Faaru 119 - KITAABA WAAQA

¹ Ayyaana isaati ka wollaala womatu inqamne, ka Seera AABBO Waaqa gula deemu.

² Ayyaana isa ka dubbi Waaqaa guute, garaa ufii ch'ufaani isa gula deemu.

³ Inni kara waaqaa gula deema, waan hamtu intolchu.

⁴ AABBO Waaqa atini aada tante nu kennite, garaa tokooni jabeesa guuta nuni jette.

⁵ Anini guddo jabaad'e gorsa kanke gula deemuu fed'a!

⁶ Hojja anini seera kanke ch'ufa jabeese herege, nami na inch'eersu.

⁷ Anini ato aada tante barad'u, garaa qulqullooni sii faarsa.

⁸ Anini seera kanke inguuta, AABBO, haga jirtu na illakisiini.

Aka Seera Waaqaa guutani

⁹ Kaimi akami dandae qulqullumaani taa? Yo dubbi tante guute gula deeme ch'alla.

¹⁰ Qalbi tiyya ch'ufaani anini si barbaada; seera kanke iraa goru na d'owi.

¹¹ Anini dubbi tante qalbi tiyya keesa keeyad'a, aka si durati ch'ubbu intolchine.

¹² Ee AABBO Waaqa, anini si faarsa; aada tante na barsiisi.

¹³ Seera atini namaa kennite hojja ch'ufa waan isaa dubbad'e ded'u ufi d'owa.

¹⁴ Anini hori horad'ule ch'ufa ira hojja jecha kanke gula deemu gammada.

¹⁵ Anini gorsa kanke jaalad'e, barsiisa teetile qaabad'a.

¹⁶ Anini aada tante maache, dubbi tante inded'u.

Aka Seera Waaqaa iraa gammadani

¹⁷ Anini hojattu teeti, na nahi aka anini dubbi tante gula deeme, akasiini jiraad'u.

¹⁸ Ila na bani aka anini waan mama ka Seera kanke keesa jira argu.

¹⁹ Anini lafa tana gubbati keessumuma; seera kanke na ind'ossini.

²⁰ Garaani kiyya guddo d'arae, hojja ch'ufa gorsa kanke beekhu fed'a.

²¹ Atini kiyyibaa gorsite, nama seera kanke iraa gore abaarta.

²² Arabaafi tufii worraa dura na baasi, maro anini aada tante guuteefi.

²³ Ato jari lafa fidu wolti bahe waan hamtu nati malatele, anini barsiisa tante qaabad'a.

²⁴ Gorsi kanke na gammachiise kara naa qajeelcha.

Aka jabaatani Seera Waaqaa guutani

²⁵ Anini biyye keesa ch'iisa, ya ufi jibbaad'e; kakhu tante gula na jireesi.

²⁶ Anini waan tahe ch'ufa siti himannaani atini na d'ageete; kara kanke na barsiisi.

²⁷ Na qarqaari, seera kanke na hubachiisi, duuba anini waan mama ka atini tolchite herega.

²⁸ Anini yayu aka male laalefad'e ufi jibbaad'e akuma atini nati kakhate na jabeesi.

²⁹ Kara hama gula deemu na d'owi, naasu tanteetiini seera kanke na barsiisi.

³⁰ Anini yayu aka sii saalfad'u kutad'e; anini yayu dubbi tante ira ufi kaye.

³¹ Ee AABBO Waaqa, anini yayu aada tante gula deeme, na inch'eersini.

³² Anini garaa tokooni seera kanke jabeese guuta, maro atini hubacha naa dartuufi.

Aka hubacha Waaqa kad'atani

³³ Ee AABBO Waaqa, dubbi seera keeti na barsiisi, duuba anini hojja ch'ufa inguuta.

³⁴ Waan seera keeti na hubachiisi, duuba anini gula deeme, garaa kiyya ch'ufaani jabeesa.

³⁵ Seera kanke na guuchisiisi; waan inni na gammachiisufi.

³⁶ D'araa anini woini horad'uniti, ta anini seera keetiini guutu naa kenni.

³⁷ Waan woma keesa injirre gula deemu na d'owi; akuma atini kakhate na jireesi.

³⁸ Kakhu atini nama si sodaatu ch'ufa kakhate, ana hojattu tanteetile kenni.

³⁹ Araba anini sodaad'u jalaa na baasi; aadaani tante akami dansa!

