Ezekieli 44 - KITAABA WAAQA

¹ Jennaani namichi kaani fullo ala, ta Mana Waaqatini ilaboru na geese. Fullooni sunini ch'ufana qabdi.

² Duuba AABBO Waaqi waan nani jed'e, Fullooni tunini ha ch'ufansaani teetu, deebie nami imbanini. Nami tokoleeni isiini seenu himmalle, wonti akanatiifi ana, AABBO Waaqa Israeliti, fullo sunini oliseene. Tanaafi isiini ch'ufanaani tau malte.

³ Ammo hataatu, hayyuuni dandae arti d'ufe sagale qulqullo na durati nyaata, yo inni fulla fullo suni d'ufe, yokhaani artii deemu, inni ha qara dinqaani gaseene ammalle artumani bahuti.

Aadaafi seera Mana Waaqatini seenani

⁴ Jennaani namichi kaani fullo mirga keesaani na bahe, Mana Waaqa duraani na d'ufe. Duuba anini millanaani, ifsa isaa, ka bibiliqe mana suni guute, arge. Anini isa durati lafaani ufi d'oomnaani,

⁵ AABBO Waaqi waan nani jed'e, Namicha, waan atini armati agartu kana ch'ufa aka dansaa hubad'i. Anini aadaafi seera Waaqaa siti himu fed'a. Nama Mana Waaqa seenu maleefi ka seenu himmalinile gargari hubad'i.

⁶ Waan atini worra Israeli ka na didu kanani jettu, wonti AABBO Waaqi guddaani jed'u tana: Anini waan hamtu isani tolchitani kana deebie inoobsu.

⁷ Isani yayu nama gosa d'ibi, ka qabanqaba inqabanne, ka ammalle naa insaalfanne, hojja gabbinnafi d'iiga sorio naa baasani Mana kiyyati galchitini akasiini Mana kiyya t'ureesitani. Duuba akanaani gumi tiyya isani yayu waan hamtu taatani wold'aqisa kiyya ch'absitani.

⁸ Isani aada qulqullo Mana kiyya keesati jabeesu diddani, huji suni harka nama gosa d'ibiti kennitani.

⁹ Anini, AABBO Waaqi guddaani, waan jed'u, Nami gosa d'ibi ka qabanqaba inqabanne, ka yokhaani naa insaalfanne, tokoleeni Mana kiyya inseenu, ato inni gumi Israeli keesa godaanele.

Aka worra Lawi qaalole tahu d'owani

¹⁰ AABBO Waaqi waan nani jed'e, Anini worra Lawi, ka gumi Israeli woliini na lakise waan harkaani boch'ani kad'ate, ingaargalcha.

¹¹ Worri dandae Mana kiyya keesa hojate fulla balbala eege huji Mana suni tolcha, ammalle worri dandae hori gumiini baaftu, ka gubaani sorio baasani, qale huji suni ch'ufa gumii hojata.

¹² Ammo waan worri gumi Israeliti jed'e, huji waaqoota d'ara hojate, kara sunini gumi ch'ubbu keesa buusefi, anini, AABBO Waaqi guddaani, inkakhad'a, aka worra suni gaargalchani.

¹³ Worri aka qaalole tae naa hojate, waan qulqullooti d'iaate fulla Fulla ch'ufa ira Qulqulloole olseenu himmalle. Aki waan worri waan hamtu suni taheefi worra gaargalchani akasi.

¹⁴ Ammo hataatu, anini huji harka ta Mana suni keesa hojatani harka worraati kenna.

Qaalole

¹⁵ AABBO Waaqi guddaani waan jed'e, Qaaloleeni gosa Lawi, ta d'aloota Sadoki, gaafa gumiini Israeli taani na lakifte, na illakimne ammo aka dansaa garaa tokooni naa saalfate naa hojate. Tanaafi amma nami na dura d'ufe naa hojate gabbinnafi d'iiga sorio naa baasu worruma.

¹⁶ Worruma ch'allati mana kiyya seene, fulla sorio irati baasaniti naa hojate kad'acha Mana Waaqale ch'ufa tolcha.

¹⁷ Hojja worri fullo naabo Mana Waaqa ta garaa keesatini oliseenu, ha woya boofta uyifatuti. Worri hojja naabo garaa keesa yokhaani Mana Waaqa keesa hojatu, woya liilaana shuufatiini mid'aasani tokole keeyachu himmalle.

¹⁸ Worri aka indaamfine sureefi hid'a boofta keeyachu male, ammo gurda keeyachu himmalle.

¹⁹ Worri, ato naabo alaa fulla gumiini jirtu ind'anne, miha Mana Waaqa keesati keeyate kaani ufira yaase, maneeni qulqullooti lakisu male. Worri woya d'ibi naqachu male, aka woyaani qulqullooni worri naqatu taani biyya woma intolchine.

²⁰ Qaaloleeni mata ufi haadachu himmalle yokhaani dabasesule himmalle ammo rifeensa mid'aaga hagaa qabaachu malte.

²¹ Ammalle qaaloleeni, ato naabo garaa keesa inseeniini, daad'i d'ugu himmalle.

²² Qaalluuni niiti nami d'ibiini lakise fuud'u himmalle; inni dubra Israelitiifi yokhaani niiti qaalluuni d'ibiini iraa due ch'alla fuud'u male.

²³ Qaaloleeni waan qulqulloofi ka qulqullo intahini gumi tiyya gargari baafte barsiisu malte. Ammalle waan t'uri qabaatifi ka inqamnele gargari hubachiisu malte.

²⁴ Yo nami wold'abe, qaaloleeni, seera kiyya gula, dubbi worra qoru malte. Worri aadaafi seera kiyya gula jila tiyya tolfachu male, ammalle guyya Sabato ch'ufa qulqullo tolchu male.

²⁵ Qaalluuni reefa tuqe ufi t'ureesu himmalle, yo reefi sunini ka abbaafi haad'a isaa, yokhaani ka ilmaani isaa, yokhaani ka oboleesa isaa, yokhaani ka oboleeti isaa ta infuud'ini taate male.

²⁶ Eegi inni ufi qulqulleese, inni bulti torba eege,

²⁷ duuba naabo Mana Waaqa gaaraa keesa d'aqe, sorio ufiini qulqulleesu baasu male, aka dandae Mana Waaqa keesa deebie hojatu. Nami dubbi tana jed'e ana, AABBO Waaqa gudda.

²⁸ Waan anini gosa Israeliti d'aalaa kenne keesaa qaaloleeni qooda ufi ka huji qaalluma qabdi. Worri qooda lafa Israeli keesa qabaachu himmalle, wonti akanatiifi qoodi worraa anuma.

²⁹ Mid'aani Waaqaa baasanifi sorio dabaani ufi ira baasanifi horini gati sorio baasanileeni ha sagale qaalole tahuti; ammalle waan Israeli keesa naa olkayani ch'ufa worraa kennu malani.

³⁰ Qaaloleeni waan oobruuni qaraa baaftu dadansaafi waan naa baasani d'ibile ch'ufa fud'achu malte. Biyyiti hojja qit'a d'aabdu ch'ufa qit'a qara d'aabad'u ha qaalole kennitu, aka akasiini eeba tiyya argattu.

³¹ Qaaloleeni simpirree taanaani, horifi bineensale taanaani, waan tokole ka ufiini due yokhaani ka bineensi d'ibiini ijeese nyaachu himmalle.