Faaru 5 - KITAABA WAAQA

¹ Ee AABBO Waaqa, dubbi tiyya ch'aqasi, aka anini ufi jibbaad'e hafuura darbu d'agayi.

² Ee Waaqa kiyya, hayyicha kiyya, anini si kad'ad'a, na qarqaari! Ee AABBO Waaqa, anini si kad'ad'a.

³ Atini ganama qonqo tiyya d'ageeta; hojja biiftuuni baatu anini si kad'ad'e qonqo sira eegad'a.

⁴ Atini Waaqa ch'ubbu jaalatuniti ilti tanteeleni hameenna argu imfeetu.

⁵ Nami kiyyibaani ufi saadu tokoleeni dandae fuula kanke dura inejju; atini nama daba tolchu injibbita.

⁶ Atini d'articha balleesite, nama kiyyiba waan ijeesu ch'alla fed'u jibbita.

⁷ Maro jaalala tante guddotifi anini dandae mana kanke seena; mana kanke qulqullo keesati si kad'ad'e si durati gajed'e sii saalfad'a.

⁸ Ee AABBO Waaqa, nyaapi kiyya ya heddate, kara kanke ka d'ugaati na qajeelchi, dandi tante naa diideesi.

⁹ Wonti nyaapi kiyya jed'u waan nami dandae d'ugeefatuuniti; afaani worraa waan balleesani ch'alla fed'ani. Worri kiyyiba ch'alla qaba, arabi worra d'ara ch'alla dubbata.

¹⁰ Ee Waaqa, worra wollaala iti muri fafeesi, ha malumaani worraa worra balleesuti, maro worri siti ch'ubbame si dideefi, worra fuula kanke duraa gussi.

¹¹ Amma nami siti d'eetu ch'ufti ingammada, guyya ch'ufa qilit'ameti sirba. Nama si jaalatu qorqorad'i, maro teetifi worri gammada qaba.

¹² Nama sii saalfatu atini ineebifta, ee AABBO Waaqa; jaalalti tante aka wonte woi worra ira d'owarti.