Henna 20 - KITAABA WAAQA

¹ Gumiini Israeli ch'ufti jia qara keesa d'ufte, lafa aloo ta Sinaiti baate Kadeshiti qubate. Achiti Miriamuuni lubbu d'abde awaalani.

² Fulla worri qubate suni bisaani injirani, duuba biyyiti woltibate Musafi Haruniti

³ gungumte waan jette: Sila ira nu jirti, ato Waaro Woyyuma durati oboleyaani teenna taani woliini doone.

⁴ Isani maanifi lafa aloo tanaani nu d'uftani? Nufi hori keenna balleesu feetani?

⁵ Isani maanifi lafa Misiri keesaa nu baaftani, lafa hamtu woma imbaamne tanaani nu d'uftani? Mid'aani injirani, odaani injiru, zabibuni injirtu, okhokuleeni injirtu, waan d'ibi lakisi bisaani afaanileeni injirani!

⁶ Musafi Harunini gumi biraa yaani, balbala Waaro Woyyuma keesa ejaanjani, gajejed'ani. Jennaani guddinna AABBO Waaqa ka bibiliqu argani.

⁷ AABBO Waaqi waan Musani jed'e,

⁸ Ule tana fuud'i, duuba siifi oboleesi kanke Harunini gumi wolti yaama. Worra durati rabsu d'akha suniti dubbad'i, duuba bisaaniti keesaa baha. Kara kanani atini bisaani d'akha keesaa biyya baafta, aka namafi saileeni d'eebu bahu.

⁹ Musani akuma AABBO Waaqi jed'eeni deeme ule taani fuud'e.

¹⁰ Isaafi Harunini gumi ch'ufa rabsu d'akha durati wolti yaamani jennaani Musani waan jed'eeni, Isani worra wa didu kana ch'aqasa! Nu rabsu d'akhaa kana keesa bisaani isanii baasu feetani?

¹¹ Jennaani Musani harka olfud'ate, rabsu d'akhaa kaani maro lama ule sunini d'ae, jennaani bisaani muumme inqamne keesaa baafatani, namafi sai ch'ufti d'uge d'eebu bahe.

¹² Ammo AABBO Waaqi waan Musafi Harunini jed'e, Waan isani na d'aarefatani gumi Israeli durati na ch'eersitanifi, isaani gumi tana lafa anini worraa kakhad'eti ingeesitani.

¹³ Wonti kunini Meribati taate, fulla gumiini Israeli AABBO Waaqati gungumte, innileeni qulqullooma ufi worra garsiise.

Aka hayyuuni Edomu gumi Israeli dabru d'owe

¹⁴ Musani, ato Kadeshi jiru, nama hayyu Edomuti erge waan jed'eeni, Oboleyaani tante gochiti Israeli waan jettu, Atini gaargala nu arganne ch'ufa imbeeta,

¹⁵ aka ababooti teenna lafa Misiriti godaante, nu ganna hedu achi teenne. Worri Misiri nufi ababoota teenna guddo dabse,

¹⁶ duuba nu AABBO Waaqati boonne, inni boha teenna d'agaye malaika, lafa Misiri keesaa nu baaftu, nuu erge. Nu amatana Kadeshi jira, dira fulla seera lafa teesani.

¹⁷ Nu amma si kad'anna, lafa tante keesaa dabru feena, nu dabarsi. Nu kara iraa gorre oobru teesani ta mid'aanitifi ta zabibule inseenu, ammalle eellani teesanile bisaani keesaa ind'unnu. Haga lafa tante keesaa baanuti kara kanke gudda iraa ingorru.

¹⁸ Ammo worri Edomu waan jed'eeni, Nu ee injennu, aka isani lafa teenna keesa dabartani! Hojja isani akasi iti gamtani, nu haane isani balleesina.

¹⁹ Worri Israeli waan jed'eeni, Nu kara kanke gudda iraa ingorru, yo namafi saileeni bisaani keesani d'uge nu gati baamna, wonti nu feenu dabriti ch'alla.

²⁰ Ammo worri Edomu waan jed'e, Nu akasi ee injennu. Duuba hojuma suni duula baasani worra Israeli had'iisa kurfahani.

²¹ Waan worri Edomu worra Israeli lafa isaani keesa dabru d'owefi, worri Israeli garagale kara d'ibi godaane.

Duisa Haruni

²² Gumiini Israeli ch'ufti Kadeshi kaate gaara Hori qubate,

²³ Fulla seera lafa Edomu. Achiti waan AABBO Waaqi Musafi Harunini jed'e,

²⁴ Harunini lafa anini worra Israeliti kakhad'e inseenu; waan isani lachu dubbi tiyya Meribati diddanifi inni amma indua.

²⁵ Harunifi ilma isaa Eleazari gaara Hori korsisi,

²⁶ achiti woya qaallu iraa baasi, Eleazari kayi, duuba Harunini artumati dua.

²⁷ Musani waan AABBO Waaqi isaani jed'e tolche; worri ila gumi ch'ufa durati gaara Hori kore

²⁸ achiti Musani woya qaallu Haruni iraa baase Eleazariti kaye. Achi fit'e gaara irati Harunini due, jennaani Musafi Eleazarini gaara iraa gabuani.

²⁹ Gumiini ch'ufti aka Harunini due beete bulti sodoma booteefi.