⁴⁰ Anini seera kanke guutu fed'a, d'ugaa tanteetiini jireenna haraa naa kenni.

Aka Seera AABBO Waaqaa abdatani

⁴¹ Ee AABBO Waaqa, jaalala tante ta ind'umanne na garsiisi, akuma atini nati kakhate na baasi.

⁴² Duuba anini nama na miid'u dandae woi jed'aani, waan anini dubbi tante d'ugeefad'uufi.

⁴³ Hojja ch'ufa d'uga na dubbachiisi, waan anini hojja ch'ufa jecha kanke abdad'uufi.

⁴⁴ Anini Seera kanke haga jiru ch'ufa inguuta.

⁴⁵ Anini balchomaani deema, waan anini barsiisa tante guutu fed'uufi.

⁴⁶ Anini aka seera kanke hayyuleti himu inch'eerfad'u.

⁴⁷ Waan anini aada tante jaalad'uufi anini isi guutuu fed'a.

⁴⁸ Anini seera kanke sodaad'e jaalad'a; anini waan barsiisa teeti guddiseti herega.

Aka Seera AABBO Waaqaa dugeefatani

⁴⁹ Dubbi atini ana hojattu tanteetiini jette qaabad'i. Isiini yayu abdi naa kennite.

⁵⁰ Gaargala keesale, wonti garaa na jabeesa, kakhu tante ta na jireesitu.

⁵¹ Kiyyibaani hojja ch'ufa na miid'a ammo anini seera kanke iraa ingorre.

⁵² Ee AABBO Waaqa, anini seera kanke ka duri inqaabad'a inni garaa na jabeesa.

⁵³ Anini hojja ch'ubbicha Seera kanke ch'absuu argu aka male dallana.

⁵⁴ Jireenna kiyya gabaaba lafa tana kana keesati, anini sirba baase Seera kanke faarsa.

⁵⁵ Ee AABBO Waaqa, anini halkani si qaabad'e, waan seera keeti herega

⁵⁶ Anini hojja seera kanke guutu ingammada.

Aka Seera AABBO Waaqaa jaalatani

⁵⁷ Ee AABBO Waaqa, anini si male woma infed'u; anini inkakhad'a aka dubbi tante guutu.

⁵⁸ Anini garaa tokooni si kad'ad'a, akuma atini nati kakhate naa nahi!

⁵⁹ Anini waan amala kiyya herege, duuba miila kiyya kara kanke gula qajeelche.

⁶⁰ Anini harifad'e seera kanke guuta.

⁶¹ Ato ch'ubbichi t'urura keesa na buusele, anini seera kanke iwollaalu.

⁶² Anini halkani guddo damaqe kae, maro qorsumaani tante waan d'ugaatifi si faarsa.

⁶³ Anini jaala nama si sodaatu, ka seera kanke guutu ch'ufa.

⁶⁴ Ee AABBO Waaqa, lafti yayu jaalala tante ta ind'umanneeni guutamte; aada tante na barsiisi.

Waan Seeri AABBO Waaqaa namaa bahu

⁶⁵ Ee AABBO Waaqa, atini yayu kakhu tante guute, hojattu tante waan dansa tolchite.

⁶⁶ Waan anini seera kanke d'ugeefad'uufi beekhaafi qalbi naa kenni.

⁶⁷ Gaafa atini qara na inqajeelchiini, anini wollaala tolche ammo ammatana anini dubbi tante inguuta.

⁶⁸ Atini akami dansa akami namaa naata! Aada tante na barsiisi.

⁶⁹ Nami kiyyibaani ya d'ara dubbate gurra na balleese ammo anini garaa kiyya ch'ufaani seera kanke guuta.

⁷⁰ Jari kunini hubacha womatu inqabu, ammo seeri kanke na gammachiisa.

⁷¹ Gaargali atini na gaargalchite naa dansa seera kanke na barsiise.

⁷² Seeri kanke ka atini na barsiifte qarsifi worqile ch'ufa ira woi naa baha.

Seeri AABBO Waaqaa ka d'ugaati

⁷³ Atini ka na uumte, na qorqoratte; hubacha naa kenni, aka anini seera kanke barad'u.

⁷⁴ Waan anini kakhu tante abdad'uufi nami si sodaatu na arginaani gammada.

⁷⁵ Ee AABBO Waaqa, anini imbeekha, aka dubbini tante ch'ufti d'ugaa, ammalle aka atini d'uga gula gaargala nati ergite.

