Faaru 77 - KITAABA WAAQA

¹ Anini iyye Waaqati boha, innileeni na d'agaya.

² Hojja gaargala anini AABBO yaamad'a; anini halkani ch'ufa harka isa dura qabad'e isa kad'ad'a. Ammo waan garaa na jabeesa inargad'u.

³ Anini hojja waan Waaqa heregu, hafuurati na ch'ita, hojja anini isa qaabad'u ingagaba.

⁴ Inni halkani ch'ufa hiriba na d'owa; heregi guddani na qabate dubbachu na d'owa.

⁵ Anini gannaafi guyya dabre qaabad'a.

⁶ Anini halkani ch'ufa herega guddaani bule waan ufiini jed'u:

⁷ AABBO Waaqi haga jiru jireenna nu dida? Inni deebie nuti ingammadu?

⁸ Inni yayu nu jaalachu lakise? Kakhuuni isaa haga jirtu inteetu?

⁹ Waaqi ya namaa nahu dide? Inni dallansu keesa nuu nahu dide?

¹⁰ Jennaani anini waan jed'e, Wonti guddo na d'iba tana — Waaqi amma aka duri kaani irre inqabu.

¹¹ Ee AABBO Waaqa, anini huji tante guddo inqaabad'a; waan mama ka atini duri tolchite ch'ufa ufi qaabsisa.

¹² Anini waan atini tolchite ch'ufa herege, waan jabdu atini tolchite ch'ufa qaabad'a.

¹³ Ee Waaqa, wonti atini tolchitu ch'ufti qulqullo. Waaqi d'ibiini, ka aka kanke guddaa, lafa keesa injiru.

¹⁴ Waaqi waan mama tolchu sii; atini gosa ch'ufa irre tante garsiifta.

¹⁵ Irre tanteetiini atini gumi tante, d'aloota Yakobootiifi ka Yusufu, baafte.

¹⁶ Ee Waaqa, bisaani si arginaani sodaatani, d'immuuni baariinileeni si durati hollate.

¹⁷ Dumansi bokaya ga roobe, mandisuuni gubbaa d'ufte, angaasuuni moga ch'ufaa bibilit'e.

¹⁸ Atini mandite, angaasuuni bilit'e lafa ch'ufa guyyaasifte, laftileeni chochote hollate.

¹⁹ Atini d'awa bisaani keesa deemte, baariini qile taakite, ammo faana tante nami ingarre.

²⁰ Atini Musafi Haruni gudda gumii teeti tolchite, tissitu worra taate worraani deemte.