Faaru 105 - KITAABA WAAQA

¹ Koota, AABBO Waaqaa galata deebisa, isa yaamad'a; waan inni tolche gosa ch'ufati hima.

² Sirba isaa faarsa, waan jabdu inni tolche odeesa.

³ Waan nu nama isaa taaneefi gammada; nami isa yaamatu ch'ufti ha gammaduti.

⁴ AABBO Waaqa d'aqa, qarqaarsa kad'ad'a, hojja ch'ufa isa yaamad'a.

^5-6 Isani d'alooti Abrahamu, hojattu Waaqa, d'aloota Yakobo ka Waaqi fohate, waan mama ka Waaqi tolche qaabad'a. Dubbi inni mure inded'ina.

⁷ AABBOONI Waaqa keenna, jechi isa ka gosa lafa ch'ufaati.

⁸ Inni wold'aqisa ufii haga jiru jireenna guuta, kakhu inni d'aloota kuma tokoti kakhate.

⁹ Inni wold'aqisa Abrahamu woliini tolfateefi kakhu inni Isaaqoti kakhate guuta.

¹⁰ Inni wold'aqisa haga jiru jireenna jiru Yakobo woliini tolfate,

¹¹ waan jed'eeni, Anini lafa Kanaani sii kenna, isiini hand'ura kanke taati.

¹² Gumiini Waaqaa diqo, lafa Kanaani keesaleti keessuma.

¹³ Worri fulla tau d'abe, lafafi gosa d'ibi ch'ufa keesa mare.

¹⁴ Ammo Waaqi gosa d'ibi worra dabsuu d'owe, maro worraatifi inni hayyoota gorse waan jed'eeni:

¹⁵ Gumi anini fohad'e woma intolchina raagoota tiyyale intuqina.

¹⁶ AABBO Waaqi beela lafa worraati buuse, sagale worri qabu ch'ufa balleese.

¹⁷ Ammo inni Yusufu, ka qara aka garbicha gurgurani, worra dura erge.

¹⁸ Miila isaa sansalatani hid'ani, morma isaa qaampara iti kayani,

¹⁹ haga wonti Yusufuuni fage guutamtuti. Dubbini Waaqaa d'uga isaa murte.

²⁰ Jennaani hayyuuni Misiri isa ga d'iise, nami lafa mohatu isa balchoomse.

²¹ Hayyuuni suni gudda lafa isa isa tolche, finna lafa isa ch'ufa harka isaati deebise;

²² ammalle irreefi qarooma inni hojattu hayyuutifi jaaroleeni barsiise qajeelchu isaa kenne.

²³ Jennaani Yakobooni Misiriti godaane achi tae.

²⁴ AABBO Waaqi gumi isa horsiise nyaapa worraale ira jabeenna kenneefi.

²⁵ Inni worra Misirii gumi isaa jibbisise, worri hojattu isaa sobe mala iti d'aate.

²⁶ Jennaani inni hojattu isaa Musafi Haruni fohate iti erge.

²⁷ Worri waan Waaqaa ka mama jabdu lafa Misiri keesati tolche.

²⁸ Waaqi dukana lafa Misiriti erge, ammo worri Misiri dubbi isaa dide.

²⁹ Inni galaana worra d'iiga tolche qurt'umi worraale hobaase.

³⁰ Lafa worraa raachi ira dabre, mana hayyule raachi guute.

³¹ Waaqi dubbannaani tiiteefi biinniini lafa qabate.

³² Inni fulla bokayaa bokaya d'akhaani roobufi angaasu lafa worraati buuse;

³³ inni zabibuufi oda balleese, mukeeni ch'ufa ch'ach'abse.

³⁴ Inni dubbannaani awaanisi muumme inqamne lafati baafate.

³⁵ Awaanisi sunini mukhaafi mid'aani lafa suni keesa jira ch'ufa nyaate fit'e.

³⁶ Waaqi ilma angafa ka gosa Misiri ch'ufa fit'e.

³⁷ Jennaani inni worra Israeli lafa suni keesaa baase dura deeme; worri ka qarsifi worqi baatu, ka fayyaafi jabeenna qabu, lafa suni keesaa bahe.

³⁸ Worri Misiri worra sodaate, deema worraa iraa gammade.

³⁹ Waaqi dumansa gumi isaa ira kaye halkanile ibida ifsa worraa tahu kenneefi.

⁴⁰ Worri kad'annaani inni simpirre kenneefi, sagale gubbatiini worra quubse.

⁴¹ Inni lafa gamooji keesa siida bane, bisaani aka galaana yaa keesaa baase.

⁴² Inni kakhu qulqullo duri hojattu isaa Abrahamuti kakhate qaabate.

⁴³ Duuba akanaani inni gumi inni fohate baase dura deeme worrileeni gammade sirbe.

⁴⁴ Inni lafa gosa d'ibii worraa kenne, oobru worra sunile worraa kenne,

⁴⁵ aka gumiini isaa aadaafi seera isaa jabeesite guutu. AABBO Waaqa faarsa!