⁷⁶ Jaalalti tante ta ind'umanne ha na jabeesitu, akuma atini ana hojattu tanteeti kakhate.

⁷⁷ Waan anini Seera kanke jaalad'uufi, naa nahi na jireesi.

⁷⁸ Waan nami kiyyibaani d'araani na himateefi ha isa ch'eersaniiti; ammo anini waan atini na barsiiftu tahe herega.

⁷⁹ Nami si sodaatu ch'ufti ha nati d'ufuti — worri seera kanke hubatu ch'ufti.

⁸⁰ Seera kanke aka dansaa na guuchisiisi aka anini inch'eerfanne.

Aka Waaqa qarqaarsa kad'atani

⁸¹ Ee AABBO Waaqa, anini ya ufi jibbaad'e ato tae baafama kanke eegad'u; anini waan ch'ufa keesa dubbi tante abdad'a.

⁸² Ato anini tae aka atini na qarqaartu eegu, ilti na gogodde; duuba anini waan sini jed'u, Atini yoomi d'ufte na qarqaarta?

⁸³ Anini gorjo daad'i ta huji inqamne ta gatani fakaad'a; ammo anini seera kanke indeene.

⁸⁴ Anini haga yoomi eegu male? Atini yoomi nama na gaargalchu gaargalchita?

⁸⁵ Jari kiyyibaani, ka seera kanke inguunne, yayu boola naa qote na qabuu fed'a.

⁸⁶ Seeri kanke ch'ufti ka d'ugeefatani; nami ya d'araani na balleese na qarqaari!

⁸⁷ Worri diquma na balleese na inijeesiini, ammo anini seera kanke illakimne.

⁸⁸ Maro jaalala tante ta ind'umanneetiifi lubbu na baasi, aka anini seera kanke guutu.

Aka Seera AABBO Waaqaa d'ugeefatani

⁸⁹ Ee AABBO Waaqa, dubbini tante haga hegeri teeti; isiini haga jirtu ch'ufa gubbaa jirti.

⁹⁰ D'ugaani tante haga jirtu ind'umatu; atini lafa fulluma isiiti mid'aasite, isiini deebite inchochootu.

⁹¹ Wonti ch'ufti maro dubbi teetitiifi ammalle maro sii hojattufi haga arrale jirti.

⁹² Ato sila seeri kanke gammada kiyya tahu baate, anini ya gaargala kiyya keesati due.

⁹³ Anini barsiisa tante inded'u, wonti akanatiifi siti waan sunini na jireese.

⁹⁴ Anini kanketi na baasi! Anini aka seera kanke guutu ya iti game.

⁹⁵ Worri ch'ubbu gaadeti na ijeesuu fed'a, ammo anini jecha kanke hojja ch'ufa inqaabad'a.

⁹⁶ Anini yayu barad'e, aka wonti ch'ufti haga ufii qabdu, ammo seeri kanke haga inqabu.

Aka Seera Waaqaa jaalatani

⁹⁷ Ee Waaqa, anini seera kanke akami jaalad'a! Anini hojja ch'ufa tae waan isaa herega.

⁹⁸ Seeri kanke hojja ch'ufa na woliini jira, tanaafi anini nyaapa kiyya ch'ufa ira qalbi qaba.

⁹⁹ Anini nama na barsiise ch'ufa ira qalbi qaba, waan anini barsiisa tante guyya ch'ufa hereguufi.

¹⁰⁰ Waan anini seera kanke guutufi anini jaarole ira qalbi qaba.

¹⁰¹ Anini waan hamtu ch'ufa ya ira ufi d'owe, aka akasiini dubbi tante guutu.

¹⁰² Anini barsiisa tante ira ingorre, wonti akanatiifi nami na barsiisu si.

¹⁰³ Dubbini tante akami mioofti isiini damma irale nati mioofti!

¹⁰⁴ Anini qarooma seera kanke ira argad'e, tanaafi waan hamtu ch'ufa jibba.

Aka Seeri AABBO Waaqaa ifsa qabu

¹⁰⁵ Dubbini tante ifse tiyya, isiini kara naa ifsite naani deemti.

¹⁰⁶ Anini aka seera kanke ka d'ugaa guutu kakhu tiyya jabeesa.

¹⁰⁷ Ee AABBO Waaqa, gaargali kiyya gudda, akuma atini nati kakhate duu na d'owi, na jireesi.

