Ezekieli 41 - KITAABA WAAQA

¹ Jennaani namichi kaani ammalle bada ballo tokotini na d'ufe, ta Fulla Qulqullo jed'ani. Karaani bada tanaani seenani, d'eerinni isaa d'und'uma jaa,

² Ballinni isaaleeni d'und'uma kud'ani. Furdinni girgida isii, ka gama lachutu, d'und'uma shani shani. Inni bada ballo suni biime, d'eerinni isii d'und'uma afurtama tae, ballinni d'und'uma diddama tae.

³ Jennaani inni dinqati oldabre mikhikila balbala isaa biime: d'eerinni d'und'uma lama ballinni d'und'uma jaa; ballinni kuta balbala suni d'und'uma torba.

⁴ Inni dinqa suni biime, d'eerinnafi ballinnileeni wolqit'ae d'und'uma diddama tae. Duuba inni waan nani jed'e, mani kunini Fulla Fulla Ch'ufa Ira Qulqullo.

Maneeni Mana Waaqati mat'ansani jaarani

⁵ Namichi furdinna girgida Mana Waaqa biime, biimani isaa d'und'uma jaa taate. Girgida suni gama alaatini maneeni didiqo, ballinni d'und'uma afuri iti mamat'ansani jaarani.

⁶ Maneeni tunini ch'ufti wolti sodoma, maneeni sodoma tana gubbati maneeni sodoma d'ibi ta dachaa lama wolgubbati jaaraniti jira. Girgidaani Mana Waaqa jalati ballate furdate, gubbati qalata, aka akanaani maneeni wolgubbati jaarani kaani girgida suniti hirkate, ammo aka d'ibi iti inejine.

⁷ Duuba akanaani girgidaani Mana Waaqa, hojja alaa laalani, waan furdinni isaa jalafi gubbeleeni haga takaa fakaata. Maneeni Mana Waaqati mat'ansani jaarani suni alaani faano lama baballo iti jaarani, aka akanaani nami maneeni woligubati jaarani taani iti olkoru.

^8-11 Furdinni girgida maneeni tana d'und'uma shani; balbala tokoti jira, ta maneeni Mana Waaqa moga mirgaatini iti mat'ansani jaarani taanini oliseenani, ammalle toko d'ibiti jira, ta maneeni gama bitatini seenani. Anini Mana Waaqa suni ka d'akhaani qarrisani marsani jaarani arge. Ballinni ijaarsa suni d'und'uma shani, lafa ira old'eerinnileeni d'und'uma jaa. Old'eerinni isaa sunini yayaba maneeni Mana Waaqati mat'ansani jaarani taanini wolqit'aa. D'akha Mana Waaqatini marsani jaarani kanafi maneeni qaalole taani jiddu, lafa akanumati hafteti jira, ta ballinni isii d'und'uma diddama; lafti akasi suni Mana Waaqa moga ch'ufa jirti.

Mana ila adu

¹² Muumme lafa akanumati lakisani taani, Mana Waaqatini ila adu, mana tokoti jira, ka d'eerinni isaa d'und'uma sagaltama, ka ballinni d'und'uma torbatama; furdinni girgida isaa ch'ufti d'und'uma shani.

Biima Mana Waaqa

¹³ Namichi Mana Waaqa suni gama ala biime, biimani isaa suni d'und'uma d'ibba toko taate. Ammalle boro Mana Waaqatifi lafa akanumati hafte taanifi boro mana Mana Waaqa iladu eju kaani jiddu biiminaani d'und'uma d'ibba toko taate.

¹⁴ Ballinni Mana Waaqa suni dura, lafa akanumati hafte ta moga moga Mana Waaqa jirtu taani woliini, d'eerinni d'und'uma d'ibba toko.

¹⁵ Inni ammalle ballinna mana Mana Waaqa ila adu eju kaanifi kara moga isaa lachu deemu kaani biime, sunileeni d'und'uma d'ibba toko tae. Bada Mana Waaqatifi fulla Qulqulloofi Fulla Fulla Ch'ufa Ira Qulqulloole

Aka keesi Mana Waaqa jiru

¹⁶ haga jala iti keeyatani, haga deresha maneeni ka oli ch'ufa, mukha siriirsani woliini qabani manati mat'ansani marsani jaarani. Deresha sunile dandaani duuchani.

¹⁷ Girgida Mana Waaqa ka garaa keesa, mata balbala gubbati d'aabani, naafa isaa ch'ufa,

¹⁸ waan aka meet'i boch'anifi bineensa koola qabuuni barreesani ch'okhani, meet'i sunifi bineensa koola suni woli keesa makhani, ch'ororsani, mana suni garaa ch'ufa keesani barreesani. Bineensi sunini ch'ufti fuula lama qaba:

¹⁹ Fuuli toko ka namati; inni meet'i moga tokoti fuula deefata; kaani ka nyeench'ati; kunileeni meet'i moga taaniti fuula deefata. Wonti kunini girgida mana suni ch'ufa akasuma garaa keesani marsite ira jirti.

²⁰ Haguma lafaa ejite mata balbala ch'ufa gubbati ejiti.

²¹ Mikhikili Fulla Qulqullo ch'ufti wolqit'e. Balbala Fulla Fulla Ch'ufa Ira Qulqullo dura, waan mesa fakaata, ka sorio irati qalani,

Waan mesa fakaata ka sorio irati qalani

²² ka mukhaani jaaraniti jira. Old'eerinni isaa d'und'uma sadi, ballinni isaaleeni d'und'uma lama. Miila isaa afraniifi waan inni ira ejaanjufi moga isa ch'ufa mukhaani mid'aasani. Namichi waan nani jed'e, mesaani kunini ka AABBO Waaqa dura d'aabani.

Balbala fulla fulla

²³ Fulla Fulla Qulqullooni seenanifi Fulla Fulla Ch'ufa Ira Qulqullootini seenanile balbalati jira.

²⁴ Balbalti sunini ch'ufti lama lama, tamu gama gamati bananiti.

²⁵ Balbala Fulla Qulqulloole akuma girgida mana, meet'ifi bineensa koola irati barreesani ch'okhani. Ammalle dinqa suni, balbala isaa gubbaa, moga ala gaadisa mukhaani iti jaarani.

²⁶ Bada qara seenani moga lachu deresha jira, girgida isiile meet'ini barreesani ch'okhani.