Faaru 78 - KITAABA WAAQA

¹ Ee gumi tiyya, barsiisa tiyya ch'aqasa, dubbi tiyyale d'agaya.

² Anini mammaasaani dubbad'e, waan duri d'ossani gabaasa —

³ waan nu duri d'ageenne baranne, ka abbootini teenna nuti himte.

⁴ Nu ijoolle teenna ind'ossinu, ammo d'aloota taka tanale, irre AABBO Waaqatifi huji isaa jabdufi waan mama ka inni tolche iti himna.

⁵ Inni aada gumi Israeliti kenne, seera d'aloota Yakobo barsiise. Inni waan abbooti teennaani jed'e, seera kiyya ilmaani teesani barsiisa

⁶ aka d'alooti taka tanaleeni barate, ilmaani ufile barsiisu.

⁷ Kara kanaani worrileeni Waaqa d'ugeefate, waan inni tolche ch'ufa qaabate, seera isaa guuta.

⁸ Akanaani worri ababoota ufi, ta mata jabaate, Waaqa dide, aka dansa garaa tokooni Waaqa d'ugeefate gula iyyaaiini iraa gora.

⁹ Worri Efraimu, ka t'iyaafi guube qabu woraani d'ufnaani kae baqate.

¹⁰ Worri wold'aqisa Waaqa woliini tolfate jabeesu dide, Seera isale ch'abse,

¹¹ waan mama ka inni duri tolche, ka ila ufiitini arge, ded'e.

¹² Ato ababooti worra ilaaltu, Waaqi diida Soani ka lafa Misiri keesati waan mama tolche.

¹³ Inni baariini gargari kute, bisaani aka girgida moga lamaani d'ad'aabe, worra jiddu dabarse.

¹⁴ Inni guyya baaldo dumansa worra dura d'aabe, halkani ch'ufa goola ibidaa worra dura kaye.

¹⁵ Inni lafa gamooji keesa siida d'akha gargari falaanse, akanaani bisaani lafa jalaa baase worra bisaani obaase.

¹⁶ Inni siida d'akha keesaa galaana yaase bisaani aka laga gabaase.

¹⁷ Ammo worri daba tolchu illakimne, lafa gamooji keesati AABBO Waaqa guddati garagale.

¹⁸ Worri sagale guddo jaalatu d'arae, akasiini Waaqa ilaalate.

¹⁹ Worri Waaqati gungume waan jed'e, D'uguma lafa aloo tana keesati Waaqi dandae sagale nu inkenna?

²⁰ D'uguma inni siida d'akhaa d'ae, bisaani aka galaana keesaa yaase; ammo inni dandae qit'afi fooni gumi isaati inkenna?

²¹ AABBO Waaqi dubbi tana d'ageennaani dallane, dallansu isaa keesaa gumi isaa ibidaani balleese;

²² wonti akanatiifi worri isa d'ugefachu dide jabeenna isaa ka inni dandae isaaniini baasule abdachu didde.

²³ Ammo inni gubbaani dubbate balbala isiile bane.

²⁴ Mid'aani gubbaa gadi buuse, sagale manna jed'ani toko worra nyaachise.

²⁵ Duuba akanaani worri sagale malaikaani nyaatu nyaate Waaqileeni waan worri fed'u ch'ufa kenneefi.

²⁶ Inni ammalle bubbe ilaboruti d'ufeeni, jabeenna ufiitini bitale bubbe kaase,

²⁷ simpirre muumme inqamne, ta aka maansa afaani galaana jirtu, gumi isaati erge.

²⁸ Simpirreeni sunini olla worraa suni ch'ufa keesati jidde, waaro ch'ufa jiddu guutte.

²⁹ Akanaani Waaqi sagale worri fed'u ch'ufa kenneefi, worri nyaate quufe.

³⁰ Ammo ato worri tae ufuma nyaatu, ka worri d'araa imbahini,

³¹ Waaqi worrati dallane, nama worra Israeli, ka kaima jajaba ch'ufa fit'e.

³² Waan kanale ch'ufa irrumaani worri ammalle ch'ubbu tolche; ato inni waan mama tolchele isaa d'ugefachu dide.

³³ Duuba akanaani inni lubbu worra aka hafuura kute, jireenna worraa yoosu hobaase.

³⁴ Hojja inni nama worra ka gari hobaasu, worri iraa hafe kaani isati deebie, ch'ubbu lakise, garaa tokooni isa kad'ata.

³⁵ Worri aka Waaqi worra qorqorate, Waaqi guddaani worra qarqaare qaabate.

³⁶ Ammo hataatuti, dubbini worri jed'e suni d'ugaaniti, wonti worri jed'e suni kiyyiba.