¹⁰⁸ Waan galata ka anini sii kennu nara fud'ad'i, ee AABBO Waaqa seera kankele na barsiisi.

¹⁰⁹ Anini lubbu tiyya ya jibbaad'e, ammo taatule seera kanke indeene.

¹¹⁰ Worri ch'ubbu ya t'urura naa kaye ammo anini seera kanke iraa ingorre.

¹¹¹ Anini aada tante haga jiru jireenna injabeesa, isiini waan garaa kiyya gammachiisaati.

¹¹² Anini ya kutad'e, aka seera kanke haga jiru ch'ufa guutu.

Qarqaarsa Seera AABBO Waaqaa iraa argatani

¹¹³ Anini nama garaa lama guddo jibba, ammo Seera kanke injaalad'a.

¹¹⁴ Atini wonte tiyya ammalle fulla anini iti baqad'u; anini dubbi tante abdad'a.

¹¹⁵ Isani worri ch'ubbuu, na biraa fagaad'a; anini seera Waaqa kiyya guuta.

¹¹⁶ Akuma atini nati kakhate na jabeesi, aka anini jiraad'u; waan anini abdad'u na d'owarte na inch'eersini.

¹¹⁷ Jabeesi na qabi gaargala keesa na baasi, duuba anini aada tante hojja ch'ufa jabeese guuta.

¹¹⁸ Atini nama seera kanke guutuu didu indida; mali worraa ka sobaa woma keesa injiru.

¹¹⁹ Atini nama ch'ubbuu ch'ufa akuma huura lafati jissita, tanaafi anini waan atini na barsiiftu jaalad'a.

¹²⁰ Maro teetifi anini sodaad'e, maro seera keetile mudama.

Aka Seera AABBO Waaqaa jabeesani

¹²¹ Anini waan d'ugaa qajeeltu yayu tolche; harka nyaapa kiyyati na illakisiini!

¹²² Aka, ana, hojattu tante, qarqaartu kakhad'i; nama kiyyibaa na dabsu d'owi!

¹²³ Ilti tiyya ya baafama kanke eegaa d'at'e ufi jibbaatte, qarqaarsa atini naa kakhate.

¹²⁴ Jaalala tante ta ind'umanneeni na jaalad'i, seera kanke na barsiisi.

¹²⁵ Anini hojattu teeti hubacha naa kenni, dubbi te na barsiisi.

¹²⁶ Ee AABBO Waaqa, biyyiti Seera kanke ch'absuu jirti, hojaani atini worra woi tolchitu ya geete.

¹²⁷ Anini seera kanke worqi worqi ch'ufa ira dansale ira jaalad'a.

¹²⁸ Tanaafi anini barsiisa tante ch'ufa gula deeme kara hama ch'ufa jibba.

Aka Seera AABBO Waaqaa guutuu fed'ani

¹²⁹ Barsiisaani tante guddo dansa; tanaafi anini garaa tokooni guuta.

¹³⁰ Barsiisaani tante hojja namaa diigaani ifsa namaa taate, daallele woi hubbachifti.

¹³¹ Anini seera kanketi d'arae hafuuri na ch'iita.

¹³² Nati garagali, naa bahi, akuma atini nama si jaalatu ch'ufaa naatu.

¹³³ Akuma atini kakhate jiguu na d'owi, hameenni na indabsatini.

¹³⁴ Harka nama na dabsu keesaa na baasi, aka anini seera kanke guutu.

¹³⁵ Nati mullad'i seera kanke na barsiisi.

¹³⁶ Maro nami seera kanke guutuu dideefi, imimaani kiyya aka galaana yaani.

Seeri AABBO Waaqaa d'uga qaba

¹³⁷ Ee AABBO Waaqa, atini ka d'ugaati, seeri keetileeni qajeela.

¹³⁸ Aadaani atini namaa kennite wollaala womatu inqabdu, isiini ta d'ugaati.

¹³⁹ Waan nyaapi kiyya dubbi tante guutu diduufi anini dallane aka ibida bobae.

¹⁴⁰ Kakhuuni tante inhanqatu! Anini akami isi jaalad'a.

¹⁴¹ Anini woma keesa injiru, namileeni na tufata, ammo anini barsiisa tante inded'u.

¹⁴² D'ugaani tante haga hegeri teeti, Seeri kankeleeni ka d'ugaati.

¹⁴³ Gaargalaafi laalalti ya na qabate, ammo seeri kanke na gammachiisa.

