Filipi 1 - KITAABA WAAQA

¹ Maqaani keenna Paulofi Timotheo, hojattu Kristo Yeso. Gara gumi Waaqa ta lafa Filipi keesa jirtu, ta Kristo Yeso d'ugefattu, jaarole gumitiifi jara gumi Waaqa hojatu woliini:

² Waaqa Abba keennafi Aabbo Yeso Kristoni eebafi nagaya isani kenninna.

Kad'achaafi galata Paulo

³ Anini hojja isani qaabad'u ch'ufa Waaqa kiyya galata deebisa;

⁴ hojja isani kad'ad'u ch'ufa anini gammadaani kad'ad'a,

⁵ waan isani huji Odu Dansa keesati na qarqaartani, haguma guyya qaraati haga arrale.

⁶ Tanaafi anini waan kana aka dansa beekha: Waaqi ka huji dansa tana jiddu teesaniti iti keyate, gaafa Guyyaani Kristo Yesoni gahu hobaasu male illakisu.

⁷ Isani hojja ch'ufa qalbi tiyya keesa jirtani! Tanaafi anini hojja ch'ufa waan keesani akasi heregu male. Isaniini ch'ufti ya eeba Waaqi naa kenne tana qoodattani, ana ka amma hid'aansa keesa jiruufi gaafa anini duri diida jirule, aka Odu Dansa suniifi dubbad'e isi jabeesu.

⁸ Yo anini, Jaalalti anini garaa kiyya keesa qabu garaa Kristo Yeso keesaa d'ufte jed'e, Waaqileeni naa d'uga.

⁹ Kad'achaani anini isani kad'ad'u tana: aka jaalalti teesani hagasira guddatte hubacha dansaafi qalbi d'uga woliini,

¹⁰ aka isani waan ira dansa gula baatani. Yo suni Guyya Kristo wollaalafi t'uri tokole inqabdani.

¹¹ Jireenni keesani waan dadansa ka Yeso Kristoni fed'uuni guutama, aka maqa Waaqa guddisani faarsani.

Jireenni Kristo

¹² Anini wo isaniti himu fed'a, oboleyaani tiyya; yo d'ugaa dubbanne, wonti na tolchani ya Odu Dansa durati deemsifte.

¹³ Maro waan kanatifi askarti mana hayyutiifi nami arma jiru ch'ufti aka maro huji Kristotiifi na hid'ani imbeekha.

¹⁴ Anini hid'aansa keesa seennaani, oboleyaani ch'ufti guddo huji Aabbooti jabaatte jannoomte, dubbi Waaqa soda male odeesite.

¹⁵ Nami gari d'uguma qot'eefi woldidafi waan Kristo odeesa, ammo ka gari garaa dansaani odeesa.

¹⁶ Worri kunini maro jaalalatiifi waan kana tolcha, waan worri aka Waaqi arma na kaye, Odu Dansa jabeesi naani jed'e beekhufi.

¹⁷ Nami gari garaa dansaani waan Kristo inodeesu, ammo garaa d'iibitiini odeesa, waan haga anini hid'aansa keesa jiru na gargalchani sehaniifi.

¹⁸ Ammo yo akasile taate, wonti sunini woma keesa injirtu, anini guddo gammada, yo kara ch'ufaanu waan Kristo hasaani, kara qajeelafi hamaleeni. Anini ammalle ingammada.

¹⁹ Wonti akanatiifi anini imbeekha, waan kad'acha teesanitiifi maro qarqaarsa Lubbu Yeso Kristotiifi inuma gadi na lakisani.

²⁰ Wonti akanatiifi abdifi fed'iini tiyya tana — aka anini inch'eerfanne, ammo aka hojja ch'ufa, keesuma ammatana, anini garaa jabaad'u, aka jabeenna kiyya ch'ufaani Kristo ulfeesu, yo duefi yo jiraad'ele.

²¹ Jireenni maani? Naa jireenni Kristo; duisileeni naa dansa.

²² Ammo yo lubbuuni na d'eerate huji dansa hojad'e, anini ta gula bahu imbeekhu.

²³ Gama lachuyu woljaji jira. Anini jireenna kana lakise Kristo woliini tau fed'a, tanati ira na jira;

²⁴ ammo maro teesaniifi anini lafa tana gubbati hafu male.

²⁵ Anini waan kana aka dansa beekha, armati hafe isani woliini taa, aka isani d'ugefachaani gammaddani dura deemtani.

²⁶ Tanaafi yo anini ammalle fulla teesaniti deebie, isani maro kiyyafi ufi koorsitani, Kristo Yeso keesa.

²⁷ Wonti jabduuni, adabi keesani aka Oduuni Dansaani ta Kristo jettu ha jiraatu, aka ato anini d'ufe isani argu d'ibaad'ele, aka isani garaa tokooni jabaattani ejaanjattani yaada toko ch'allaani woliini haatani d'agayu, maro d'ugefacha odu dansaatiifi.

²⁸ Nyaapa keesani insodaatiina; hojja ch'ufa jannooma, wonti kunini aka isani worra dabsatani agarsiifti Waaqati dabsacha isanii kenna!

²⁹ Ayyaana keesani ka, Kristo d'ugefad'a ch'alla isaniini injenne, ammo, Maro isaatiifi gaargala isaniini jed'ani.

³⁰ Amma koota, wolumaani haana. Akuma qara aka anini had'e na agartani ammalle akasuma jira, akuma isani d'ageetani.