Faaru 88 - KITAABA WAAQA

¹ Ee AABBO Waaqa qarqaarsa kiyya, anini guyya ch'ufa si yaamad'e, halkani ch'ufa si dura d'ufe si kad'ad'a.

² Kad'achaani tiyya ha si geetuti; boha tiyyale d'agayi, na qarqaari!

³ Gaargali guddaani ya na qabate, diquma lubbuuni na keesaa imbahini.

⁴ Irreeni ch'ufti ya nara hobaate, anini nama duu jiru fakaad'a.

⁵ Yayu reefa keesati na lakisani, anini nama fit'ani awaala keesa ch'iisu fakaad'a, ka atini deete, qarqaarsa kanke ch'ufa iraa kute.

⁶ Atini yayu boola qile dukanooftu keesa na buufte.

⁷ Dallansuuni tante nati ulfaatte, d'awaani isiileeni na ch'ach'absite.

⁸ Atini yayu jaalani tiyya na biraa fuute, worra na jibbisifte. Anini ya haada seene, dandae imbaqad'u;

⁹ gaargali ya nara dabre, lafale argu na d'owe. Ee AABBO Waaqa, anini guyya ch'ufa si yaamad'e, harka si dura qabad'e si kad'ad'a.

¹⁰ Atini nama due jette, waan mama intolchita? Worri kae si infaarsa?

¹¹ Waan jaalala tanteeti ta ind'umanne awaala keesati indubbatani? Yokhaani d'uga tante fulla irreesati indubbatani?

¹² Fulla dukana suni keesati waan mama ka atini tolchite imbeekhani? Yokhaani worra waan isaani ded'ani, lafa isaani keesati dansuma tante ini argani?

¹³ Ee AABBO Waaqa, anini si yaamad'a, na qarqaari! Diirama ch'ufa si kad'ad'a.

¹⁴ Ee AABBO Waaqa, atini maafi na lakifte, fuula kanke na d'ofata?

¹⁵ Haguma gaafa ijoolluma tiyyaati asi anini gaargale, lubbuuni qadadani na bira ejite; gaargali atini na gaargalchite ya nati ulfaate ufi na jibbaachise.

¹⁶ Atini ya aka male nati dallante, na haate na balleesite.

¹⁷ Hojja ch'ufa aka fach'aa bisaani na marsani nati gasiqani.

¹⁸ Atini jaalani tiyya jabdu naraa fuute, dukanti wahela na taate.