Faaru 40 - KITAABA WAAQA

¹ Anini obse, qarqaarsa AABBO Waaqa ira eegad'e; jennaani inni na ch'aqase boha tiyya d'agaye.

² Inni boola hamtu keesaa na baase, maansa anini keesa lit'e keesaa na fuud'e, d'akha gubbaa na d'aabe na jabeese.

³ Inni faaru hareeti Waaqa keennaani faarsani na barsiise. Nami hedduuni waan kana arge sodaate AABBO Waaqa abdata.

⁴ Ayyaana isaati ka AABBO Waaqa abdate waan harkaani boch'ani kad'achuu dide, waaqoota d'araa gula deemuu didu.

⁵ Ee AABBO Waaqa keenna atini waan dansa heddu nuu tolchite; nami aka keeti tokoleeni injiru. Atini waan mama heddu nu tolchite, ka anini dandae amma toko tokooni maqa ind'oomne!

⁶ Atini soriofi waan si baasani infeetu, ammalle hori gubani sorio baasanifi ka sorio dabaani ufi iraa baasani imbarbaadu. Ammo atini gurra anini siini d'agayu naa kennite,

⁷ tanaafi anini waan jed'e, Anini kunooti; waan atini nati himu feetu ch'ufa ya kitaaba Seera keesati t'aafani.

⁸ Ee Waaqa kiyya, anini akami fed'i tante guutu fed'a! Barsiisaani tante qalbi tiyya keesa jirti.

⁹ Gumi tante ch'ufa durati, ee AABBO Waaqa, anini odu dansa ta baafama keeti odeese. Atini imbeeta, anini haga jiru, waan isii odeesu illakisu.

¹⁰ Anini odu tante ta baafama garaa kiyya keesati ind'ossine; anini hojja ch'ufa d'uga tanteetifi qarqaarsa kanke odeese. Gumi tante durati anini waan jaalala tante ta ind'umanneetiifi d'uga tante ind'ossine.

¹¹ Ee AABBO Waaqa, anini imbeekha, atini haga jirtu naa nahu indiddu. Jaalalaafi d'ugaani tante hojja ch'ufa na qorqoratti.

Aka qarqaarsa Waaqa kad'atani

¹² Gaargali hedduuni muumme inqamne ya na qabate, ch'ubbuuni tiyya ya na d'aqabde, dandae lafale inargu. Isiini henna inqabdu rifeensa mata kiyyale ira jirti, anini yayu ufi jibbaad'e.

¹³ Ee AABBO Waaqa, na baasi hurrisi na qarqaari!

¹⁴ Nama na ijeesuu fed'u ha dabsatani balleesaniti. Nama maro gaargala kiyyati gammadu ha dudda duubati deebisani ch'eersaniiti.

¹⁵ Nama na goyeesule ha mudamsiisani ch'eersani.

¹⁶ Nami siti d'ufu ch'ufti ha gammade qilit'amuti. Nami baafama kanke jaalatu ch'ufti ha guyya ch'ufa, AABBO Waaqi akami gudda! jed'uuti.

¹⁷ Ee AABBO, anini hiyyeesa laafa, irre inqamne, ammo atini inuma na qaabata. Atini baafama kiyyafi Waaqa kiyya hurrisi, kooti na qarqaari!