Faaru 68 - KITAABA WAAQA

¹ Waaqi ha kae nyaapa ufii gargari firfirsuti, nami isaa jibbu ha isa duraa baqatuti.

² Akuma aari lafaa kae baddu, innileeni worra balleesa; akuma ibidi haanch'aa bassu akasuma Waaqi ch'ubbicha balleesa.

³ Ammo nami d'uga ha gammade isa durati qilit'amu.

⁴ Waaqaa sirba, maqa isa faarsa; ka dumansa yaabatu kara mid'aasaafi. Maqaani isa AABBO Waaqa — isa durati qilit'ama!

⁵ Waaqi ka mana ufii qulqullooti galu, inni abba hiyyeeyi tahe haawaani isiile qorqorata.

⁶ Inni nama ch'eekho qabu worra kenneefi nama hid'aansa keesa jirule hiikhe balchoomse, ammo nama isa didu lafa aloo ta d'eebichati galcha.

⁷ Ee Waaqa, gaafa atini gumi teetiini deemte lafa gamooji keesani godaante,

⁸ lafti chochote gubbale bokeeni roobe, maro Waaqi Israeli ka Sinaiti worrati mullate achi jiruufi.

⁹ Atini bokaya tamna roobde, lafa godde bade jireesite.

¹⁰ Gumiini tante achi qubatte, atileeni naasu tanteetiini waan hiyyeesi fed'u kenniteefi.

¹¹ Aabbooni dubbi dubbate nad'eeni hedduuni dubbi suni namati odeesite:

¹² Hayyootafi duuli worraa baqachu jira! Nad'eeni worrati hafte waan boojiani gargari qoodate;

¹³ sabaliisa qarsiini mid'aasani, ka kooli isa aka worqi bibiliqu. Isani nami gari guyya woraana maafi moona ree keesati haftani?

¹⁴ Gaafa Waaqi guddani hayyoota gaara Salmoni gubbati gargari firfirse, inni aka male roobe lafa qabaneese.

¹⁵ Gaareeni Bashani akami gugurdo! Gaareeni tunini fiit'e heddu qabdi!

¹⁶ Isani maanifi fiit'e teesani d'ed'eertu ira, gaara Waaqi fohate gubbaa tau, tufini laaltani? AABBO Waaqi haga jiru jireenna achi gubbaa taa.

¹⁷ AABBO Waaqi gaari isaa ka fardi hirkisu, ka kunki heddutiini gaara Sinai iraa d'ufe, Fulla Qulqullo seena.

¹⁸ Inni nama boojiani heddu fuud'e, fiit'e gaaratiini kore, nama isa didu iraa wofud'ata. AABBO Waaqi achiti gala.

¹⁹ AABBO Waaqa, ka guyya ch'ufa ulfinna nuraa fuud'u ha faarsani; Waaqi nu baasu isuma.

²⁰ Waaqi keenna Waaqa nama baasu; inni AABBO, Aabbo keenna, ka duisa keesaa nu baasu.

²¹ Waaqi mata nyaapa isa, ka kara ufi hama lakisu didu, ch'ach'absa.

²² AABBO Waaqi waan jed'u, Anini nyaapa keesani lafa Bashani keesaa gadeebisa; ammalle d'immu Baariini keesaa fuud'a,

²³ aka isani d'iiga worra keesa yaatani sareeni teesanileeni haga dandeetu d'iiga worra d'uddu.

²⁴ Ee Waaqa, nami ch'ufti aka atini dabsate gammadani galtu ya arge, Ee Waaqa, Hayyu kiyya, deema atini mana kanke qulqullooti galtu ya argani.

²⁵ Nami woi sirbu dura yaa, sirbituni eege yaati, jiddu keesa dubra dibbe d'ooftuti yaa.

²⁶ Gumi isaa guddo keesati Waaqa faarsa; isani d'aloota Yakobo, AABBO Waaqa faarsa.

²⁷ Qara gosa Benjamini ta ch'ufa ira diqooti d'ufa; eege jaarole Yudatifi worra isaaniti woliini d'ufa; ammalle eegi worra suni jaarole Zabulonitifi ta Naftaliti d'ufa.

^28-29 Ee Waaqa, jabeenna kanke garsiisi, ka atini Mana kanke ka Yerusalemu keesa fulla hayyooti woini sii d'uftu, ka atini nuu jette woini tolchite.

³⁰ Lafa Misiri, bineensa hama ilaadu keesati galu suni, fakeesi woi iti himi; ammalle gosa d'ibi, ta koromifi yabbiye fakaatu tana jabeesi woi iti himi, haga worri ch'ufti gajed'e qarsi sii baasuti. Worra woraanani yau kana firfirsi lafa ch'ufa keesaa balleesi!

³¹ Nama hayyuuni erguti lafa Misiriti d'ufa; gochiti Kushileeni harka olqabate Waaqa kad'ati.

^32-33 Gosa lafa ch'ufa, sirba AABBO Waaqa, ka haguma duriti gubbaa tau, faarsa, aka inni qonqo guddooni lalabe iyyu, ch'aqasa.

³⁴ Jabeenna Waaqaa odeesa; guddinni isaa Israeli gubba jira, jabeenni isaa gubba taa.

³⁵ Waaqi Israeli ka mana isaa qulqulloo d'ufu, akami nama sodaachisa! Inni jabeennaafi irre gumi isaati kenna, Waaqa ha faarsani!