¹⁴⁴ Barsiisaani tante hojja ch'ufa ta d'ugaati; hubacha naa kenni, na jireesi.

Aka baafama Waaqa kad'atani

¹⁴⁵ Ee AABBO Waaqa, anini garaa tokooni si yaamad'e; na jalaa owaad'i duuba anini aada tante guuta!

¹⁴⁶ Anini siti boha, na baasi, aka anini seera kanke guutu.

¹⁴⁷ Anini ganama lafaa kae qarqaarsa si kad'ad'a, wonti anini abdad'u dubbi teeti.

¹⁴⁸ Anini halkani ch'ufa hiiriba d'abe, ufuma ch'iise, kakhu tante herega.

¹⁴⁹ Ee AABBO Waaqa, maro jaalalti tante ta ind'umanneefi na ch'aqasi naa nahi, lubbu na baasi!

¹⁵⁰ Worri hamamani na gaargalchu, ka Seera kanke inguunne, ya nati d'iaate.

¹⁵¹ Ammo ee AABBO Waaqa, atini nara fago injirtu seeri kanke ch'ufti waan d'umatatiiniti.

¹⁵² Aada tante, ta atini haga jiru jireenna jabeesite badu d'owarte, anini duri barad'e.

Aka qarqaarsa kad'atani

¹⁵³ Gaargala kiyya laali, na baasi anini Seera kanke illakisu.

¹⁵⁴ Naa dubbad'i harka nyaapa kiyya keesaa ga nalakisi; akuma atini nati kakhate ga nalakisi.

¹⁵⁵ Ch'ubbichi seera kanke inguutu tanaafi baafama inargatu.

¹⁵⁶ Ammo ee AABBO Waaqa, naasuuni tante guddo; d'uga tante gula na jireesi.

¹⁵⁷ Nama na dabsuufi nyaapi kiyya heddu, ammo anini dubbi tante diqole iraa ingoru.

¹⁵⁸ Anini hojja nama si insaalfanne laalu, guddo laalefad'e worra jibba, wonti akanatiifi worri dubbi tante inguutu.

¹⁵⁹ Ee AABBO Waaqa aka anini barsiisa tante jaalad'u laali! Jaalalti tante injijiramtu, na baasi.

¹⁶⁰ Dubbini tante ch'ufti ta d'ugaati seeri kanke qajeelani ch'ufti haga jiru jireenna taa.

Aka Seera AABBO Waaqaa jaalatani

¹⁶¹ Jari lafa fidu fayyuma tana na had'a. Ammo anini dubbi tante insodaad'a.

¹⁶² Anini maro dubbi teetifi gammada gudda qaba aka nama beese guddo lafaa argate.

¹⁶³ Anini dubbi d'ara aka male jibba, ammo seera kanke injaalad'a.

¹⁶⁴ Guyya ch'ufa maro torba anini maro seera kanke ka d'ugaatifi galata sii deebisa.

¹⁶⁵ Nami Seera kanke jaalatu nagaya gudda qaba, wonti worra gufachiisa injirtu.

¹⁶⁶ Ee AABBO Waaqa, anini dubbi tante gula deeme, baafama kanke eegad'a.

¹⁶⁷ Anini barsiisa tante gula deeme garaa kiyya ch'ufaani jaalad'a.

¹⁶⁸ Anini seerafi aada tante ch'ufa guuta; atinileeni waan anini tahu ch'ufa inargata.

Aka qarqaarsa kad'atani

¹⁶⁹ Ee AABBO Waaqa, booti tiyya ha si geetu! Akuma atini nati kakhate hubacha naa kenni.

¹⁷⁰ Kad'acha tiyya naa d'agayi, akuma atini nati kakhate na baasi!

¹⁷¹ Anini afaani kiyyaani aada tante faarsa, maro seeri kanke ch'ufti d'uga taheefi.

¹⁷² Anini hojja ch'ufa si faarsa, waan atini seera kanke na barsiiftufi.

¹⁷³ Hojja ch'ufa aka na qarqaartu kurfo tai, waan anini aada tante gula deemufi.

¹⁷⁴ Ee AABBO Waaqa, anini baafama keeti guddo d'araa! Seeri kanke na gammachiisa.

¹⁷⁵ Na jireesi, aka anini si faarsu; barsiisaani tante ha na qarqaartu!

¹⁷⁶ Anini yayu aka hooliye bade kara iraa gore; anini seera kanke indeene, kooti, ana, hojattu tante, barbaadi.