Hosea 9 - KITAABA WAAQA

¹ Worri Israeli, jila teesani aka worra Waaqa imbeenne intolfatina. Isani ya Waaqa keesani iraa gortani waaqa d'ibi gula yaatani. Fulla ch'ufa isani ya aka sharmut'a waaqa Baali jed'aniti ufi gurgurtani mid'aani waan inni isanii kennu seetanile jaalattani.

² Ammo isani yoosu mid'aanifi d'ad'a d'abdani, daad'ileeni isani hanqatti.

³ Worri Israeli lafa AABBO Waaqa keesa intau, ammo lafa Misiriti deebie sagale nyaachu himmalliini lafa Ashuru keesati nyaatani.

⁴ Lafa biyya suni keesati daad'i AABBO Waaqaa d'ibayu imbaasani, yokhaani soriole imbaasaniifi. Sagaleeni worri nyaatu nama nyaatu ch'ufa int'ureesiti, akuma sagale hojja nama awaalani nyaatani. Sagaleeni suni beeluma ch'alla baafti, tokole fuud'ani Mana Waaqatini d'ufani sorio imbaasani.

⁵ Ammalle yo hojaani jila AABBO Waaqaa tolfatani geete, worri maani taha re?

⁶ Hojja gaargali d'ufe worri gargari bitinau, worri Misiri worra wolti guure dira Memfisiti awaala. Miha worraa ka qarsitiifi maneeni worraleeni badde ona taate doobifi qoraatini irati baati.

⁷ Guyyaani worra gaargalchani ya d'ufe, guyyaani haalo worraa baafatani ya gahe. Guyya suni Israeliini inuma beeti! Isani waan jettani, Raagi kunini daalle, nami woi fagu kunini ya maraate. Wonti isani akasi guddo na jibbitaniifi, waan ch'ubbu teesani heddutiifi.

⁸ Waaqi ya na erge, aka anini aka raaga gumi Israeli gorsu. Ammo fulla anini deemu ch'ufa isani aka simpirre t'ururaani na qabu feetani. Lafuma Waaqaa keesaleti gumiini ya nyaapa raagaa taate.

⁹ Worri kunini aka hama hameenna gula bahe, akuma gaafa Gibea kaani tahe. Waaqi dabafi ch'ubbu worraa qaabate worra gaargalcha.

Ch'ubbu Israelitiifi gaargala worri argatu

¹⁰ AABBO Waaqi waan jed'u, Gaafa anini qara Israeli arge, worri mid'aani zabibu ka lafa aloo keesati bahu nati fakaate. Ammalle gaafa anini qara ababoota teesani arge, worri mid'aani oda ka qara bahe nati fakaate. Ammo worri Gaara Peoritiini bahe jennaani waaqa Baali jed'ani kad'ate jaalate aka isaa hammaate waan hamtu tolche.

¹¹ Guddinni Israeli aka simpirre iraa barise, worri deebie ijoolle ind'alu, nad'eeni worraa deebite ingaarachoftu, ijoolleeni worraa d'alatu injirtu.

¹² Ammo ado worri ijoolle d'alellee, anini ch'ufa infit'a. Hojja anini worra kana lakisu gaargala hamaati iti d'ufa!

¹³ Ee AABBO Waaqa, anini ijoolle worraa ta barbaadani aka bineensa fit'ani arge.

¹⁴ Anini amma worra kana maani Tolchi siini jed'a? Wonti atini tolchitu, nad'eeni worraa maseensi, harma worrale doomsi!

Aka AABBO Waaqi Israeli wollaala iti mure

¹⁵ AABBO Waaqi waan jed'u, Hameenni worraa ch'ufti Gilgaliti mullate, artiti anini qara worra jibbe. Waan worri waan hamtu tolcheefi anini worra lafa tiyya keesaa gussa. Anini worra deebie injaalad'u; wonti akanatiifi jaaroleeni worraa ch'ufti ya na didde.

¹⁶ Worri Israeli mukha qanch'oorate hiddi goge mid'aani imbaamne fakaata. Worri ijoolle ind'alu, ato d'alelle, anini ijoolle worri jaalatu suni imfit'a.

Waan Israeli ka raagi dubbate

¹⁷ Waaqi kiyya gumi ufii dide gata, waan worri isa ch'aqasu dideefi. Worri fulla d'abe gosa d'ibi keesa mara.