Ezekieli 34 - KITAABA WAAQA

¹ AABBO Waaqi na yaame waan nani jed'e,

² Namicha, worra lafa Israeli mohatu abaari waan jettuuni, wonti AABBO Waaqi guddaani jed'u tana: Isani tissituuni Israeli ya baddani! Isani ufuma qorqoratani male, hooliye inqorqoranne.

³ Isani aanani d'uddani, woya dabassa hooliyeetini mid'aafattani, hooliye gagabbo qalatani nyaattani, ammo hooliye suni diqole injabeesine.

⁴ Isani hooliye suni ta haalate inqorqoranne, ta fayya inqamne infayyimne, ta ch'ach'abt'ele inhiine, ta kara iraa gortele indeebimne, yokhaani ta badele barbaaddani ingalchine, ammo isani nahuufi diddani dabsitani.

⁵ Waan hooliyeeni sunini nama tissu inqamneefi isiini fulla ch'ufati gargari bitinoofte, bineensi ala hobaase.

⁶ Duuba akanaani hooliyeeni tiyya kubileefi gaareeni d'ed'eertu ch'ufa ira yaate, lafa ch'ufa keesati bitinoofte, ka nami tokoleeni isi barbaade yokhaani odu isi inkaasini.

⁷ Tanaafi amma isani tissitu waan anini, AABBO Waaqi jed'u ch'aqasa.

⁸ Anini inkakhad'a waan bineensi ala hooliye tiyya ta tissitu d'abde had'e nyaate, ammalle waan tissituuni sunini hooliye tiyya ta bade barbaadu didde ufi qorqoratte ammo hooliye suni yaalu diddeefi,

⁹ isani worri tissitu, dubbi AABBO Waaqa ch'aqasa.

¹⁰ Anini, AABBO Waaqi, guddaani yayu isaniti nyaape, anini aka isani iti deebitani tissitu tiyya intaane, hooliye tiyya isani iraa fud'ad'e, aka isani ufi ch'alla maamulatani deebie ee injed'u. Anini hooliye tiyya harka keesanii fuud'e nyaata isii isani d'owa.

Tissitu dansa

¹¹ AABBO Waaqi guddaani waan jed'u, Anumati hooliye tiyya barbaade qorqorata.

¹² Akuma tissituuni ree ufi, ta gargari firfirfamte, wolti deebise qorqorattu, aninileeni akasuma hooliye tiyya ta guyya dumansa ka dukana gargari firfirmte, fulla ch'ufaa wolti guure qorqorad'a.

¹³ Anini lafa gosa d'ibi keesaa worra baase, wolti deebise, lafa isaniti galcha. Anini gaareenifi madda Israeliti worraa deebise, marra dansa tissa.

¹⁴ Anini gaarafi baleele keesa nagayaani worra marra dansa tikhachisa, ammalle marra dansa lafa Israeli ch'ufa.

¹⁵ Anumati hooliye tiyya tisse isi fulla boqota iti barbaada. Nami dubbi tana jed'e ana, AABBO Waaqa gudda.

¹⁶ Anini ta bade barbaade ta d'eeda gortele d'ae woli gula deebise ta ch'abt'e hid'e, ta fayya d'abde fayyisa; ammo ta gabbatte irre baafte inqaqala, wonti akanatiifi anini tissitu waan d'uga ch'alla tolchitu.

¹⁷ Duuba amma, hooliye tiyya, waan keesani ka anini, AABBO Waaqi guddaani, jed'u ch'aqasa: Anini isani dadansaafi hamamole gargari baase, hoolafi laleesale gargari foha.

¹⁸ Isani hagi gari marruma dansa nyaattani kanale balfitani nyaachu diddani miilaani ira ejaanjattani! Bisaani qullo d'uddani, ka isani iraa hafele keesa ejaanjattani booreesitani?

¹⁹ Ammo hooliyeeni tiyya d'ibiini marra isani ira ejaanjattani kaani nyaate, bisaani isani booreesitani kaanile d'uddi.

²⁰ Tanaafi AABBO Waaqi guddaani waan woraani jed'u, Anumati hooliye gagabboofi huhuqole gargari foha.

²¹ Ammo isani, ta fayya inqamne gaafa keesanini haatani hooliye keesaa baaftani.

²² Ammo anini hooliye tiyya waan kana jalaa baase, aka ituma deebiani indabsine tolcha. Anini hooliye tiyya ch'ufa fohe dansaafi hamtu gargari baasa.

²³ Anini hayyu aka hojatu tiyya Daudi jiru worraa kenna, ka tisse worra qorqoratu.

²⁴ Anini, AABBO Waaqi, Waaqa worraa tae, Hayyuuni hojatu tiyya Daudi fakaatuleeni worra mohata. Nami dubbi tana jed'e ana, AABBO Waaqa.

²⁵ Anini wold'aqisa nagayaa worra woliini tolfad'e bineensa hamama lafa keesa jiru ch'ufa balleesa, aka akanaani hooliyeeni tiyya nagayaani diidafi baddale keesa oolte bulti.

²⁶ Anini isii eebise, d'aatu gaara kiyya qulqullo, tisse, gannaafi hagayya roobaafi.

²⁷ Duuba mukeeni ch'ufti mid'aani baafte, oobruleeni ch'ufti sagale baafte, nami ch'ufti nagayaani fulluma ufi taa. Hojja anini sansalata gumi tiyyaani hid'ani ch'abse worra worra boojie tisse tolfate kaani jalaa baasu, hojja suni worri aka anini AABBO Waaqa beekha.

²⁸ Gochiti Waaqa imbeenneleeni itumaa deebite worra haate insaamtu, ammalle bineensi alaalleni itumaa deebie worra nyaate infit'u. Worri nagayumani taa, nami deebie worra mudamsiisu injiru.

²⁹ Anini lafa guddo mid'aani baaftu worraa kenne beelale lafa suni keesaa balleesa. Gochiti d'ibileeni deebite worra goyeesite intufattu.

³⁰ Duuba akanaani nami ch'ufti imbeekha aka anini Israeli qorqorad'u, aka worrileeni gumi tiyya. Nami dubbi tana jed'e ana, AABBO Waaqa gudda.

³¹ Isani hooliye tiyya ta anini tissu, aninileeni Waaqa keesani. Nami dubbi tana jed'e ana, AABBO Waaqa gudda.