Faaru 25 - KITAABA WAAQA

¹ Ee AABBO Waaqa, anini si kad'ad'a.

² Ee Waaqa kiyya anini si d'aabad'a. Aka nyaapi kiyya na dabsate na ch'eerse na ingoyeesine tahu na d'owi!

³ Worra si heregatu nami dandae indabsatu, ammo ka hurre garagale si didu inuma dabsatani.

⁴ Ee AABBO Waaqa, kara kanke na garsiisi, daandi tante na barsiisi.

⁵ D'uga tante gula na qajeelchi, waan dansa na barsiisi; atini Waaqa kiyya, ka na baasu, anini hojja ch'ufa si d'aabad'a.

⁶ Ee AABBO Waaqa, naasufi jaalala tante ta ind'umanne, ta atini haguma duriti na garsiifte qaabad'i.

⁷ Ch'ubbufi wollaala gaafa anini kaima tolche biraa naa deemi; dansumafi jaalala tante ta ind'umanneeni na qaabad'i.

⁸ AABBO Waaqi dansa qajeela, tanaafi inni nama ch'ubbu karaati qajeelacha.

⁹ Inni nama ufi inguddimne kara d'uga qajeelche, fed'i ufii garsiisa.

¹⁰ Inni nama wold'aqisa isaa jabeese seera isaa guutu ch'ufa, d'ugaafi jaalala ind'umanneeni jabeesa.

¹¹ Maqa keeti jed'i, ee AABBO Waaqa, ch'ubbu tiyya heddu naa araarami.

¹² Nami AABBO Waaqa sodaatu eenu? Waaqi nama akasi suni kara fohateefi agarsiisa.

¹³ Nami sunini woi horata, ilmaani isaaleeni lafa d'aalti.

¹⁴ AABBO Waaqi nama isa sodaatu jaala tahe wold'aqisa inni worra woliini tolfate jabeesa.

¹⁵ Anini hojja ch'ufa qarqaarsa AABBO Waaqa ira barbaada, inni hojja ch'ufa gaargala keesaa na baasa.

¹⁶ Ee AABBO Waaqa, nati deebii, naa nahi, anini nama laafa wahela inqamne.

¹⁷ Gaargala kiyya naraa fuud'i, d'ipu tiyya keesaa na baasi.

¹⁸ D'ipufi gaargala kiyya ilaali ch'ubbu tiyya ch'ufa naa araarami.

¹⁹ Aka nyaapi nati heddate ilaali, aka worri na jibbu hubad'i.

²⁰ Na qorqorad'i, na baasi, ch'eera na d'owi, anini siti d'eed'a.

²¹ Dansuma tiyyafi qajeelumti tiyya ha na baaftu, nami anini heregad'u si.

²² Ee Waaqa, worra Israeli, gaargala ch'ufa keesaa baasi!