Ezekieli 36 - KITAABA WAAQA

¹ AABBO Waaqi waan jed'e, Namicha, gaareeni Israeli tanati dubbad'i waan jettu, Ee gaareeni Israeli, dubbi AABBO Waaqa d'agaya;

² nyaapi keesani qilit'ame waan jed'e, Amma tana gaareeni Israeli ta duri jirtu ch'ufti teenna!

³ Tanaafi amma fagi waan jettuuni, AABBO Waaqi guddaani waan jed'u: gaafa gochiti d'ibiini ta nyaapa keesani isani qabde isani saamte, worri gaafasi worra Israeli miid'e.

⁴ Tanaafi ee, gaareenii Israeli waan AABBO Waaqi guddaani jed'u d'agaya. Wonti inni gaareenifi kubileefi maddafi baleefi onneeni teesanifi dira keesani ka nyaapi keesani balleese waan keesa jira ch'ufa saame, iti tabateeni jed'u tana.

⁵ Anini, AABBO Waaqi guddaani, owa dallansu tiyya keesa, yayu gosa d'aatu teesani jirtu ch'ufa, keesuma gosa Edomuti dubbad'e. Worri na tufate lafa tiyya waan isiini qabdu ch'ufa saame gammaddani fud'ate.

⁶ Tanaafi waan lafa Israeli fagi; gaareenifi kubileefi maddafi baleeni waan jettu, AABBO Waaqi guddaani waan jed'u, waan gochiti d'ibiini isani arabsite isani ch'eersiteefi, anini obsu dad'abe dallansu tiyya keesa worrati dallana.

⁷ Anini, AABBO Waaqi guddaani waan jed'u, Anini inkakhad'a, aka gochiti d'aatu teesani jirtu tunini ch'ufti ch'eeraani baddu male inteenne.

⁸ Ammo isani, gumi tiyya ta Israeli gaareeni teesani gubba mukeeni deebite obeensaafi mid'aanile baafti Isanileeni d'iotu lafa teesaniti galtani.

⁹ Anini gama keesani jira waan ch'ufa keesati isani eebise, isani lafa qotattani fach'aafattani.

¹⁰ Anini nama keesani daraarse, lafa ira dabarse isani dira keesani ka duri bade ona tae kaani ch'ufa jaartani iti qubattani.

¹¹ Anini namaafi saa keesani ch'ufa horsiise lafa ira dabarsa. Isani lafa ira dabartani, ilmaani heddu d'altani. Anini akuma duri isani achi teetani kaani achi isani teesise, haga duri kaanile ira isani horsiise, isani deebansa. Duuba akanaani aka anini AABBO Waaqa beetani.

¹² Anini isani, gumi tiyya ta Israeli, lafa tanati deebise iti isani qubsisa. Lafti tunini teesani taati, ilmaani teesanileeni deebite imbeeloftu.

¹³ AABBO Waaqi guddaani waan jed'u, Duri lafti goorjama namati taate nama nyaate ilmaani nama jalaa guurate jed'ani.

¹⁴ Ammo armaa achi lafti deebite goorjama taate ilmaani teesani inguuratu. Nami dubbi tana jed'e ana, AABBO Waaqa gudda.

¹⁵ Lafti deebite gosa isi goyeesitufi nama isi miid'u inch'aqaftu lafti deebite ilmaani nama jalaa inguuratu. Nami dubbi tana jed'e ana, AABBO Waaqa gudda.

Finna haareesa worri Israeli fidamu

¹⁶ AABBO Waaqi na yaame waan nani jed'e,

¹⁷ Namicha, gaafa worri Israeli lafa ufi keesa tau kaani, worri woma taheeni lafa ufi t'ureese. Anini ammalle worra suni jibbe, worri niiti aada uwa qabdu, ta qulqullo intahini nati fakaate.

¹⁸ Waan worri lafa suni keesati nama fit'e Waaqa harkaani boch'ani kad'ateefi, anini worrati dallane.

¹⁹ Anini finna worra kana jibbe lafa gosa d'ibi keesati worra firfirse.