³⁷ Ammo worri garaa tokooni isa gulaa indeemne, wold'aqisa isa woliini tolfatani kaani injabeesine.

³⁸ Ato akasile taate Waaqi gumi isaati nahe, ch'ubbu isaani araarameefi, worra hobaasuu dide. Maro heddu inni dallansu ufiitini worra balleesu dide.

³⁹ Inni waan jed'e, worri kunini namuma woma keesa na injiru, worri qilleensuma d'ufe dabru ka keesa indeebine, fakaata.

⁴⁰ Worri maro hagami lafa aloo ta gamooji keesati isaati gargale, isa dide garaa isaa yake!

⁴¹ Worri maro heddu Waaqa laallate, Waaqa qulqullo Israelii dallansiise.

⁴² Worri irre isaa jabdufi guyya inni harka nyaapa worraa dura worra baaseefi,

⁴³ ka inni waan mama jabdu diida Soani keesa, lafa Misiri keesati tolche, ded'e.

⁴⁴ Inni bisaani galaana d'iiga tolche, worri Misiri waan d'ugu d'abe.

⁴⁵ Inni tiite worra gaargalchuufi raacha lafa worraa balleesuufi,

⁴⁶ awaanisa mid'aani worraa nyaate lafa worraa balleesu, iti erge.

⁴⁷ Inni mukha worraa ka zabibu bokaya d'akhaani roobuuni balleese, odale bokayaani balleese.

⁴⁸ Ammalle inni looni isaani bokaya d'akhaani roobuuni hobaase, ree worrale angaasuuni fit'e.

⁴⁹ Inni aka taka inargini gugubate worrati dallane, ergattu isaa, ta woi balleesitu worrati erge, aka hama worra balleese.

⁵⁰ Inni dallansu ufii galfachu dide, lubbu worrale baasuu dide, ch'iisa hama iti buuse worra hobaase.

⁵¹ Inni ilmaani d'iira ta angafa, ta worra Misiri ch'ufa, fit'e.

⁵² Jennaani inni gumi ufi aka tissitu dura deeme, lafa aloo ta gamoojiti geese.

⁵³ Inni ka worri soda womaatu inqamne, nagayaani worra gegeese, ammo baariinini nyaapa worrati fach'aate balleesite.

⁵⁴ Duuba inni lafa qulqullootini worra d'ufe, gaareeni inni harka ufiitini dabsate.

⁵⁵ Inni nama qara lafa suni keesa tau gumi ufi duraa gusse, lafa isaani gosa Israeliti gargari qoode, maneeni worraale gumi isaati kenne.

⁵⁶ Ammo worri Waaqa gudda ilaalate, isa dide seera isaale ch'abse,

⁵⁷ isati garagale, akuma abbooti worraa isa dide, akuma guubeeni dabde qonyatu tahe.

⁵⁸ Worri fulla waaqa d'ara iti kad'atu jaare waaqa d'ara suni harkani boch'ate, akanaani isa dallansiise.

⁵⁹ Waaqi waan kana arginaani guddo dallane worra isaa ka Israeli dide.

⁶⁰ Inni waaro ufii ta Shilo jirtu, fulla inni duri isi keesa nu woliini tae lakise, biraa iti d'aabate.

⁶¹ Inni Sanduqa isaa ka Wold'aqisa, ka jabeennaafi guddinna isaa nama garsiisu, harka nyaapa keennati lakise.

⁶² Inni gumi ufiiti dallane, harka nyaapa worraati worraa kenne.

⁶³ Kaima worraa ka d'iira woraana keesati fit'ani, dubarti worraaleeni d'iirsa d'abdi.

⁶⁴ Qaaloleeni woraanaani doote, nad'eeni worraale boohufi d'owani.

⁶⁵ Jennaani duuba eege, AABBO Waaqi lafaa kae, aka nama jaba daad'i d'uge iyye lafa gaargalche.

⁶⁶ Inni nyaapa ufi gusse, haga jiru jireenna ch'eerse.

⁶⁷ Ammo inni d'aloota Yusufu dide, gosa Efraimule fohachu dide.

⁶⁸ Inni fulla worraa, gosa Yudatifi gaara Sioni, ka inni guddo jaalatu, fohate.

⁶⁹ Achiti inni Mana ufi qulqullo, ka akuma worra isaa ka gubba jiru jaare; inni mana suni jaba aka d'akha tolche, haga jiru jireenna qorqorate.

⁷⁰ Inni hojattu isaa Daudi fohate ree isaa ta inni tissu keesaa fuud'e,

⁷¹ hayyu Israeli, tissitu gumi Waaqa, isa tolche.

⁷² Duuba Daudini garaa tokooni worra qorqorate, qalbi dansaani worra dura deeme.