Habakuki 3 - KITAABA WAAQA

¹ Tunini kad'acha raaga Habakuki:

² Ee AABBO Waaqa, anini huji tante ya d'agaye, duuba guddo iraa mame si sodaad'a. Waan jabdu atini duri tolchite amma guyya keenna keesale tolchi. Ato atini dallantele, nu qaabad'u, nuu nahi.

³ Waaqi ammalle lafa Edomuti d'ufuu jira; Waaqi qulqullooni kubile Parani iraa d'ufuu jira. Guddinni isaa gubba guute, lafaleti guddo isa faarsani.

⁴ Inni aka ifsa guyyae d'ufa; harka isaa keesa ifsaani biliqa, achi fulla irreeni isaa iti d'ofamtu.

⁵ Inni d'ukuba ufi dura erge, ch'iisi hamaleeni faana isaa d'ufa.

⁶ Yo inni ejatu, lafti inchochooti; yo inni millatu, nami ch'ufti mudame hollata. Gaareeni haga jiru jireenna jirtu ya tarsaate; kubileeleeni haga duri jirtuleeni ya gallit'e, kubileeni duri inni ira deeme.

⁷ Anini worra Kushani ka mudamefi worra Midianile ka hollate arge.

⁸ Ee AABBO Waaqa, galaanati si dallansiise? Baariiniti fuula si yake? Atini dumansa yaabatte, baldooni gaari sii taate, gaafa atini dabsacha gumi teetii kennite.

⁹ Atini guube tante kurfeesite, t'iyale kurfo keeyatte, angaasuuni tante lafa tarsaafte.

¹⁰ Gaareeni si arginaani hollate; bisaani gubbaa gabaafatani. Bisaani lafa jalaleeni mandiani, d'awaani isaani guddatte.

¹¹ Hojja t'iyafi woraani kanke bibiliqu, adufi jiileeni ejaanjate.

¹² Atini dallansu guddooni lafa keesa deemte; fuuli si hammaate, gosa ch'ufa ira ejaanjatte.

¹³ Atini gumi tantetiifi hayyu atini muudde fohatte baasu d'at'e. Atini nama worra ch'ubbuti mataa lafaani d'oofte, nama isa gula yau ch'ufa balleesite.

¹⁴ Atini t'iya teetiini gudda worra duulaa woraante, hojja worri aka bubbe nu balleesu d'ufe, aka nama hiyyeeyi d'ossaani dabse gammadu.

¹⁵ Atini baariini fardoole tantetiini d'id'iite, duuba bisaani guddooni woch'ani.

¹⁶ Anini waan kana ch'ufa d'agaye hollad'e, hid'iini tiyyaleeni chochooti. Nafi kiyyaleeni laafe, miili kiyyaleeni na jalati roraa. Anini guyya Waaqi worra nu had'u gaargalchu ch'alliseti eega.

¹⁷ Ato odaani mid'aani d'abe, zabibuleeni mid'aani d'abde, mid'aani ejersa iraa d'abani, oobruleeni mid'aani baasu didde, yokhaani hooliyeeni ch'ufti hobaate, moonaani loonileeni ontele,

¹⁸ anini inuma gammade qilit'ama, waan AABBO Waaqi na baaseefi.

¹⁹ AABBO Waaqi irre tiyya. Inni aka hiddi miila na qajeelche, gufachu na d'owe, gaara gubba na tissa.