Filemoni 1 - KITAABA WAAQA

¹ Maqaani kiyya Paulo, nama maro Kristo Yesotiifi hid'aani, ammalle oboleesa keenna Timotheo woliini jira. Gara jaala Filemoni ka nu woliini hojannuufi. Gara jaalafi nama nu woliini hojatu Filemonifi

² gara gumi mana kanke keesati wolwoldeetufi gara oboleeti teenna Afiafi askarticha keenna ka nu woliini hojatu Arkipo tatabe tana t'aafa.

³ Waaqa Abba keennafi Aabbo Yeso Kristoni eebafi nagaya isanii kenninna.

Jaalalafi d'ugefacha Filemoni

⁴ Hojja anini Waaqa kad'ad'u ch'ufa, oboleesa Filemoni, anini maqa kanke d'ae galata Waaqa deebisa.

⁵ Anini jaalala atini gumi Waaqa ch'ufa jaalatufi d'ugefacha atini Aabbo Yeso d'ugefattu ya d'agaye.

⁶ Wonti anini hojja ch'ufa Waaqa kad'ad'u, aka wold'aqisi keenna, d'ugefacha teenna keesa, hubacha eeba ta Kristo keesa jirtu, ta hagasira guddo nuu kennu.

⁷ Jaalalti tante, oboleesa kiyya, ya gammadafi jabeenna gudda naa kennite! Wonti akanatiifi atini ya nama Waaqa ch'ufa gammachiifte.

Maro Onesimotiifi Filemoni kad'atani

⁸ Maro waan kanatifi anini sila, aka oboleesa kanke Kristo keesa, garaa jabaad'e, Waan tolchu malani tolchi siini jed'a.

⁹ Ammo waan anini si jaalad'uufi, wo si kad'ad'a. Anini waan kana ato Paulo nama maro isaatiifi hid'aansa keesa jiru taatele, inuma jed'a.

¹⁰ Tanaafi maro Onesimo, ilma kiyya, Kristo keesatiifi, anini wo sii kad'achu fed'a; hid'aansa keesati anini kara lubbutiini abba isaa tahe.

¹¹ Duri inni woma sii imbahu, ammo anafi sile amma wo nuu baha.

¹² Anini isaa siti deebisa, ammo yo akasi tolchele garaani la lama na tahe.

¹³ Anini isa arma na woliini tau fed'a, haga anini maro Odu Dansaatiifi hid'aansa keesa jiru, aka inni fulla tante na qarqaaru.

¹⁴ Taatule anini irreeni, Na qarqaari siini injed'u; ammo sii fed'i teetiini tolchitu fed'a. Tanaafi haga atini ee jettuuti anini woma intolchu.

¹⁵ Hegeri Onesimoni haga diqa toko si biraa deeme, aka eegi deebie, haga hegeri si woliini tau.

¹⁶ Amma inni tisseeniti ammo tisse ira jira; inni oboleesa Kristo keesati. Inni guddo naa jaba! Si hagasira jabaata, waan inni tissetiifi oboleesa Aabbo keesa, taheefi.

¹⁷ Tanaafi yo aka oboleesa na heregatte, akuma sila na heregattu, isaale heregad'u.

¹⁸ Yo inni wollaala tokole sii tolche, yokhaani gati tante qabaate, nati heregad'u.

¹⁹ Anini waan kana harkuma kiyyaani t'aafa: Anini, Pauloni, sii baasa. Ammo aka atini jireenna kanke maro tiyya qabdufu yaala bahi.

²⁰ Tanaafi, oboleesa kiyya, waan kana na tolchi, maro Aabbootiifi; garaa kiyya gammachiisi, aka oboleesa Kristo keesa.

²¹ Anini inheregad'a ato sii t'aafu, aka atini waan kana naa tolchitu, waan hagana ira jirule naa tolchita!

²² Ammalle fulla bulti naa tolchi, anini inheregad'a, hegeri Waaqi kad'acha teesani d'agayeti harka keesaniti na deebisa.

D'aamsa nagaya

²³ Epafraani, ka hid'aansa keesa maro Kristo Yesotiifi na woliini jiru, nagaya sii d'aama;

²⁴ worri na woliini hojatu, Marikofi Aristarkofi Demafi Lukaleeni nagaya d'aamani.

²⁵ Eebiti Aabbo Yeso Kristo ha isani woliini jiraatuuti.