Henna 16 - KITAABA WAAQA

^1-2 Korani ilmi Ishari, ka balbala Kohathi, ka gosa Lawi, garaa jabaate aka taka inargini Musani morke. Ammalle nami sadi ka gosa Reubeni, Dathanifi Abiramu, ilmaani Eliabu ammalle Oni ilma Pelethi, ammalle jaaroleeni nami d'ibba lamafi shantama, ta gurra qabdu, ta gochiti fohate, isaa kalchite.

³ Worri kunini ch'ufti Musafi Haruni durati wolti d'ufe waan jed'eeni, Isani ya waan ch'ufa keesa dabartani! Gumiini tunini ch'ufti ta AABBO Waaqati, Waaqileeni nu ch'ufa wolumaani jira, Duuba atini, Musa, maanifi gumi Waaqa tana ch'ufa ira ufi olfuuta?

⁴ Musani dubbi tana d'agaye jennaani, lafaani ufi d'ae Waaqa kad'ate.

⁵ Jennaani waan Korafi goli isaatini jed'e, Bori diirama AABBO Waaqi nama isaa nu agarsiisa; inni nama isaa ka fohate ee jed'a aka inni isa dura d'ufu.

^6-7 Bori diirama waan isani tatani, sifi golini teetileeni daboola ibida fud'ad'a, ch'ile ibadatifi hit'aana gubbaa kaya, AABBO Waaqa duraani koota. Duuba nama AABBO Waaqi fohate inagarra. Nami waan ch'ufa keesa dabre isani worra Lawi!

⁸ Jennaani Musani ammalle waan Korani jed'e, Ch'aqasa, isani worri Lawi!

⁹ Isani aka Waaqi Israeli gumi taani ch'ufa keesa isani fohate, aka isani isati d'uftani, huji AABBO Waaqa Waaro Woyyuma keesati hojattani, gumi dura ejitani waan diqo seetani?

¹⁰ Waaqi siifi worra Lawi kaani ch'ufa ya ufiti d'ieese isani ulfeese isanileeni amma tana qaalole tahu feetani?

¹¹ Tanaafi siifi golini tante ya AABBO Waaqaani morkitani; Harunini eenu, ka isani waan isa gungumtani?

¹² Jennaani Musani Dathanifi Abiramu ilmaani Eliabu gayaame, ammo worri ind'umnu jed'e jalaa dide

¹³ waan jed'e, Aka atini lafa Misiri ta aananifi dammi aka lola yayu keesa nu baafte lafa aloo tana keesati nu hobaafte waan diqo seeta? Ammalle atini hayyu nuti tahu feeta?

¹⁴ Ammalle atini lafa aananifi dammi aka lola yauni nuu ind'ufne, yokhaani oobru mid'aanitifi ta zabibu nuu inkennine duuba atini amma tana waan nu sobdu seeta? Nu ind'umnuyu!

¹⁵ Musani guddo dallane waan AABBO Waaqaani jed'e, Waan worri kunini sii baasu tokole ee jette imfud'atini. Anini worra kana tokole iti iwollaalle, yokhaani taka harrele iraa infud'anne.

¹⁶ Jennaani Musani waan Korani jed'e, Waan isani tatani, siifi golini tante ta nama 250, bori Waaro Woyyumati AABBO Waaqa dura koota; Harunileeni ind'ufa.

¹⁷ Isani nami ch'ufti ha daboola isaa ka ibida fud'ate, hit'aana gubbaa kaye, AABBO Waaqa duraani d'ufu.

¹⁸ Duuba nami ch'ufti daboola ufi fud'ate, ch'ile ibidatifi hit'aana gubbaa kaye, fulla balbala Waaro Woyyuma Musafi Haruni woliini ejaanjani.

¹⁹ Jennaani Korani gumi ch'ufa wolti yaame, fulla balbala Waaro Woyyuma fuula Musafi Haruniti deebiani ejaanjani. Jennaani guddinni AABBO Waaqa ka bibiliqu gumi ch'ufati mullate,

²⁰ AABBO Waaqi waan Musafi Harunini jed'e,

²¹ Worra kana ira fagaad'a, anini amuma tana worra balleesa.

²² Ammo Musafi Harunini lafati gajejed'ani waan jed'ani, Ee Waaqa, ka lubbu nama ch'ufa harkaa qabdu, hojja nami toko ch'ubbu tolche atini gumi ch'ufati dallanta?

²³ AABBO Waaqi waan Musani jed'e,

²⁴ Gumiini, waaro Koratifi ta Dathanifi ta Abiramu iraa fagaad'a jed'i.

²⁵ Jennaani Musani kae jaarole Israeli woliini gara Dathanifi Abiramu d'aqani.

²⁶ Musani waan gumiini jed'e, Waaro worra ch'ubbicha kana hanqad'a waan worra tokole inqabatina; hojja qabattani worra woliini isani balleesani maro ch'ubbu worraatifi.

