'ufa, ka seemsa kope miila isaa anini hiikhu himmalini.

²⁶ Oboleyaani, ilmaani d'aloota Abrahamufi isani ch'ufa ka Waaqa sodaattani, dubbi baafama tana gara keenna ergani.

²⁷ Wonti akanatiifi worri Yerusalemu taufi jari gugurdaani worraleeni fuula isa imbeekhani yokhaani dubbi raagootatiifi ta Seera ta guyya Sabato ch'ufa soomani inhubanne. Ammo duisa Yesoti murani aka akasiini dubbini raagooti fadde guutamtu.

²⁸ Ato waan inni duu maleefi d'abanile, aka isa ijeesani Pilato kad'atani.

²⁹ Wonti duri, ta waan isaa t'aafani, guutamnaani, worri mukha iraa fuud'e awaale.

³⁰ Ammo Waaqi duisa keesa isa kaase.

³¹ Inni guyya heddu worra duri isa woliini Galilaya bahe Yerusalemu d'ufeti mullate. Worri suni amma gumi Israeli ch'ufa durati d'uga isaati.

³² Nu Odu Dansa isaniti odeesina, aka kakhu suni ta ababooti teennati kakhatani,

³³ Waaqi nuu ilmaani worraati guute, waan Yeso duisa keesaa kaaseefi. Akuma Faaru lameeso keesati t'aafani, Atini ilma kiyya, guyya kana anini ya Abba kanke tahe.

³⁴ Ammalle waan duisa keesaa isa kaasiti, aka inni duisati indeebine, Waaqi waan jed'e, Anini eeba d'ugaatifi qulqullo isani kenna ta anini Dauditi kakhad'e.

³⁵ Ammalle Faaru d'ibi keesati inni waan jed'e, Aka hojattuuni tante qulqullooni shamtu atini ee injettu.

³⁶ Daudini d'aloota ufi keesa fed'i Waaqa guunnaani, ababoota isaa woliini awaalani shame.

³⁷ Ammo nami Waaqi duisa keesaa kaase inshamne.

³⁸ Tanaafi oboleyaani tiyya, aka maro nama kanatifi araarama daba isaniti hasaani beekha.

³⁹ Maro isatiifi nami d'ugefatu ch'ufti waan ch'ufa keesati d'uga argata, ka duri Seera Musa gula nami d'uga argachu indandeenne.

⁴⁰ Tanaafi eegad'a, aka wonti kunini ta raagi dubbate isaniti ind'umne ta,

⁴¹ Ilaala, isani ka nama tuffattani! Mama, bada! Anini huji toko bara keesani kana keesa tolcha, huji isani ind'ugefanne, ato nami isaniti odeesele! jettu.

⁴² Ato worri mana Waaqa iti kad'atani keesaa yau, gumiini aka dubbi tana Sabato d'uftule iti hasaani kad'atte.

⁴³ Eegi gumiini gargari baate Yahudi heddufi nami aada Yahuditi gale hedduuni Paulofi Barnaba gula yaani. Worri worraani hasae, Eeba Waaqa keesati jabaad'a jed'e gorse.

⁴⁴ Sabato lameeso, nami dira suni, take take male, ch'ufti woltiwoldae aka dubbi Aabbo d'agayu.

⁴⁵ Ammo Yahudiini gumi guddo agarraani guddo d'iibifatte, dubbi Pauloni jed'e mormite isa arabsite.

⁴⁶ Jennaani Paulofi Barnabani garaa jabaatani waan jed'ani, Dubbi Waaqa qara isaniti hasau malani. Ammo maro isani diddani jireenna hegeri ka isanii male argachu dad'abdanifi nu gara gosa d'ibii d'anna.

⁴⁷ Wonti akanatiifi Aabbooni akasi nuti mure waan jed'e, Anini ifsa gosa d'ibi ya si tolche, aka baafama namaa taatu, haga muumme lafa.

⁴⁸ Gochiti d'ibiini waan kana d'ageennaani gammadde dubbi Aabbo faarsite; nami aka jireenna hegeri argatu fohatani ind'ugefate.

⁴⁹ Dubbini Aabbo lafa suni ch'ufa geete.

⁵⁰ Ammo Yahudiini taani nad'eeni dira suni ta gurra qabdu ta beekhanifi, nama gugurda dira sunilee, Paulofi Barnabati kaafte lafa suni keesa gussite.

⁵¹ Ammo worri aka awaarti faana worraa d'uga worraa taatu faana d'ad'ate Ikonio d'aqe.

⁵² Jari Yeso gammadafi Lubbu Qulqullooni guutame.