Filipi 4 - KITAABA WAAQA

¹ Tanaafi duuba, oboleyaani tiyya, anini guddo isani jaalad'a, ammalle guddo na ch'ekheesitani! Maro teesani guddo gammade, huji teesani guddo maache! Oboleyaani tiyya, aki isani jabaattani jireenna keesaniini Aabbo keesa oleju maltani akana.

² Euodiafi Sintike oboleyaani tiyya ta uwa anini isani kad'ad'a, Aabbo keesa wold'aqa.

³ Atileeni, wahela kiyya dansa, nad'eeni tana qarqaari; wonti akanatiifi worri na woliini hojate, aka odu dansa odeesani, Klementifi worra na woliini hojatu ch'ufa woliini, ka maqa worraa kitaaba jireenna keesati t'aafani.

⁴ Maro Aabbootiifi hojja ch'ufa gammada. Anini ammalle isaniini injed'a: Gammada!

⁵ Adabi keesani ka laana ha namati mullatu. Aabbooni d'iotu d'ufa.

⁶ Waan tokole inqulqulliina, ammo kad'acha teesani ch'ufa keesati waan feetani ch'ufa Waaqa kad'ad'a guyya ch'ufa galata Waaqaa deebisa.

⁷ Nageenni Waaqaa, ka nami hubachu indandeenne, garaa keesaniifi qalbi teesani inqorqorata, Kristo Yeso keesati.

⁸ Dubbi buufata, oboleyaani tiyya hojja ch'ufa dansumafi qajeelumumafi d'ugaafi balchumafi qulqulloomafi waan dansa mirgiti ta faarsu malani herega.

⁹ Waan dubbi tiyyaafi huji tiyyale keesa, nara argattani nara barattani guuta. Duuba Waaqi nagaya nuu kennu isani woliini taa.

Pauloni galata worraa deebisa

¹⁰ Anini maro Aabbootiifi guddo gammada! Eegi guyya heddu isani ammalle aka waan kiyya hereddani ya agarsiiftani. Anini qara isani waan kiyya yaalu lakiftani injenne qoomni agarsiiftanii d'abdani male.

¹¹ Isani ya na deetani injed'u; wonti akanatiifi anini aka waan qabu quufu ya barad'e,

¹² d'ipufi ballinna anini imbeekha. Waan kana ya barad'e, tanaafi hojja ch'ufa quufa qaba, ato beela qabaad'e, waan diqo guddo qabaad'ele.

¹³ Anini irre waan ch'ufaani dabsad'u qaba, jabeenna Kristoni naa kenneeni.

¹⁴ Ammo isani waan dansa tolchitani, ka gaargala kiyya keesati na qarqaartani.

¹⁵ Isani worri Filipi, imbeetani aka gaafa anini qara Makedoniaa bahe, Odu Dansa odeese gumiini Waaqa ta na qarqaarte isani ch'alla, naafi isani ch'allati, d'ipufi ballinna kiyya woliini qoodate.

¹⁶ Maro heddu Thesalonike keesati anini d'ipannaani isani qarqaarsa naa ergitani.

¹⁷ Anini qarqaarsa ch'alla argachu imfed'u; ammo aka isanileeni keesaa wo argattani fed'a.

¹⁸ Tatabeeni aka isani waan kana ch'ufa naa kennitani agarsiiftu tana isiini waan guddo! Anini waan fed'u ch'ufa ya argad'e, maro Epafroditoni waan isani ergitani ch'ufa naa d'ufeeniifi. Wonti kunini aka sorio urgooftu ta Waaqaa baasani jirti, ta inni fud'ate gammaduuni.

¹⁹ Waaqi kiyya, durooma Kristo Yeso keesa jiru ch'ufaani waan isani feetani ch'ufa isani kenna.

²⁰ Gara Waaqa Abba keenna guddinni ammafi hegerile ha jiraatu. Amini.

D'aamsa nagaya

²¹ Gumi Waaqa ta Kristo Yeso ch'ufa nagaya naa fuud'a. Oboleyaani arma na woliini jirtu nagaya d'aamti.

²² Gumiini Waaqa ch'ufti nagaya d'aamti, keesuma worri mana hayyu gudda.

²³ Eebiti Aabbo Yeso Kristo isani ch'ufa woliini jiraatiinna.