Huji Ergattu 11 - KITAABA WAAQA

¹ Ergattufi oboleyaani Yudea keesa jirtu, aka gochiti d'ibileeni dubbi Waaqa d'ugefatte d'ageete.

² Tanaafi Petroni Yerusalemuti d'iaannaani worri aada qabanqaba jabeesu isa goyeese waan jed'eeni,

³ Atini ya worra qabanqaba inqabatini woliini nyaatte d'udde.

⁴ Ammo Petroni waan ch'ufa worrati hasae waan jed'eeni.

⁵ Ato anini dira Yafa keesati Waaqa kad'achu jiru, daayya keesa anini wo arge, woya guddo, ta humbi afraanu hid'ani nati gadi buusani arge.

⁶ Aka dansa keesa ilaalani, bineensa miila afuritifi bineensa alatiifi bineensa lafa ira lohufi allaati arge.

⁷ Anini qonqo, Petro, kai, qalad'u nyaad'u naani jettu d'agaye.

⁸ Ammo anini waan jed'eeni, Aabbo laki, wonti qulqullo intahiini yokhaani wonti hamtuuni taka afaani kiyya keesa inseenne.

⁹ Ammo qonqooni gubbaa deebite waan jette, Waan Waaqi qulqulleeseeni, Qulqulloniti injed'iini.

¹⁰ Wonti kunini maro sadi akasi taate, jennaani wonini kaani ch'ufti gubbati oli deebite.

¹¹ Hojuma suni nami sadi, ka Kaisaria nati ergani, fulla mana anini tau d'ufe.

¹² Lubbuuni, Soda male worra woliini deemi naani jette. Ammalle oboleyaani jaani tanaani woliini yaane, mana namicha olduunne.

¹³ Inni aka malaika mana ufi keesati arge nuti hime. Malaikaani suni waan jetteeni, Nama gara Yafa ergi, nama toko ka Simoni Petro jed'ani yaami;

¹⁴ inni aka siifi worri kankeleeni baafamtani siti hima.

¹⁵ Akuma anini dubbi tiyya iti keyad'eeni, Lubbuuni Qulqullooni worra ira buute, akuma duri nura buute.

¹⁶ Jennaani anini dubbi Aabbo qaabad'e, ta inni Yohanani d'uguma bisaaniini batise, ammo isani Lubbu Qulqullooni batifamtani jed'e taani.

¹⁷ Yo Waaqi qarqaarsa aka nuu kenne worra kanale kenne, gaafa nu Aabbo Yeso Kristo d'ugefanne, anini eennu re ka dandae Waaqa d'owu?

¹⁸ Waan kana d'ageennaani dubbi isaa quufani, Waaqa faarsani waan jed'ani, Waaqi gosa d'ibile ya daba iraa deebise jireenna kenneefi.

Gumi Waaqa ta lafa Antiokia keesa

¹⁹ Worri guddo gargari firfirfame maro gaargala eegi duisa Stefano d'ufetiifi, haga Foinikefi Kiprofi Antiokia yae dubbi Waaqa Yahudi ch'allati hasae.

²⁰ Ammo jari gari ka Kiprofi Kirene, Antiokia d'umnaani gosa d'ibileti hasaani.

²¹ Jabeenni Aabbo worra woliini jira, nami hedduuni d'ugefate Aabbooti deebie.

²² Oduuni tunini gumi Yerusalemu geete, tanaafi worri Barnaba Antiokiati ergani.

²³ D'umnaani inni eeba Waaqa arge guddo gammade nama ch'ufati hime, aka garaa tokooni Aabbo d'ugefatani.

²⁴ Barnabani nama dansa, ammalle Lubbu Qulqullofi d'ugefacha qaba. Nami hedduuni Aabbooti darame.

²⁵ Jennaani Barnabani gara Tarso d'aqe aka Saulo barbaadu.

²⁶ Arginaani Antiokiani isa d'ufe. Haga ganna toko worri gumi Waaqatiini wolwoldae nama heddu barsiise. Ammalle Antiokia keesa qara jara Yesotiini Kristiani jed'ani.

²⁷ Bara suni raagooti gari Yerusalemu baate Antiokia d'ufte.

²⁸ Namichi toko, ka Agabo jed'ani, Lubbuuni guutamnaani, aka beelti guddooni lafa ch'ufa d'uftu fage. Beelti tunini bara motuma Klaudio d'ufte.

²⁹ Jari Yeso ch'ufti, haga dandau, aka oboleyaani Yudea keesa jirtu qarqaaru woli gale.

³⁰ Akasi tolchani, harka Barnabatiifi ka Saulotiini hori jaaroleti ergani.