Faaru 44 - KITAABA WAAQA

¹ Ee Waaqa, nu ya gurra keennaani d'ageenne — ababooti teennaleeni ya waan guddo atini gaafa worri jiru tolchite nuti himte;

² aka atini gosa Waaqa imbeenne gussite, gumi tante lafa worra keesa qubsiifte; ammalle aka atini gosa d'ibi gaargalchite, ammo gumi tante eebifte horsiifte.

³ Gumiini tante goraade ufiitini lafa indabsanne, yokhaani irre ufiitini infud'anne; ammo irreefi humna teetifi ammalle maro atini worra woliini jiraatte, jaalala tante garsiifteefi worri nyaapa ufi suni dabsate.

⁴ Atini hayyu kiyyafi Waaqa kiyya, ka gumi tante ta Yakobo dabsachiifte,

⁵ nuleeni jabeenna keetiini nyaapa keenna dabsanne.

⁶ Anini waan t'iyafi gubeefi goraadeeni tiyya na baaftu insehu;

⁷ ammo atini harka nyaapa keenna keesaa nu baafte, nama nu jibbule dabsate.

⁸ Nu guyya ch'ufa si faarsine, haga jiru jireenna galata sii deebimna.

⁹ Ammo amma tana atini ya nu didde, harka nyaapa keennati nu lakifte; atini aka duri kaani duula keennaani indeemtu.

¹⁰ Atini nyaapa keenna dura nu baqachifte, worri waan keenna boojie itiini d'aabate.

¹¹ Atini aka hooliye nu qaqalte, gosa d'ibi keesati nu firfirsite.

¹² Atini gumi tante gati diqooti gurgurte, aka waan worri woma keesa injirre.

¹³ Gochiti d'aatu teenna jirtu waan atini nu tolchite agarraani nu goyeesite nu kofalti.

¹⁴ Atini yayu aka gochiti ch'ufti nu tufatu nu tolchite, worri yayu fuula guure nu goyeese.

¹⁵ Hojja ch'ufa ch'eeraa fokoni na qabate waan tahu wollaala,

¹⁶ waan nyaapi kiyyafi nami na jibbuleeni na arabse na goyeesuufi.

¹⁷ Ato nu si deene wold'aqisa atini nu woliini tolfatele ch'absu baannele, wonti kunini ch'ufti ya nu qabate.

¹⁸ Garaani keenna taka sira indeebine, yokhaani kara kanke taka iraa ingorre,

¹⁹ ammo atini nu qarqaaru didde, nyeench'afi worabesati nu lakifte, dukana sipe keesa nu buufte.

²⁰ Ato nu sila Waaqa keenna lakimne, waaqa d'ibi harka dura qabanne,

²¹ atini imbeetu? Atini herega keenna ch'ufa imbeeta.

²² Ammo maro teetifi hojja ch'ufa nu ijeesani, hooliye qalma geesani nu tolchani.

²³ Ee Aabbo, kai, atini maafi teete rafta? Kai, nu indidiini, nu qarqaari!

²⁴ Atini maafi nu duraa d'okhatte, gaargalaafi d'ipu teenna deeta?

²⁵ Nu dabsani lafaani nu d'aani, amma awaara keesa ch'iimna.

²⁶ Kooti, nu qarqaari! Maro jaalala tante ta ind'umanneetiifi nu baasi!