Ezekieli 46 - KITAABA WAAQA

¹ AABBO Waaqi guddaani waan jed'u, Fullo ilaboru, ta naabo garaa keesatini seenani, guyya jaa ka hojatani, balbala isii ch'ufuu malani, ammo guyya Sabatotifi guyya jila baati banuu malani.

² Hayyichi naabo alaati d'ufe balbala ilaborutini dinqa seene, d'aatu mikhikila balbala eja, ka qaaloleeni sorio isaa gubde ammalle sorio isaa ta wold'ageetile baaftu. Achiti fulla balbalati inni Waaqa kad'ate gabahu male. Balbala suni haga aduuni d'iituti ch'ufuu himmalle.

³ Guyya Sabatotifi guyya baatini d'alatu ch'ufa gumiini ch'ufti jilbifatte, balbala suni durati AABBO Waaqa kad'achuu malte.

⁴ Guyya Sabato hayyichi ha ilmoole hoola jaafi elemo toko, ka kamu aabo womatu inqamne, sorio gubani baasani AABBO Waaqaa d'ufuuni.

⁵ Elemo suni woliini inni ha mid'aani t'aasa gudda kud'ani torbafi t'aasa diqa toko d'ufuuni. Ammalle ilmoole hoola taanile woliini ha waan baasu fed'uni d'ufuti. Mid'aani Waaqa baasani kana woliini inni ha d'ad'a dulo sadii d'ufuuni.

⁶ Gaafa jila baati inni ha jibicha loonitifi ilmoole hoola jaafi elemo toko, ka kamu aabo womatu inqamne, baasuti.

⁷ Jibicha sunifi elemo suni woliini, mid'aani t'aasa gudda kud'ani torbatiifi t'aasa diqa toko baasuu malani. Ammalle ilmoole hoola taani woliini hayyichi ha waan baasu fed'u baasuti. Ammalle d'ad'a dulo sadi ha mid'aani Waaqa baasani woliini baasaniti.

⁸ Hayyichi ha dinqa fulla fullo jiru kaani bahe kara qara d'ufeeni kanini deebiuti.

⁹ Jila taatefu, biyyiti hojja wolti baate AABBO Waaqa kad'achu d'uftu, nami balbala mirgatini seene, eegi Waaqa kad'ate ha balbala bitatini bahuti, ka balbala bitatini seeneleeni ha balbala mirgatini bahuti. Nami tokoleeni balbala oli seeneeni bahu himaalle, ammo balbala taani d'ibiini bahu male.

¹⁰ Hayyichi ha hojja biyyiti d'uftu d'ufe, hojja biyyiti yaatu deemuti.

¹¹ Guyya Sabatotifi ka jila baati ch'ufa, mid'aani jibichaafi elemo woliini baasani ha t'aasa gudda kud'ani torbafi diqa toko tahaniti. Ammalle ilmoole hoola woliini abbu ha waan fed'u baase AABBO Waaqa kad'atuti. Mid'aani baasani kana woliini d'ad'a dulo sadile ha baasaniti.

¹² Hojja hayyichi fed'i ufitini waan Waaqaa baasani baasuu fed'u, waan gubani Waaqaa baasani taanaani, yokhaani sorio wold'ageetile taanaani, balbala ilaboru ta naabo garaa keesatini oli seenani ha bananiifi. Inni waan suni ha akuma guyya Sabato baasu baasuti, ammalle eegi inni keesaa bahe balbala ha ch'ufaniti.

Waan guyya ch'ufa Waaqaa baasani

¹³ AABBO Waaqi waan jed'u, Diirama ch'ufa elemo ganna toko ka aabo womatu inqamne, ha gubani AABBO Waaqaa baasaniti; waan kana ha guyya ch'ufa baasaniti.

¹⁴ Ammalle diirama ch'ufa dargaye daakhani ta kilo lamatifi d'ad'a dulo toko wolti naqani kokhorsani ha baasaniti. Aada waan AABBO Waaqaa baasani kana ha haga jiru jireenna jabeesaniti.

¹⁵ Ilmoole hoola sunifi dargaye daakhanifi d'ad'a kaani ha diirama ch'ufa haga jiru jireenna AABBO Waaqaa baasaniti.

Waan hayyutifi ka lafa

¹⁶ AABBO Waaqi waan jed'u, Hojja hayyichi qooda lafa isaa toko ilma isaati hand'ura kenne, lafti sunini hand'ura ilama suni taati.

¹⁷ Ammo hojja hayyichi qooda lafa isaa toko nama isaa hojatuu kenne, lafti sunini gaafa ganni woi wolidebisani kaani mare, deebite; ta hayyu taati; lafti tama isaati isaafi ilmaani isaa ch'allaa halaalti.

¹⁸ Hayyichi lafa nama d'ibi iraa fuud'u himmalle. Lafti inni ilmaani isaati kennuleeni ha qooduma lafa isaa taatuti, aka akanaani inni gumi tiyya nama tokole lafa isaa fud'ate indabsini.

Fulla sagale Mana Waaqa keesati d'aabani

¹⁹ Jennaani namichi balbala maneeni mirgati fuula deefattu, ta d'aatu balbala bitaa, fullo naabo garaa keesatini na d'ufe. Maneeni tunini qulqullo, ta qaaloleeni iti galtu. Inni mana suni moga isaa, ta ila adu, na garsiise,

²⁰ waan nani jed'e, Fullaani tunini fulla qaaloleeni fooni sorio dabaani ufi iraa baasani iti d'aabdu, yokhaani fooni sorio gati baasani iti d'aabdu, ammalle fulla worri qit'a Waaqaa baasani ka dargaye iti d'aabdu, aka waan qulqullo tokole naabo alaati geesani nama woma intolchine.

^21-22 Jennaani inni naabo alaa na geese, moga isii afraaniti naabo didiqo toko, ta d'eerinni isii d'und'uma afurtamatiifi ballinni d'und'uma sodoma na garsiise.

²³ Naabo didiqo suni ch'ufa d'akhaani marsani jaarani, d'aatu d'akha marsani jaarani suniti fulla ibida iti bobeesani mid'aasani.

²⁴ Duuba namichi waan nani jed'e. Tunini fulla hojattuuni Mana Waaqaa fooni nami sorio baase iti d'aabdu.