Faaru 19 - KITAABA WAAQA

¹ Gubbaani guddinna Waaqaa nama garsiifte, waan inni harka ufiitini mid'aase namati himti.

² Guyyaani guyya iti aanuti woi hima halkanileeni halkani iti aanati woi odeesani.

³ Worri afaani inqabu, yokhaani woma indubbatu, qonqo isaanile ind'agayani;

⁴ ammo qonqooni worra fulla ch'ufa guute, dubbini worraaleeni muumme lafaa d'aqabde. Waaqi adu gubba qubsise;

⁵ isiini diirama akuma nama dubra fuud'e gammadu baate, akuma qolcha nama ka gammadani ch'eu utaalti.

⁶ Isiini ilaborutiini gabaate ila galchutiini d'iiti wonti owa isi duraa d'okhata injirtu.

Seera AABBO Waaqaa

⁷ Seeri AABBO Waaqaa qit'e, irre namati tolcha. Dubbini AABBO Waaqaa yo d'ugeefatani nama woi imbeennele inqaaroomsiti.

⁸ Aadaani AABBO Waaqa qajeeltu, ka gula deemuleeni ingammada. Jechi AABBO Waaqa ka d'ugaati, qalbi namale woi hubachiisa.

⁹ AABBO Waaqa sodaachani waan dansa, sodaani tunini haga jiru jireenna teeti. Murani AABBO Waaqaa ta d'ugaati; diqole wollaala inqabdu.

¹⁰ Murani sunini worqi ch'ufa ira mid'aadi, dammale ira mioofti.

¹¹ Isiini ana, hojattu tanteeti, gorsa taati, yo anini jabeesele woi naa baati.

¹² Eenu nami dandae wollaala ufii argu? Ee AABBO Waaqa, wollaala kiyya, ka nami ingarre, naa araarami!

¹³ Ammalle ch'ubbu anini beekha tolchele duraa na baasi; isi na mohachu d'owi. Duuba akanaani anini qulqullae, ch'ubbu iraa fagaad'a.

¹⁴ Dubbi tiyyafi heregi kiyya ha si gammachiisu, ee AABBO Waaqa, siida kiyyafi baafama kiyya!