Hagai 2 - KITAABA WAAQA

¹ Ganna lameeso ka hayyu Darioni lafa fide, guyya diddami toko, ka jia torbeeso, AABBO Waaqi ammalle raaga Hagai jed'aniini dubbate waan jed'e,

² Waan atini Zerubabeli, ilma Shealtieli, ka lafa fidufi Yoshua, ilma Yehosadaki, ka qaallu guddatifi ammalle gumi taani ch'ufaani jettu,

³ Isani keesa nami Mana kiyya kana aka inni duri mid'aagu arge jira? Amma yo laaltani akami jira? Woma tokole isaniti fakaata?

⁴ AABBO Waaqi Guddaani waan jed'u, Amma Zerubabeli, garaa jabaad'i; Yoshua, ilma Yehosadaki, ka qaallu gudda, atileeni garaa jabaad'i. Gumi lafa tana, isanileeni garaa jabaad'a hojad'a, anini isani woliini jira.

⁵ Gaafa isani lafa Misiri keesaa baatani, Haga jiru jireenna isani woliini taa jed'e, ammalle isanuma woliini jira, insodaatina jed'e.

⁶ Dubbini AABBO Waaqi Guddaani jed'u tana: ammalle d'iotu anini lafafi gubba yokhaani baariinifi lafa goddule chochoosa.

⁷ Anini gosa ch'ufa imballeesa, duuba waan worri qabu ch'ufa armaani d'ufani, anini Mana kana horiini guuta.

⁸ Qarsifi worqileeni ch'ufti tiyyuma.

⁹ AABBO Waaqi Guddaani waan jed'u, Mani hareesi kunini dulacha qarale ira mid'aaga; achiti anini worra kiyya nagaya guute hormaata kennaafi.

Aka raagi qaalole wa gaafate

¹⁰ Guyya diddami afreeso, ka jia sagaleeso, ganna lameeso ka Darioni lafa fidu, AABBO Waaqi Guddaani ammalle Hagaiini dubbate

¹¹ waan jed'e, Qaaloleeni, Dubbi woli gaafad'a jed'i:

¹² Yo nami guma fooni ka Waaqaa kobaa kayani fuud'e handaarati hid'ate, handaari suni qit'a yokhaani fuuto yokhaani daad'i yokhaani d'ad'a yokhaani sagale taatefu tuqe, handaari suni sagale suni aka ta Waaqaa kobaa kayani taani intolcha? Qaaloleeni taani, Hiyo jette.

¹³ Jennaani Hagaiini waan jed'e, Yo nami reefa qabate ufi t'ureese, sagaleeni suleeni ta inni qabatu int'uroofti? Qaaloleeni, Ee jetteeni.

¹⁴ Duuba Hagaiini waan jed'e, AABBO Waaqi waan jed'u, Worra lafa tanatiifi waan worri lafa keesaa argatuufi ammalle wonti worri sorio baasuleeni akuma kana t'uroofti.

Aka AABBO Waaqi aka nama eebisu kakhate

¹⁵ AABBO Waaqi waan jed'u, Isani waan isani qabate kana ingartani? Ato isani qara Mana Waaqaa jaaru jala inqabatini,

¹⁶ isani gara tuula mid'aani d'at'ani waan kintaala lama keesaa argattani seetani, ammo kintaala toko ch'alla argattani. Isani butte daad'i d'at'ani, Daad'i gorjo shantama buufanna jettani, ammo gorjo diddama ch'alla argattani.

¹⁷ Anini bubbe wo gossitufi bokaa d'akhaani roobu lafati buuse, aka wonti isani oobritani tokoleeni imbaanne, ammo isani ammalle ch'ubbu illakimne.

¹⁸ Arriti guyya diddami afreeso, ka jia sagaleeso, guyya yayaba Mana kiyya hobaasani. Waan armaa achi d'ufa laala.

¹⁹ Mid'aani kod'o keesa injirani? Zabibufi odafi okhokufi ejersi woma ya baase? Arraa achi anini isani eebisa.

Aka AABBO Waaqi Zerubabelini, Wo si tolcha jed'e

²⁰ Guyyuma suni, guyya diddami afreeso ka jia sagaleeso, AABBO Waaqi d'aamsa lameeso Hagaiti d'aame.

²¹ D'aamsi suni ka Zerubabeli, namicha gudda lafa Yuda. D'aamsi suni kana: Anini d'iotu lafafi gubbale chochoose

²² hayyufi lafa inni fidu ch'ufa garagalche, irre gosa ch'ufaa yake, gaari fardi hirkisufi ooftu isaale ch'ufa woliini garagalche hobaasa; fardooleeni rawaate, yaabattuuni isiileeni wolijeefti.

²³ Guyya suni, hojattu tiyya Zerubabeli, ilma Shealtieli, anini si fuud'e, maqa kiyyaani nama lafa fidu si tolcha. Wonti akanatiifi anini la si fohad'e. Nami waan kana jed'e AABBO Waaqa Gudda.