Faaru 85 - KITAABA WAAQA

¹ Ee AABBO Waaqa, atini yayu lafa tanteeti naate; ammalle atini yayu worra Israeli hormaatati deebifte.

² Atini ch'ubbu gumi teeti araaramteefi, wollaala worraa ch'ufale biraa deemte.

³ Atini dallansu worrati dallante galfatte, worrati dallanu dide.

⁴ Ee Waaqa, qarqaarsa keenna, ufiti nu deebisi, deebitele, nu indidiini!

⁵ Atini haga jiru jireenna nuti dallanta? Dallansuuni tante haga jiru jireenna sira ingaltu?

⁶ Nu jajabeesi, duuba, nu gumiini tante si faarsina.

⁷ Ee AABBO Waaqa, jaalala tante ta ind'umanne nu garsiisi; baafama kankele nuu kenni.

⁸ Anini waan AABBO Waaqi jed'u ch'aqasu jira; inni nu gumi isaa qulqullo nagaya nuu kakhate, yo nu kara keenna daallicha duri kaaniti deebiu baanne.

⁹ D'uguma baafami isaa nama isaa sodaatu iraa fago injiru, akasiini guddinni isaa lafa teenna keesaa imbahu.

¹⁰ Jaalala ind'umanneefi d'ugaani wold'at'e, qajeelumafi nageenni wold'ungate.

¹¹ Qajeelumti namaa lafa ira kaate oldeemte, d'ugaani Waaqaleeni gubbaa gadi ilaalti.

¹² AABBO Waaqi hormaata nu kenna, lafti teennaleeni sagale guddo baafti.

¹³ D'ugaani AABBO Waaqa dura deemte, kara hartiifi.