²⁰ Worri fulla yau ch'ufati maqa kiyya qulqullo balleese; wonti akanatiifi nami worra argu ch'ufti waan jed'u, worri kunini gumi AABBO Waaqati, ammo lafa inni kenneefi suni keesumaa baasani.

²¹ Waan worri Israeli fulla deemu ch'ufati maqa kiyya qulqullo yakeefi, garaani na hammaate.

²² Tanaafi amma tana waan atini worra Israelitini jettu, AABBO Waaqi guddaani waan jed'u, anini waan amma tolchu kana isani worra Israeliti jed'e intolchu, ammo maro maqa kiyya, ka isani fulla yaatani ch'ufati balleesitanifi, tolcha.

²³ Yo anini gosa ch'ufa qulqullooma maqa kiyya jaba, isani nama ch'ufa durati balleesitani kana garsiisu — worri hojja suni aka anini AABBO Waaqa beekha. Nami dubbi tana jed'e ana, AABBO Waaqa gudda. Anini isaniini qulqullooma kiyya gosa ch'ufa garsiisa.

²⁴ Anini gosa ch'ufafi lafa ch'ufa keesaa wolti isani guure lafa teesaniti isani galcha.

²⁵ Anini bisaani qullo isaniti fifit'e, akasiini waaqoota d'ara ka isani kad'atanifi waan hamtu isani ufiini t'ureesitani ch'ufa isani iraa qulqulleesa.

²⁶ Anini garaa haareesafi qalbi hareeti isanii kenna. Anini garaa keesani jajaba aka d'akha suni jijire, garaa laana ka Waaqaa saalfatu isanii kenna.

²⁷ Anini lubbu tiyya isani keesa kaye, seera kiyyafi aada anini isanii kenne ch'ufa isani guuchisiisa.

²⁸ Duuba isani lafa anini ababoota teesanii kenne keesa teetani, gumi tiyya taatani, aninileeni Waaqa keesani taha.

²⁹ Anini waan isani t'ureesa ch'ufa keesaa isani baase, isanii eebise, lafti teesanileeni aka isani deebitani beela ingarre, mid'aani guddo isanii baafti.

³⁰ Anini mukeeni teesani ta mid'aanitifi oobru teesani ch'ufa eebise, isiini guddo sagale isanii baafti, aka isani deebitani beelooftani gosa d'ibi durati inch'eere.

³¹ Isani huji teesani hamtufi wollaala isani tolchitani qaabatani, maro dabaafi ch'ubbu teesani tanaatiifi ufi jibbitani.

³² Worra Israeli, anini waan kana ch'ufa isanii jed'e intolchu, beekha. Wonti anini fed'u aka isani waan hamtu tolchitani kaani iraa ch'eertani, ch'eeri keesani mullatu. Nami dubbi tana jed'e ana, AABBO Waaqa.

³³ AABBO Waaqi guddaani waan jed'u: Guyya anini ch'ubbu teesani isani iraa d'iqu, anini dira keesani ka bade ona taheti isani deebise, duuba isani dira suni ch'ufa ammalle jaartani.

³⁴ Nami qara d'aatu oobru teesani bahe ch'ufti, aka isiini badde raasa taate ya arge, ammo isani iti deebitani qotatani.

³⁵ Duuba nami ch'ufti waan jed'u, lafti tunini ta duri badde ona taate ya aka oobru Edeni taate ammalle dira ch'ach'absani saamani ona tolchani kaani yayu iti qubatani jabeesani jaarani.

³⁶ Duuba akanaani gochiti d'aatu teesani jirtu, ta woraana jalaa baateleeni, aka anini, AABBO Waaqi, dira bade ona tae jaare, oobru badde raasa taatele oobre beeti. Dubbi tana ana, AABBO Waaqati jed'e, guutu male intau.

³⁷ AABBO Waaqi guddaani waan jed'u, Anini ammalle kad'acha worra Israeli d'agaye, waan worri fed'u ch'ufa guutaafi: Anini worra daraarse deebanse aka hoola ree lafa ira dabarsa.

³⁸ Dira amma bade ona tae kana akuma duri dira Yerusalemu hooliyeeni jila sorioti qalani guute, akasuma nami guuta. Duuba akasiini aka anini AABBO Waaqa beekhani.