Hosea 2 - KITAABA WAAQA

¹ Duuba gosa teesani ta Israeli, Worra Waaqaa, ka Aabbo Waaqi jaalatu jed'a, yaama.

Hameenna Gomeritiifi ta Israeli

² Ijoolle, haateti dubbad'a ufi ya dad'abe, isiini amma niiti tiyyaniti, anileeni d'iirsa isiitiniti, ammo ha taatuti, iti dubbad'a, aka isiini sharmut'oma isii, ka ch'eera d'abde lafaani martu kana, lakiftu.

³ Yo isiini lakisu didde, anini woya iraa hiikhe qulla aka isiini d'alatte lakisa, ammalle anini isi aka lafa gamooji ta bisaani inqamne, tolche d'eebuuni ijeesa.

⁴ Anini ilmaani isii injaalad'u; ilmaani suni ta niiti daru ch'eera inqamneti.

⁵ Isiini waan jette, Anini garayoota tiyya gula deema, ta aananifi bisaani naa kennite gaad'a dadansa naa bitte daara na baafte d'ad'afi daad'i naa kennitu.

⁶ Tanaafi anini amma dallaa qoraati iti jaare, d'akhaani marse jaare deemu d'owa.

⁷ Isiini garayoota isii irreebdi ammo ind'aqabdu, ammalle imbarbaadi ammo inargattu. Duuba isiini ufi jibbaatte waan jettu, Anini d'iirsuma kiyyati deebia — gaafuma d'iirsa kiyya woliini jiru aka dansaa taa, ammatana ira.

⁸ Isiini aka nami mid'aani, daad'i, d'ad'a, ammalle qarsifi worqi worri kad'acha waaqa Baali jed'ani suni baasu isii kenne, ana inhubbanne.

⁹ Tanaafi gaafa mid'aani haamani, anini mid'aanifi daad'i tiyya isi iraa fuud'e deefad'e, gaad'a dadansa anini daaraani baase qullaani d'osseefi kaani iraa fuud'a.

¹⁰ Anini ila garayoota isii durati isi woya iraa hiikhe ch'eersa, nami tokoleeni ka iraa na d'owu injiru.

¹¹ Anini jila isii d'owa — jila isii ta wogaatiifi ta baatitiifi ta Sabatotiifi jila isii d'ibi ch'ufa.

¹² Anini mukeeni isii ta zabibutiifi ta odale, ta isiini, Garayoota tiyyati sharmut'oma kiyya naa kenne jettu balleese badda fulla bineensi keesa oolu tolcha.

¹³ Waan isiini na lakifte waaqa Baali jed'ani hit'aana aarsite jila tolchite ufi mid'aasite qubefi faayaani ufi ch'ote garayoota isii taani gula deemteefi, anini isi gaargalche balleesa. Tunini dubbi AABBO Waaqi jed'e.

Jaalala AABBO Waaqi worra Israeli jaalate

¹⁴ Tanaafi anini isi sosobe lafa alootini d'ufe jaalalaani iti dubbad'a.

¹⁵ Anini oobru isii ta zabibu isii deebise Bale Gaargala garagalche balbala abdi tolcha. Isiini achiti dubbi na jalaa qabdi, akuma gaafa kaima, ka isiini lafa Misiri keesaa baate na jalaa qabde kaani.

¹⁶ Gaafasi isiini, D'iirsa kiyya naani jetti, deebite Baali kiyya naani injettu.

¹⁷ Ammalle AABBO Waaqi waan jed'u, Anini deebie aka isiini maqa Baali d'ooftu diqole ee injed'u.

¹⁸ Gaafasi anini bineensafi simpirrefi waan garaani lafa ira lohale wold'aqisa woliini tolfad'a, aka worri kiyya nagayaani woliini tau; ammalle anini goraadeefi guubefi t'iya lolaa balleese lafa nagaya tolcha.

¹⁹ Israeli, anini niiti si tolfad'a; anini nama d'uga ka d'ugeefatani taha; anini si jaalad'e si lakisu dide, haga jiru jireenna sii nahe nama kiyya si tolcha.

²⁰ Anini kakhu tiyya guute, nama kiyya si tolfad'e, atileeni aka ani AABBO Waaqa beeta.

^21-22 Gaafasi anini kad'acha gumi tiyya ta Israeli d'agayaa. Anini bokaya lafati roobe, laftileeni mid'aanifi daad'ifi d'ad'a baafti.

²³ Anini gumi tiyya lafa tana qubachiise horsiisa; worra ka Injaalanne jed'aniini kaanifi worra Nama kiyyaniti jed'aniini kaanile jaalad'a. Anini waan jed'uuni, Isani worra kiyya; worrileeni waan jed'u, Atini Waaqa keenna.