Ezekieli 32 - KITAABA WAAQA

¹ Guyya qara, ka jia kud'ani lama, ka ganna kud'ani lameeso, ka nu haga nu boojiani teenne, AABBO Waaqi na yaame waan nani jed'e,

² Namicha, hayyu Misiri aka dansa gorsi waan jettuuni: Atini gosa d'ibi aka nyeench'a mohata, ammo nyeench'a suni ira atini nyaacha galaana dakhaatu fakaata. Atini miila keetiini bisaani booreesite galaana t'ureesita.

³ Hojja gochiti hedduuni wolti baatu, anini t'ururaani si qabe, worri bisaani keesaa si hirkisa.

⁴ Anini fuud'e ala si buuse allaatiifi bineensa alalle ch'ufa si nyaachisa.

⁵ Anini gaareenifi baleele reefa kanke ka shameeni guuta.

⁶ Anini d'iiga kanke jisse gaareenifi galaanaleeni guuta.

⁷ Hojja anini lafa si balleesu suni, anini gubba d'osse, urjile mullachu d'owa. Aduuni duumansa lit'e, jiileeni dukanaa.

⁸ Anini ifsa gubba jiru ch'ufa d'aanfe lafa ch'ufa dukana sipe tolcha. Nami dubbi tana jed'e ana, AABBO Waaqa gudda.

⁹ Hojja anini lafa isani taka waan isii ind'agayini keesati odu badi teesani odeesu, gochiti hedduuni imaadefati.

¹⁰ Wonti anini si tolchu sunini gosa heddu rifachiifti. Hojja anini goraade tiyya raraase d'ufe, hayyootileeni mudamte holatti. Guyya atini baddu suni hayyoota ch'ufa lubbuuni d'ufte holatti.

¹¹ AABBO Waaqi guddaani waan hayyu Misiritiini jed'u, Atini goraade hayyu Babilonitini badda,

¹² ammalle anini askarti gosa naasu inqamne, ta goraadeeni nama hobaaftu, siti erge, worri d'ufe nama kanke ch'ufa hobaasa — nama kanke ch'ufafi waan kanke ka atini koorte mataani d'aabdu ch'ufa hobaasa.

¹³ Anini ela ch'ufa irati looni kanke hobaase, duuba akanaani namafi saa ka bisaani booreesu d'abani.

¹⁴ Anini bisaani kanke ka boorae qulleese, galaana kankele laana yaasa.

¹⁵ Hojja anini lafa Misiri ona tolche nama keesa tau ch'ufa balleesu, worri aka anini AABBO Waaqa beekha.

¹⁶ Gorsi jabaani kunini faaru boha namaa taha. Nad'eeni gosa ch'ufa booteefi faarsiti. Nami dubbi tana jed'e ana, AABBO Waaqa gudda.

Boola ekhera

¹⁷ Guyya kud'ani shaneeso, ka jia qara ka ganna kud'ani lameeso, ka nu haga nu boojiani teenne, AABBO Waaqi na yaame waan nani jed'e,

¹⁸ Namicha, nama lafa Misiri keesa tau heddu muumme inqamne suni bohi. Gosa jajabdu taani woliini boola ekherati worra galchi.

¹⁹ Waan jettuuni: Isani waan nama ch'ufa ira mid'aadani ufi seetani? Isani boola ekherati galtani, nama Waaqa imbeenneni woliini teetani.

²⁰ Worri Misiri nama woraanaani hobae woliini raawata. Goraadeeni kurfo jirti, aka worra lafaa hobaaftu.

²¹ Jara duri jannoomaani gurra baafateefi ammalle jari woraana keesa worra Misiriti kalche, ka amma due boola ekhera keesa jiru, boola suni keesati worra Misiri ka raawateeni dubbate waan jed'u: Worri waaqa imbeenne ka woraanaani raawate kaani, ya arma d'ufe, ka ch'iisu kana, laala!

²² Worri Ashuru ka irreesi askarti isaani marse woli gaheleeni achi jira. Worri kunini ch'ufti woraanaani hobae,

²³ awaali worraleeni qile boola ekhera ke jira. Askartini worraa ch'ufti woraana keesati d'umte irreesi worraleeni awaala isanii marse woli gahe. Ammo qara duri askartini tunini, gaafa jirtu, guddo nama mudamsiifti.

²⁴ Worri Elamuleeni, ka irreesi askarti isaani marse, achi jira. Askartini sunini ch'ufti lola keesati raawate, ato qabanqaba inqabatini boola ekherati gabuute. Worri gaafa jiru nama mudamsiise, ammo amma ya raawatani ch'eera irati hafani.

²⁵ Ammalle worri Elamu worra woraanaani hobae woliini ch'iise, irreesi askarti isaanileeni worra marse woli gahe. Worri ch'ufti ato qabanqaba inqabatini woraanaani hobae. Worri gaafa jiru nama mudamsiise, ammo amma ya raawate ch'eera irati hafe, qooda worra woraanaani hobae argate.

²⁶ Meshikifi Tubalileeni, ka irreesi askarti worraa marse woli gahe, achuma jirani. Worri kunini ch'ufti ato qabanqaba inqabatini raawate; ammo duri gaafa jirani guddo nama mudamsiisani.

²⁷ Worri kunini awaala dansa ka aka jannooti duri argate kaani, inarganne. Worra suni miha worraa ka duula kaani woliini awaalani, goraade mata jala naqani wonte worrale iti gogombisani. Jari jannooti kunini gaafa jiru guddo nama mudamsiise.

²⁸ Aki worri Misiri hobau akasuma — worri worra qabanqaba inqabatini, ka woraana keesati hobaeni woliini butute ch'iisa.

²⁹ Worra Edomutifi hayyoota isanitifi jaaroleeni isaani ta lafa mohatuleeni achi jirani. Jari kunini qara askarti jajabdu, ammo amma tana worri askarti qabanqaba inqabatini, ta woraana keesati raawateeni woliini boola ekhera keesa ch'iisa.

³⁰ Jaarole lafa mirga mohatufi worri Sidonileeni achi jirani. Worri gaafa duri irre qabu nama mudamsiise, ammo ammatana nama woraanaani hobae ka qabanqaba inqabatini, woliini ch'eersani, boola ekhera keesa ch'ibsisani. Worri sunini qooda worra ch'eeraani boola ekherati gale agarta.

³¹ Hayyu Misiritiifi askartini isaa worra kana ch'ufa ka woraanaani hobae arginaani garaa jabaatte. Nami dubbi tana jed'e AABBO Waaqa.

³² Anumati hayyu Misiritini, nama jiru mudamsiisi jed'e, ammo isaafi askarti isaale woraanaani hobaasani, worra qabanqaba inqabatini ka woraanaani raawate woliini boola ekherati galcha. Nami waan kana jed'e AABBO Waaqa gudda.