Hosea 7 - KITAABA WAAQA

¹ Hojja anini worra kiyya ka Israeli fayyise horsiisu fed'u ch'ufa, anini ch'ubbufi hameenna worraa ch'alla arga. Worri wolsobe mana ch'ach'abse woi hate dira keesaleti nama saama.

² Worri waan anini hameenna worra suni diqole qaabad'u insehu; ammo ch'ubbuuni worraa worra marsite hojja ch'ufa nati mullatti.

Aka hayyu mana isaa keesati iti malatani

³ AABBO Waaqi waan jed'u, Hayyufi hojattu isaa gugurdo sosobaniti iti malatani.

⁴ Worri ch'ufti malticha hama; ibida guddo bobeesani, ka nama qit'a d'aabu, haga qit'aani bukhauti intunne fakaata.

⁵ Guyya jila hayyu keenna, hayyufi hojattu isaa gugurdo daad'i iti kennani macheesani daalleesani.

⁶ Worri hayyu daalleese suni akuma ibida woi d'aabu mala ufiitini gubate. Halkani ch'ufa dallansuuni worraa gach'abde, ammo diirama aka ibida bobeeti.

⁷ Dallansu ufii keesati worri worra worra fidu hobaase. Hayyoota worrale ch'ufa woluma gula fit'ani, ammo tokoleeni ta na yaamattu injirtu.

Israelifi gosa d'ibi

⁸ AABBO Waaqi waan jed'u, Worri Israeli aka qit'a gami toko imbilchaatiini jira. Worri gosa d'ibi d'aatu jirtu abdata,

⁹ ammo aka abdiini worri gosa d'ibi abdate suni worra laafiftu imbeekhani. Worri ya jaare arri baase, ammo akasile ufi inargu.

¹⁰ Kiyyibi worra Israeli ya worra balleesa, ammo ha taatu, worri ana, AABBO Waaqa worrati deebie imbarbaanne.

¹¹ Israeliini aka sabaliisa jirti, ka aka daalle fulla ch'ufa ka inteenne maru; qara lafa Misiri qarqaarsa fed'achu d'aqani, ammo eege Ashuru d'aqani!

¹² Ammo anini t'urura dura kaye, ato worri aka simpirre barisu qaba. Maro hameenna worratiifi qabe worra gaargalcha.

¹³ Worri waan naraa gore na lakiseefi ya bade! Tanaafi worra ha balleesani! Anini qara worra baasu fed'e, ammo worri d'ugaani na inkad'anne.

¹⁴ Worri garaa tokooni na inkad'anne, ammo sire gubbati lafaani ufi d'ae, aka nama Waaqa imbeenne iyya. Ammalle hojja mid'aanifi daad'i Waaqa kad'atanile, ufi murani aka worra Waaqa imbeenne ufi tolchani, akasiini naraa gorani.

¹⁵ Ato anini worra guddise jabeesele, worri nati malate.

¹⁶ Worri yo ch'ufa naraa gore waaqa woma keesa injirre kad'ate guube dabdu fakaata. Waan jaaroleeni kiyyibdeefi, worra goraadeeni fit'ani, worri Misirileeni worra kobla.