Faaru 74 - KITAABA WAAQA

¹ Ee Waaqa, atini maafi akana nu lakifte? Atini haga jiru jireenna gumi teeti dallanta?

² Gumi atini duri fohate, tissooma keesaa baafte, gosa tante tolfate, qaabad'i. Gaara Sioni, ka atini duri irati galtule, qaabad'i.

³ Maneeni ch'ach'absani ona tolchani tana gubba deemi, wonti akanatiifi nyaapi keenna waan Mana Waaqa keesa jira ch'ufa ya balleese.

⁴ Nyaapi kanke yayu mana kanke keesati geerare; worri yayu bandera d'aabate, aka dabsate lafa fud'atu garsiise.

⁵ Worri nama badda seene d'agaraani mukha ch'iru fakaata.

⁶ Worri d'agaraafi burisaani mukha Mana Waaqa keesani barreesani ch'ach'abse.

⁷ Worri Mana kanke ch'ach'abse ibida iti kaye; fulla iti si kad'atanile t'ureese.

⁸ Ammalle garaa ufii keesa waan jed'e, Nu worra kana aka taka inargini balleesina, worri Fulla Qulqullo Waaqa iti kad'atani, ta lafa suni keesa jirtu, ch'ufa gube.

⁹ Akheekhi woi qulqullooni ka nu mid'aafanne tokoleeni inhamne, raagi tokoleeni injiru, nami tokoleeni ka haga wonti kunini turtu beekhu injiru.

¹⁰ Ee Waaqa, nyaapi keenna haga yoomi si kobla? Worri maqa kanke haga jiru jireenna arabsa?

¹¹ Atini maafi nu qarqaaru didde? Atini maafi harka kanke ufi duubati qabata?

¹² Ammo, ee Waaqa, atini haguma duriti hayyu keenna, maro heddu nu baafte.

¹³ Atini irre tanteetiini baariini gargari kute, gorjama bisaani mata ira kute.

¹⁴ Atini mata gorjama Lewiathani jed'ani ch'arasite, reefa isaa bineensa alaati kennite.

¹⁵ Atini lagaafi madda yaafte, gaalana guddale gossite.

¹⁶ Atini halkanifi guyya uumte, aduufi jiale mid'aasite fulla isi keete.

¹⁷ Atini lafa ch'ufa gargari qoode, seera jiddu keete, bonaafi roobale mid'aasite.

¹⁸ Ammo ee AABBO Waaqa, aka nyaapi kanke si goyeesu qaabad'i. Worri si imbeekhu, tanaafi si tufata.

¹⁹ Gumi tante laaftu harka nyaapa isiiti illakisiini; gumi tante ta gaargalchani haga jirtu inded'ini!

²⁰ Wold'aqisa atini nu woliini tolfate qaabad'i. Moga lafa dukanooftu ch'ufa keesati nami wolijeesa.

²¹ Nama dabsani ch'eeru d'owi; hiyyeesi qarqaarsa inqamne ha maqa kanke faarsu.

²² Ee Waaqa, kai, ufi dubbad'i, qaabad'i aka worri si imbeenne hojja ch'ufa si koblu.

²³ Iyyanna nyaapa keetitifi lalaba worri guyya ch'ufa lalabule inded'ini.