Hosea 6 - KITAABA WAAQA

¹ Koota, AABBO Waaqati deebina! Inni qara ya nu tatarsaase, ammo inuma nu fayyisa; ya nu madeesele, ammo mada teenna inuma hid'aniti?

² Eegi lamaa sadi bulle, nu jireesa, duuba nuleeni isa woliini teenna.

³ Koota, jabaanne aka dansaa AABBO Waaqa baranna. Inni akuma lafti bariitu yokhaani akuma ganni woga gula roobu nuti d'ufa.

⁴ Ammo AABBO Waaqi waan jed'u, Worra Israelitiifi ka Yuda, maani isani tolcha? Jaalalti teesani ta isani na jaalattani tunini huri fakaatti, yokhaani fit'eesa diirama ka yoosu gogu fakaatti.

⁵ Tanaafi anini raagoota isaniti erge, ta dubbi tiyyaani isani ijeefte balleesitu. Wonti anini isani ira fed'u ya diidoofte:

⁶ anini jaalala ind'umanne isani ira fed'a, sorioniti, yokhaani beekhuma isani na beetani fed'a, waan gubani Waaqaa baasaniniti.

⁷ Ammo worri akuma Adamu wold'aqisa ch'abse, waan d'ara na durati tolche.

⁸ Dira Gileadi nama ch'ubbu tolche d'iiga namaa buusuti guute.

⁹ Qaaloleeni shifta fakaatti, ta d'okhate karaati nama eeddu. Kara fulla qulqullo Shekemu deemuleti nama ijeefti; ammalle waan kana ch'ufa beekhaa tolchiti!

¹⁰ Anini lafa Israeli keesati ya waan hamtu arge: gumiini tiyya ya huji sharmut'oma hojatte ufi t'ureesite.

¹¹ Ammo isani worra Yudale, guyya wollaala isaniti murani ani ya tolche.