²⁷ Jennaani worri waaro, Koratifi ta Dathanitifi ta Abiramu biraa fagaate. Dathanifi Abiramuni waaro ufi keesaa gabahani, balbala dura nad'eenifi ilmaani worra woliini ejaanjani.

²⁸ Duuba Musani waan gumiini jed'e, Aka AABBO Waaqi waan kana ch'ufa tolchi jed'e na erge ka ammalle anini fed'i tiyya gula intolchine, akanaani beetani.

²⁹ Hojja worri kunini akuma qara duri nami duu duu, ka wonti d'ibiini worrati intahini, AABBO Waaqi na inergine.

³⁰ Ammo hojja AABBO Waaqi waan taka argani ind'agayini tolche, lafti banamte worraafi waan worri qabu ch'ufa liqimsite, aka worri ato lubbu qabu fulla ekhera d'aqu, duuba aka worri kunini AABBO Waaqa didu imbeetani.

³¹ Akuma inni dubbi hobaafateni, lafti worri ira ejaanju gadi ch'ite

³² worraafi worra isaani ch'ufa liqimsite, goli Koratifi waan worri qabu ch'ufa woliini.

³³ Duuba worraafi wonti worri qabu ch'ufti, ka lubbu qabu, fulla ekherati gabuani. Duuba lafti wolti deebite, worra lafaa d'abani.

³⁴ Gumiini Israeli ta d'aatu jirtu iyyana worra d'ageennaani baqatte waan jette, Baqad'a, aka lafti nule iliqimsine.

³⁵ Jennaani AABBO Waaqi nama d'ibba lamafi shantama ka hit'aanaani d'ufe kaani ibidaani gube hobaase.

Daboola ibida

³⁶ Jennaani AABBO Waaqi waan Musani jed'e,

³⁷ Waan atini Eleazari ilma qaallu Harunitini jettu, Daboola ibida daara worra gubate suni keesaa guuri, ch'ile daboola ibida fulla d'ibiti fageesi jissi; wonti akanatiifi daboolani ibida sunini qulqullo.

³⁸ Gaafi inni qulqullo tahe gaafa isa AABBO Waaqaa baasani. Duuba daboola ibida ka worra ibidaani hobaasani suni guuri, wolti d'od'omosi, tumi, ballisi, waan mesa fakaata ka sorio irati baasani kaaniti mamat'ansi. Aka gumi ch'ufaa akheekha taatu.

³⁹ Jennaani qaallichi Eleazarini daboola ibida suni guure biyyaani tuma ballisa jed'e, aka waan mesa fakaata suniti mat'ansani.

⁴⁰ Tunini gorsa worra Israeli gorsani, aka nami d'aloota Haruni keesa injirre, ka qaallu intahini, d'ufe hit'aana AABBO Waaqa durati inaarsine. Yo inni akasi tolche, isa akuma korafi worra isaa balleesani. Waan kana ch'ufa akuma AABBO Waaqi Musani Eliazariti himi jed'eeni tolchani.

Aka Harunini biyya baase

⁴¹ Boriyyaate gumiini ch'ufti Musafi Haruniti gungumte waan jette, Isani gumi AABBO Waaqa ya hobaaftani.

⁴² Eegi gumiini wolti baate Musafi Haruni himate, gara Waaro Woyyuma fuula deefatani, dumansa isi gubba jirufi guddinna AABBO Waaqa ka bibiliqe gubba mullatu argani.

⁴³ Musafi Harunini d'aqani, Waaro Woyyuma suni dura ejaanjani,

⁴⁴ duuba AABBO Waaqi waan Musani jed'e,

⁴⁵ Gumi tana hanqad'a, anini maruma tokotu worra ibidaani balleesa! Worri lachu gajejed'e,

⁴⁶ duuba Musani waan Harunini jed'e, Daboola ibida kanke fuud'i, ch'ile ibida ta fulla sorio iti gubani fuud'i, hit'aana ch'ile suni ira buusi, hurrisi fulla biyyaatini kooti, worra qulqulleesi, aada guutiifi. Hurrisi, dallansuuni AABBO Waaqa ya mullatte, ch'iisi d'ukuba hamani ya biyya d'aqabe.

⁴⁷ Harunini ee jed'e, daboola isaa ka ibida kaani fuud'e, jiddu gumi wolti baate taani keesa utaale. Aka ch'iisi d'ukuba hamani kaani biyya d'aqabe arge jennaani, hit'aana ch'ile ira buuse gumi qulqulleese aada guutefi.

⁴⁸ Akanaani inni ch'iisa d'ukuba hama kaani d'owe, nama jirufi ka due jiddu eje.

⁴⁹ Nami ch'iisa d'ukuba hama sunini due nama 14,700, worra goli Kora kaani male.

⁵⁰ Ch'iisi d'ukuba hamani kaani dabre jennaani Harunini fulla balbala Waaro Woyyumati Musati deebie.