Faaru 106 - KITAABA WAAQA

¹ AABBO Waaqa faarsa! Maro dansuma isaatiifi isaa galata deebisa; jaalalti isaaleeni ta jiru jireennaati.

² Eenuti dandae waan jabdu inni tolche ch'ufa hima? Eenuti dandae faaru isaa ch'ufa haga beekhe hima?

³ Ayyaana isaati ka d'uga tolche, seera isaa hojja ch'ufa guutu.

⁴ Ee AABBO Waaqa, hojja atini gumi tante eebiftu na qaabad'i; hojja atini worra baaftu nale inded'ini.

⁵ Hormaata gumi teeti na garsiisi gammada gosa tanteeti naa qoodi, aka anini qooda suni argannaani, gumi tante woliini sii faarsu.

⁶ Nu akuma ababoota teenna yayu waan hamtu taane siti ch'ubbamne daba tolchine.

⁷ Ababooti teenna gaafa lafa Misiri keesa jirtu, waan mama ka Waaqi tolche inhubanne; worri aka inni maro heddu jaalala isaa ta ind'umanne garsiise ded'e, Waaqa gudda galaana Diimati dide.

⁸ Ammo inni akuma qara kakhate kaani worra baase, akanaani jabeenna isaa gudda nama garsiise.

⁹ Inni galaana Diima yau d'owe gogose, gumi isaa lafa goddu ira taakisiise.

¹⁰ Inni harka worra worra jibbu keesaa baase, nyaapa isaanile duraa baase.

¹¹ Bisaani nyaapa worraa ch'ufa guuratani, nama tokole bahu d'owani.

¹² Jennaani gumiini isaa dubbi isaa d'ugeefate isaa faarsite.

¹³ Ammo worri yoosu waan inni tolcheefi suni ded'e, ka mala womatu isa ingaafatini ch'ee, waan d'ibi tahe.

¹⁴ Worri ato lafa gamooji suni keesa jiru sagale d'arae, Waaqa ilaalate;

¹⁵ tanaafi inni waan worri kad'ate kenneefi, ammo d'ukuba hamale worrati buuse.

¹⁶ Lafa gamooji suni keesati worri Musafi Haruni, hojattu AABBO Waaqa qulqullo, d'ibifate,

¹⁷ jennaani lafti ch'itte Dathani liqimsite, Abiramufi worra isale awaalte.

¹⁸ Ammalle ibidileeni goli worraa ira bue, worra ch'ubbu kaani gube balleese.

¹⁹ Worri gaara Sinaiti korma worqi mid'aafate, waaqa sibiila ka tumani suni kad'ate.

²⁰ Worri guddinna Waaqa jijire akheekha sanga buuyo nyaatu tolche.

²¹ Worri Waaqa, ka lafa Misiri keesati waan jabdu tolche worra baase, ded'e,

²² inni achiti waan mama ka akami tolche! Wonti inni galaana Diimati tolche waan akami mama!

²³ Gaafa Waaqi gumi tiyya imballeesa jed'e, hojattuuni isa Musani, ka inni fohate, olkae Waaqa dura eje, dallansu Waaqaa ta sila worra suni balleesitu, ira d'owe.

²⁴ Jennaani worri kakhu Waaqa dide lafa dansa sunile jibbe.

²⁵ Waaro ufii keesati hafe gungume, AABBO Waaqa ch'aqasu dide.

²⁶ Tanaafi inni worrati kakhate, harka olqabate waan jed'e; anini lafa gamooji tana keesati isani fit'e,

²⁷ d'aloota keesani gosa d'ibi keesati firfirsa, duuba worri lafa d'ibi keesati hobaa.

²⁸ Duuba Peoriti gumiini Waaqa wolti baate, waaqa d'ara ka Baali jed'ani kaani kad'ate, sorio waaqa lubbu inqamne baasani nyaate.

²⁹ Worri waan hamtu tahe, akasiini AABBO Waaqa dallansiise, d'ukubi hamaani worra qabate.

³⁰ Ammo Finehasiini kae, worra woyake kaani hobaase, akanaani d'ukuba suni lafa keesaa baasani.

³¹ Isa waan inni tahe sunifi qaabatani d'uga iti heregani, haga jiru jireennale woma sunifi qaabatani.

³² Fulla maddo Meribati worri AABBO Waaqa dallansiise, maro worraatifi Musaleeni gaargala keesa seene.

³³ Worri aka male garaa isa yake, duuba inni herega male dubbate.

³⁴ Worri gosa d'ibi, aka AABBO Waaqi worraani jed'e inhobaamne,

³⁵ ammo dubra worraa fuud'e, aada worra hamtu barate.

³⁶ Gumiini Waaqaa waaqoota d'ara kad'ate, akanaani badii ufiitini d'ufte.

³⁷ Worri ilmaani ufii ta d'iiratifi ta dubrale qale, waaqoota d'ara ka Kanaaniti sorio baase.

³⁸ Akanaani worri ijoolle woma iyyakini hobaase, laftileeni worra harka d'iiga sunini t'uroofte.

³⁹ Worri akanaani huji ufiitini ufi t'ureese, waan ch'eera hamtu tahe Waaqati wollaale.

⁴⁰ Duuba akanaani AABBO Waaqi gumi ufiti dallane jibbe.

⁴¹ Inni harka gosa d'ibiiti worra kenne, nyaapi worraaleeni worra mohate.

⁴² Nyaapi worraa worra dabse, ufi jalati bulche.

⁴³ Maro heddu AABBO Waaqi gumi ufii baase, ammo worri beekhaa isa dide, haga qara irale ch'ubbu gula bade.

⁴⁴ Ammo ha taatuti, worri AABBO Waaqati boonnani inni gaargala worra arge.

⁴⁵ Maro worraatifi inni wold'aqisa inni tolche qaabate, maro jaalala ufii guddotifi worraa araarame,

⁴⁶ nama worra dabsule ch'ufa worraa naasise.

⁴⁷ Ee AABBO Waaqa keenna, nu baasi, gosa keesati nu firfirsani keesaa nu deebisi, aka nu galata sii deebimne maqa kanke qulqullo faarsinu.

⁴⁸ AABBO Waaqa Israeli ha faarsani! Ammaafi hegerile ha faarsani! Nami ch'ufti ha Amini jed'u! AABBO Waaqa faarsa!